ସମ୍ବଲପୁର, ୧୪।୭: ସମ୍ବଲପୁର ଗୁଇନ୍ଦା ଅବକାରୀ ବିଭାଗକୁ ବଡ଼ ସଫଳତା । ବାହାର ରାଜ୍ୟକୁ ଏକ କଣ୍ଟେନର ଟ୍ରକରେ ଚୋରା ଚାଲାଣ ହେଉଥିବା ୫ କୁଇଣ୍ଟାଲ ବେଆଇନ ଗଞ୍ଜେଇକୁ ଜବତ କରିବା ସହ ଜଣେ ଅଭିଯୁକ୍ତକୁ ଗିରଫ ପରେ କୋର୍ଟ ଚାଲାଣ କରିଛି ଗୁଇନ୍ଦା ଅବକାରୀ ବିଭାଗ । ସୂଚନା ଅନୁସାରେ, ରବିବାର ଗୁଇନ୍ଦା ଅବାକରୀ ବିଭାଗର ଏକ ଟିମ୍ ନିତିଦିନ ପରି ପାଟ୍ରୋଲିଙ୍ଗ କରୁଥିଲେ । 

ସେହି ସମୟରେ ବରଗଡ଼ ପଟରୁ ୟୁପି ନମ୍ବର ବିଶିଷ୍ଟ ଏକ କଣ୍ଟେନର ଟ୍ରକଟି ଆସୁଥିବା ଦେଖି ସନ୍ଦେହରେ ଅଇଁଠାପାଲି ଛକରେ କଣ୍ଟେନରକୁ ଅଟକାଇ ଯାଞ୍ଚ କରିଥିଲା ଗୁଇନ୍ଦା ଅବକାରୀ ବିଭାଗ । ଯାଞ୍ଚ ବେଳେ ସେହି କଣ୍ଟେନର ଟ୍ରକରୁ ସିକ୍ରେଟ୍ ଚାମ୍ବରରୁ ୫ କୁଇଣ୍ଟାଲ ଗଞ୍ଜେଇ ଜବତ କରାଯାଇଥିଲା । ଏଥିସହ କଣ୍ଟେନରର ଡ୍ରାଇଭର ଥିବା ଉତ୍ତରପ୍ରଦେଶ ରାଜ୍ୟର ୟୋଗେଶ କୁମାର ନାମକ ଜଣେ ଅଭିଯୁକ୍ତକୁ ଏହି ଘଟଣାରେ ଗିରଫ ପରେ କୋର୍ଟ ଚାଲାଣ କରାଯାଇଛି । ଏହି ଗଞ୍ଜେଇ ବରଗଡ଼ ଜିଲ୍ଲାରୁ ଉତ୍ତରପ୍ରଦେଶ ରାଜ୍ୟକୁ ଚୋରା ଚାଲାଣ ହେଉଥିବା ବେଳେ ଗଞ୍ଜେଇ ସହ କଣ୍ଟେନର ଟ୍ରକର ଆନୁମାନିକ ମୂଲ୍ୟ ୬୦ ଲକ୍ଷ ହେବ ବୋଲି ଗୁଇନ୍ଦା ଅବକାରୀ ବିଭାଗ ପକ୍ଷରୁ ସୂଚନା ଦିଆଯାଇଛି ।