ନୂଆଦିଲ୍ଲୀ: ଜର୍ମାନ ରାଷ୍ଟ୍ରପତି ଫ୍ରାଙ୍କ-ୱାଲ୍ଟର ଷ୍ଟିନମେୟରଙ୍କ ଅଫିସିଆଲ୍ X ଆକାଉଣ୍ଟ ହ୍ୟାକ୍ ହୋଇଥିବା ଜଣାପଡ଼ିଛି। ହ୍ୟାକର୍ସ ମାନେ ରାଷ୍ଟ୍ରପତିଙ୍କ ଆକାଉଣ୍ଟର ପ୍ରୋଫାଇଲ୍ ଫଟୋକୁ ବିହାର ସରକାରଙ୍କ ଜଳସମ୍ପଦ ବିଭାଗର ଫଟୋ ସହିତ ବଦଳାଇ ଦେଇଛନ୍ତି। ତେବେ ଏହି ଘଟଣା ଉପରେ ଜର୍ମାନ ସରକାରଙ୍କ ପକ୍ଷରୁ କୌଣସି ସରକାରୀ ବୟାନ ଦିଆଯାଇ ନାହିଁ, କିନ୍ତୁ ମିଡିଆ ରିପୋର୍ଟ ଅନୁଯାୟୀ,ଏହା ପୂର୍ବରୁ ମଧ୍ୟ ହ୍ୟାକର୍ସ ଏହି ଆକାଉଣ୍ଟକୁ ନାଜି ପାର୍ଟିର ପୂର୍ବତନ ମୁଖ୍ୟ ଆଡଲଫ ହିଟଲରଙ୍କ ପ୍ରୋଫାଇଲ୍ ଭଳି ବନାଇଥିଲେ । 

ସୂଚନା ମୁତାବକ ଏହି ସାଇବର ଆକ୍ରମଣ ବିଷୟରେ ସୂଚନା ପ୍ରଥମେ ଅନେକ X ଉପଭୋକ୍ତା ଦେଇଥିଲେ। ଯେତେବେଳେ ଆକାଉଣ୍ଟର ୟୁଜରନେମ @adolf_gov କୁ ପରିବର୍ତ୍ତନ କରାଯାଇଥିଲା। ପୂର୍ବତନ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ "ମେକ୍ ଆମେରିକା ଗ୍ରେଟ୍ ଏଗେନ୍" ଅଭିଯାନ ଦ୍ୱାରା ଅନୁପ୍ରାଣିତ ହୋଇ ଆକାଉଣ୍ଟ ବିବରଣୀକୁ "ମେକ୍ ଜର୍ମାନୀ ଗ୍ରେଟ୍ ଏଗେନ୍" ରେ ପରିବର୍ତ୍ତନ କରାଯାଇଥିଲା।

ହ୍ୟାକ୍ ହୋଇଥିବା ଆକାଉଣ୍ଟର ବାୟୋରେ ଲେଖାଥିଲା,"ମେକ୍ ଜର୍ମାନୀ ଗ୍ରେଟ୍ ଏଗେନ୍" । ଆକାଉଣ୍ଟର ୫୭ ହଜାର ଫଲୋଅର୍ସ ଥିଲେ। BRICS ନ୍ୟୁଜର ଅଫିସିଆଲ୍ X ଆକାଉଣ୍ଟ ପୋଷ୍ଟ କରିଛି ଯେ ଏହା ଜର୍ମାନ ରାଷ୍ଟ୍ରପତିଙ୍କ ଆକାଉଣ୍ଟ ଏବଂ ଏହାକୁ ହ୍ୟାକ୍ କରାଯାଇଛି । BRICS ନ୍ୟୁଜ୍ ଆକାଉଣ୍ଟର ପ୍ରକୃତ ୟୁଜରନେମ୍, @FrankWalterGER ଏବଂ ଏକ ଭିନ୍ନ ବର୍ଣ୍ଣନା ଦେଖାଇ ଏକ ସ୍କ୍ରିନସଟ୍ ମଧ୍ୟ ସେୟାର କରିଛି।

ପରବର୍ତ୍ତୀ ସମୟରେ, ଆକାଉଣ୍ଟଟିକୁ ଅସ୍ଥାୟୀ ଭାବରେ ନିଲମ୍ବିତ କରାଯାଇଥିଲା କିନ୍ତୁ ପରେ ଏହାକୁ ପୁନଃ ସକ୍ରିୟ କରାଯାଇଥିଲା ଏବଂ ଏହାର ନାମ ବିହାର ସରକାରଙ୍କ ଜଳ ସମ୍ପଦ ବିଭାଗ ଭାବରେ ପରିବର୍ତ୍ତନ କରାଯାଇଥିଲା, ଯଦିଓ ୟୁଜରନେମ୍ ଏବେ ବି @FrankWalterGER ରହିଛି। ହ୍ୟାକର୍ସମାନେ ଆକାଉଣ୍ଟରୁ ହିଟଲର ଏବଂ ଇଟାଲୀୟ ଏକଛତ୍ରବାଦୀ ବେନିଟୋ ମୁସୋଲିନିଙ୍କ ଏକ ଫଟୋ ମଧ୍ୟ ପୋଷ୍ଟ କରିଛନ୍ତି ଯାହାର କ୍ୟାପସନ ଥିଲା, "ମନେରଖନ୍ତୁ: ଯେତେବେଳେ ଆପଣ ଏକାଠି ଠିଆ ହୁଅନ୍ତି, ଯେତେବେଳେ ଆପଣଙ୍କର ଲକ୍ଷ୍ୟ ଏକ, ଯେତେବେଳେ ଆପଣଙ୍କର ସଂକଳ୍ପ ଅଟଳ, କେହି ଆପଣଙ୍କୁ ଅଟକାଇ ପାରିବେ ନାହିଁ"। ପରେ ଏହି ପୋଷ୍ଟକୁ ଆକାଉଣ୍ଟରୁ ହଟାଇ ଦିଆଯାଇଥିଲା।