ନାଗପୁର: ଭ୍ରମଣକାରୀ ଇଂଲଣ୍ଡକୁ ଚକମା ଦେଇଛନ୍ତି ଭାରତୀୟ ବୋଲର । ଭାରତୀୟ ବୋଲର ଶାଣିତ ବୋଲିଂରେ ଘାଇଲା ହୋଇଛି ଇଂଲଣ୍ଡ । ୩ ମ୍ୟାଚ୍ ବିଶିଷ୍ଟ ସିରିଜ୍ର ପ୍ରଥମ ମ୍ୟାଚ୍ରେ ପ୍ରଥମେ ବ୍ୟାଟିଂ କରିଥିବା ଇଂଲଣ୍ଡ ୪୭.୪ ଓଭରରେ ୨୪୮ ରନରେ ଅଲଆଉଟ୍ ହୋଇଛି । ପ୍ରଥମ ଦିନିକିଆ ଜିତିବା ପାଇଁ ଭାରତ ସମ୍ମୁଖରେ ୨୪୯ ରନର ବିଜୟ ଲକ୍ଷ୍ୟ ରହିଛି। ଦଳ ପକ୍ଷରୁ ଜୋସ୍ ବଟଲର ସର୍ବାଧିକ ୫୨ ରନ ଓ ଜାକବ ବେଥେଲ ୫୧ର ଅର୍ଦ୍ଧଶତକୀୟ ଇନିଂସ ଖେଳିଛନ୍ତି। ତାଙ୍କ ବ୍ୟତୀତ ଫିଲିପ୍ ସଲ୍ଟ ୪୩ ରନ ଓ ବେନ ଡକେଟ୍ ୩୨ ରନ କରିଛନ୍ତି। ଭାରତ ପକ୍ଷରୁ ବୋଲିଂରେ ରବୀନ୍ଦ୍ର ଜାଡ଼େଜା ୩ଟି ଓ୍ଵିକେଟ୍ ନେଇଥିବା ବେଳେ ପଦାର୍ପଣ ଦିନିକିଆରେ ହର୍ଷିତ ରାଣା ୩ ଓ୍ଵିକେଟ୍ ନେଇଛନ୍ତି।
ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଇଂଲଣ୍ଡକୁ ଦୁଇ ଓପନର ଫିଲିପ ସଲ୍ଟ ଓ ବେନ ଡକେଟ୍ ଦମଦାର ଆରମ୍ଭ ଦେଇଥିଲେ। ଉଭୟ ବିସ୍ଫୋରକ ବ୍ୟାଟିଂ କରି ପ୍ରଥମ ଓ୍ଵିକେଟରେ ୭୫ ରନ ଯୋଡ଼ିଥିଲେ। ଫିଲିପ୍ ସଲ୍ଟ ୨୬ ବଲରୁ ୫ ଚୌକା ଓ ୩ ଛକା ସହ ୪୩ ରନର ବିସ୍ଫୋରକ ଇନିଂସ ଖେଳି ଦୁର୍ଭାଗ୍ୟବଶତଃ ରନ ଆଉଟ୍ ହୋଇଥିଲେ। ଏହି ଯୋଡ଼ି ଭାଙ୍ଗିବା ପରେ ଇଂଲଣ୍ଡ ନିୟମିତ ବ୍ୟବଧାନରେ ଓ୍ଵିକେଟ୍ ହରାଇିଥିଲା । ବେନ ଡକେଟଙ୍କୁ ଆଉଟ୍ କରି ହର୍ଷିତ ରାଣା ଦିନିକିଆରେ ପ୍ରଥମ ଓ୍ଵିକେଟ୍ ନେଥିଲେ।
ଇଂଲଣ୍ଡ ଟିମ୍ର ଅଧିନାୟକ ଜୋସ୍ ବଟଲର ୬୭ ବଲରୁ ୪ ଚୌକା ସହ ୫୨ ରନର ଇନିଂସ ଖେଳି ଆଉଟ୍ ହେବା ପରେ ଇଂଲଣ୍ଡକୁ ବଡ଼ ଝଟକା ଲାଗିଥିଲା। ଲିଭିଙ୍ଗଷ୍ଟୋନ ୫ ରନ କରି ବିଦାୟ ନେଇଥିଲେ । ଶେଷ ଆଡ଼କୁ ବେଥେଲ ୫୧ ରନର ଇନିଂସ ଖେଳିବାରୁ ଇଂଲଣ୍ଡ ୪୭.୪ ଓଭରରେ ୨୪୮ ରନ କରି ପାରିଛି। ଜୋଫ୍ରା ଆର୍ଚର ୧୮ ବଲରୁ ୨୧ ରନ କରି ଅପରାଜିତ ଥିଲେ । ବୋଲିଂରେ ରବୀନ୍ଦ୍ରା ଜାଡ଼େଜା ୯ ଓଭରରେ ୨୬ ରନ ଦେଇ ୩ଟି ଓ୍ବିକେଟ୍ ନେଇଥିଲେ । ପଦାର୍ପଣ କରିଥିବା ହର୍ଷିତ ରାଣା ୭ ଓଭରରେ ୫୩ ରନ ଦେଇ ମହଙ୍ଗା ସାବ୍ୟସ୍ତ ହୋଇଥିଲେ ହେଁ ୩ଟି ଓ୍ଵିକେଟ୍ ନେଇଥିଲେ। ମହମ୍ମଦ ଶାମି, ଅକ୍ଷର ପଟେଲ୍ ଓ କୁଲଦୀପ ଯାଦବଙ୍କୁ ଗୋଟି ଲେଖାଏଁ ଓ୍ଵିକେଟ୍ ମିଳିଥିଲା ।
