ମୁମ୍ବାଇ: ଏନସିପିର ବରିଷ୍ଠ ନେତା ବାବା ସିଦ୍ଦିକି ହତ୍ୟାକଣ୍ଡ ମାମଲାରେ ବଡ଼ ଖୁଲାସା । ବାବା ସିଦ୍ଦିକିଙ୍କୁ ହତ୍ୟା କରିବା ଲାଗି ୩ ମାସ ଆଗରୁ ଯୋଜନା ପ୍ରସ୍ତୁତ ହୋଇଥିଲା । ଅଭିଯୁକ୍ତମାନେ ବିନା ଅସ୍ତ୍ରରେ ଅନେକ ଥର ବାବା ସିଦ୍ଦିକିଙ୍କ ଘର ପାଖକୁ ଯାଇଥିଲେ । ମୁମ୍ବାଇ କ୍ରାଇମବ୍ରାଞ୍ଚ ପାଖରୁ ମିଳିଥିବା ସୂଚନା ଅନୁସାରେ, ବାବା ସିଦ୍ଦିକିଙ୍କୁ ହତ୍ୟା କରିବା ଲାଗି ସବୁ ଯୋଜନା ପୁଣେରେ ହୋଇଥିଲା । ଏବେ ସୁଦ୍ଧା ୧୫ରୁ ଅଧିକ ଲୋକଙ୍କ ବୟାନ ରେକର୍ଡ କରିସାରିଛି କ୍ରାଇମବ୍ରାଞ୍ଚ ।
ସିଦ୍ଦିକିଙ୍କ ହତ୍ୟା ମାମଲାରେ ଗିରିଫ ହୋଇଥିବା ଚତୁର୍ଥ ଅଭିଯୁକ୍ତ ହରୀଶ ମିଡିଲ୍ ମ୍ୟାନ୍ ଥିଲା । ଅଭିଯୁକ୍ତ ପ୍ରବୀଣ ଏବଂ ଶୁଭମ ଲୋନକର ଗିରଫ ଅଭିଯୁକ୍ତ ଗୁରମେଲ୍ ସିଂହ ଏବଂ ଧର୍ମରାଜ କଶ୍ୟପକୁ ହରୀଶ ଦ୍ବାରା ୨ ଲକ୍ଷ ଟଙ୍କା ଦେଇଥିଲେ । ଶୁଟର୍ସଙ୍କୁ ଟଙ୍କା ସହିତ ଦୁଇଟି ମୋବାଇଲ୍ ଫୋନ୍ ଦିଆଯାଇଥିଲା । ହରୀଶ ଗତ ୯ ବର୍ଷ ହେଲା ପୁଣେରେ ରହୁଥିଲା ।
ତଦନ୍ତରୁ ଜଣାପଡ଼ିଛି ଯେ, ଗୁରମେଲ୍ ସିଂହ ଏବଂ ଧର୍ମରାଜ କଶ୍ୟପ ୟୁଟ୍ୟୁଭ ଦେଖି ଗୁଳି ଚଳାଇବା ଶିଖିଥିଲେ । ଅଭିଯୁକ୍ତମାନେ ସ୍ନାପଚାଟ୍ରେ ଚାଟ୍ କରୁଥିବା ବେଳେ ଇନଷ୍ଟାଗ୍ରାମରେ କଲ୍ କରୁଥିଲେ । ଅଭିଯୁକ୍ତମାନେ ବନ୍ଧୁକ ଚାଳନା କରିବାର ଅଭ୍ୟାସ କୁର୍ଲା ଏବଂ ପୁଣେରେ କରିଥିଲେ ।
ମୁମ୍ବାଇ କ୍ରାଇମବ୍ରାଞ୍ଚ ଏବେ ସୁଦ୍ଧା ୪ ଅଭିଯୁକ୍ତଙ୍କୁ ଗିରଫ କରିଛି ଏବଂ ଏବେ ବି ଅନ୍ୟ ୩ ଅଭିଯୁକ୍ତ ଫେରାର ଅଛନ୍ତି । ମୁମ୍ବାଇ ପୋଲିସକୁ ଆଜି ଯେଉଁ କଳା ରଙ୍ଗର ବ୍ୟାଗ ମିଳିଛି ସେଥିରୁ ୭.୬୨ ଏମଏମ୍ର ବନ୍ଧୁକ ମିଳିଛି । ତେବେ ଏହି ମାମଲାରେ ଲରେନ୍ସ ବିଷ୍ଣୋଇ ଗ୍ୟାଙ୍ଗର ହାତ ରହିଛି । ଶୁଭମ ଲୋନକର ଫେସବୁକ ପୋଷ୍ଟରେ ଲରେନ୍ସ ବିଷ୍ଣୋଇ ଗ୍ୟାଙ୍କର ନାଁ ନେଇଥିଲା । ଏବେ ଏହି ମାମଲାର ତଦନ୍ତ ଜାରି ରହିଛି ।
