କୋଲକାତା: ଦଙ୍ଗା ପ୍ରଭାବିତ ମୁର୍ଶିଦାବାଦ ପରିଦର୍ଶନ ନକରିବାକୁ ରାଜ୍ୟପାଳଙ୍କୁ ଅନୁରୋଧ କରିବେ ବୋଲି କହିଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଛନ୍ତି । ଅଧିକାର ସୀମା ୫୦ କିଲୋମିଟର ଯାଏଁ ବୃଦ୍ଧି କରାଯାଇ ଥିବାରୁ ବିଏସଏଫ ଉତ୍ତର ଦାୟିତ୍ବ ନେବ । ସେପଟେ ବେଙ୍ଗଲକୁ କେତେ ବିଦେଶୀ ପ୍ରବେଶ କରୁଛନ୍ତି ସେନେଇ କେନ୍ଦ୍ର ଗୃହ ମନ୍ତ୍ରାଳୟ ତଥ୍ୟ ଦେଉନାହିଁ ବୋଲି ମମତା ଅଭିଯୋଗ କରିଛନ୍ତି ।
ମମତା ବାନାର୍ଜୀ କହିଛନ୍ତି, ସ୍ଥିତି ଧୀରେ ଧୀରେ ସ୍ବାଭାବିକ ହେଉଛି ।ମୁର୍ଶିଦାବାଦରେ ଓ୍ବାକଫ ସଂଶୋଧନ ଆଇନ ବିରୋଧୀ ହିଂସା ଉଗ୍ର ରୂପ ଧାରଣ କରିଥିଲା । ଦଙ୍ଗା ପ୍ରଭାବିତ ଜିଲ୍ଲା ମୁର୍ଶିଦାବାଦ ଯାଇ ବେଙ୍ଗଲ ରାଜ୍ୟପାଳ ସିଭି ଆନନ୍ଦ ବୋଷ ସ୍ଥିତି ସମୀକ୍ଷା କରିବେ ବୋଲି ରିପୋର୍ଟ ପ୍ରକାଶ ପାଇଥିଲା । ଗଣମାଧ୍ୟମ ରିପୋର୍ଟକୁ ନେଇ ମମତା ବାନାର୍ଜୀ ପ୍ରତିକ୍ରିୟା ଦେଇଛନ୍ତି । ସ୍ଥାନୀୟ ଲୋକଙ୍କ ବ୍ୟତୀତ ଅନ୍ୟ କାହାକୁ ମୁର୍ଶିଦାବାଦ ନଯିବାକୁ ଅନୁରୋଧ କରିବେ ବୋଲି ମମତା କହିଛନ୍ତି ।
ସଂଶୋଧିତ ଓ୍ବାକଫ ଆଇନ୍ ବିରୋଧରେ ମୁର୍ଶିଦାବାଦରେ ଜାରି ଆନ୍ଦୋଳନରେ ପ୍ରାୟ ୩ ଜଣଙ୍କ ମୃତ୍ୟୁ ହୋଇଛି ଏବଂ ଅନେକ ଲୋକ ଆହତ ହୋଇଛନ୍ତି । ସ୍ଥିତିକୁ ନିୟନ୍ତ୍ରଣକୁ ଆଣିବା ଲାଗି ବହୁ ସଂଖ୍ୟକ ବିଏସଏଫ୍ ଯବାନ ଏବଂ ପୋଲିସ କର୍ମୀ ନିୟୋଜିତ ହୋଇଛନ୍ତି ।
ମୁଖ୍ୟମନ୍ତ୍ରୀ ସୀମା ସୁରକ୍ଷା ଆଇନ୍ରେ ପରିବର୍ତ୍ତନକୁ ନେଇ କେନ୍ଦ୍ରକୁ ସମାଲୋଚନା କରି କହିଛନ୍ତି, ଗୃହମନ୍ତ୍ରୀ ଏକ ନୂଆ ନିୟମ ଆଣିଛନ୍ତି । ଏଥିରେ ବିଏସଏଫର ଅଧିକାର କ୍ଷେତ୍ରକୁ ୧୫ କିଲୋମିଟରରୁ ବଢ଼ାଇ ୫୦ କିଲୋମିଟର କରି ଦିଆଯାଇଛି । ତେଣୁ ବିଏସଏଫକୁ ଉତ୍ତରଦାୟୀ ହେବା ଦରକାର । ସେପଟେ ବେଙ୍ଗଲକୁ କେତେ ବିଦେଶୀ ପ୍ରବେଶ କରୁଛନ୍ତି ସେନେଇ କେନ୍ଦ୍ର ଗୃହ ମନ୍ତ୍ରାଳୟ ରାଜ୍ୟ ସରକାରଙ୍କୁ ସୂଚନା ଦେଉ ନାହିଁ ବୋଲି ମମତା ବାନାର୍ଜୀ ଅଭିଯୋଗ କରିଛନ୍ତି ।
