ବ୍ରହ୍ମପୁର, ୦୪/୦୭ : ଅଚାନକ ଆଶ୍ରମ ବିଦ୍ୟାଳୟ ପରିଦର୍ଶନରେ ପହଞ୍ଚିଲେ ମନ୍ତ୍ରୀ। ସ୍କୁଲ ବୁଲିଲେ, ସ୍ଥିତି ପରଖିଲେ ଆଉ ପିଲାଙ୍କୁ ପାଠ ପଢାଇଲେ। ପୋଲସରା ବ୍ଳକ ପାଣ୍ଡିରିପଡା ପଞ୍ଚାୟତ ପାତାଳସିଙ୍ଗି ଗ୍ରାମରେ ଥିବା ସରକାରୀ ଆଶ୍ରମ ବିଦ୍ୟାଳୟରେ ସରପ୍ରାଇଜ୍ ଭିଜିଟ୍ କରିଛନ୍ତି ମତ୍ସ୍ୟ ଓ ପ୍ରାଣୀ ସମ୍ପଦ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ।
ସୂଚନାନୁଯାୟୀ, ପୋଲସରା ବିଧାୟକ ତଥା ମନ୍ତ୍ରୀ ଗୋକୁଳାନନ୍ଦ ମଲ୍ଲିକ ଅଚାନକ ପୋଲସରା ବ୍ଳକ ପାତାଳସିଙ୍ଗି ଗ୍ରାମରେ ଥିବା ସରକାରୀ ଆଶ୍ରମ ବିଦ୍ୟାଳୟ ଗସ୍ତରେ ପହଞ୍ଚିଛନ୍ତି। ସ୍କୁଲ୍ ପରିଦର୍ଶନରେ ଯାଇ ମନ୍ତ୍ରୀ ଆଶ୍ରମରେ ଥିବା ପିଲାମାନଙ୍କୁ ପାଠ ପଢାଇଛନ୍ତି। ଏହା ସହ ପିଲାମାନଙ୍କୁ ରାଜ୍ୟ ସମ୍ପର୍କିତ ପ୍ରଶ୍ନ ପଚାରିଛନ୍ତି। ମୁଖ୍ୟମନ୍ତ୍ରୀ ଓ ବାଚସ୍ପତିଙ୍କ ନାମ ମଧ୍ୟ ପଚାରିଛନ୍ତି। ଏହା ସହ ଭଲ ପାଠ ପଢି ଭଲ ମଣିଷ ହେବାକୁ ଉପଦେଶ ଦେଇଛନ୍ତି।
ମନ୍ତ୍ରୀ ପିଲାମାନଙ୍କୁ ପାଠ ପଢ଼ାଇ ଅହେତୁକ ଆନନ୍ଦ ଅନୁଭବ କରିଛନ୍ତି। ଏହାପରେ ଆଶ୍ରମରେ ଥିବା ରୋଷେଇ ଶାଳରେ ପହଞ୍ଚି ରୋଷେଇ ହୋଇଥିବା ଖାଦ୍ୟ ଦେଖିବା ସହିତ ଏହାର ମାନ ଯାଞ୍ଚ୍ କରି ପାଚିକାମାନଙ୍କ ସହିତ ଆଲୋଚନା କରିଛନ୍ତି। ଆଶ୍ରମରେ ଥିବା ଶିକ୍ଷକ ଓ ଶିକ୍ଷୟିତ୍ରୀମାନଙ୍କ ସହିତ ଆଶ୍ରମର ସୁବିଧା ଅସୁବିଧା ବିଷୟକୁ ନେଇ ପୁଙ୍ଖାନୁପୁଙ୍ଖ ଭାବେ ଆଲୋଚନା କରିଛନ୍ତି। ଆଶ୍ରମରେ ପାଣି ସଠିକ୍ ଭାବେ ନିଷ୍କାସନ ହେଉନଥିବାରୁ ସ୍କୁଲ ପରିସରରେ ପାଣି ରହୁଥିବା ବିଷୟ ଅବଗତ ପରେ ତୁରନ୍ତ ସମାଧାନ କରିବା ପାଇଁ ପ୍ରତିଶ୍ରୁତି ମଧ୍ୟ ଦେଇଛନ୍ତି। ଏହି ସମୟରେ ଘୁମୁସର ଜିଲ୍ଲା ଯୁବ ମୋର୍ଚ୍ଚା ସଭାପତି ଦୀପକ ପ୍ରଧାନ, ଜିଲ୍ଲା ଯୁବ ମୋର୍ଚ୍ଚା ଉପସଭାପତି ରାଜେଶ ବିଶ୍ବାଳ ସମେତ ଗ୍ରାମବାସୀ ଉପସ୍ଥିତ ଥିଲେ।