ସମ୍ବଲପୁର, ୨୪/୦୭: ଆକ୍ସନ ମୋଡ୍‌ରେ ସମ୍ବଲପୁର ପୋଲିସ । ଆନ୍ତଃରାଜ୍ୟ ଡକାୟତ ଗ୍ୟାଙ୍ଗ୍ ଗିରଫ l ସମ୍ବଲପୁରର ବିଭିନ୍ନ ରାଇସ୍ ମିଲରୁ ଲୁଟ୍ କରୁଥିଲେ ଏହି ଦଳ । ୧୦ ଜଣ ଡକାୟତଙ୍କୁ ଗିରଫ କରିବା ସହ ଲକ୍ଷାଧିକ ଟଙ୍କା, ସୁନା, ରୂପା ଏବଂ ଗାଡି ଜବତ କରିଛି ପୋଲିସ।

ସୂଚନା ଅନୁଯାୟୀ, ସମ୍ବଲପୁରରେ ବଢି ଚାଲିଛି ଡକାୟତଙ୍କ ଦୌରାତ୍ମ୍ୟ। ଜୁଲାଇ ୧୬ ତାରିଖରେ ବୁର୍ଲା ଥାନା ଅନ୍ତର୍ଗତ ବାବୁବନ୍ଧରେ ଏକ ରାଇସ୍ ମିଲରେ ଡକାୟତି ହୋଇଥିଲା। ଡକାୟତମାନଙ୍କୁ ଧରିବା ପାଇଁ ଏକ ସ୍ୱତନ୍ତ୍ର ଟିମ୍ ଗଠନ କରିଥିଲା ସମ୍ବଲପୁର ପୋଲିସ । ଏହି ଡକାୟତମାନେ ପୂର୍ବରୁ ସମ୍ବଲପୁର ଜ଼ିଲ୍ଲାରେ ୧୪ଟି ଡକାୟତି କରି ସାରିଥିଲେ l ପୋଲିସର ସ୍ୱତନ୍ତ୍ର ଟିମ୍ ଏହି ଗ୍ୟାଙ୍ଗ୍‌କୁ ଧରିବା ପାଇଁ ବିଭିନ୍ନ ସ୍ଥାନରେ ଚଢ଼ାଉ ଆରମ୍ଭ କରିଥିଲା l ବିଭିନ୍ନ ରାଇସ୍ ମିଲର ସିସିଟିଭି ଯାଞ୍ଚ୍ କରିଥିଲା ପୋଲିସ। ଏହି ଡକାୟତମାନେ ଆଉ ଏକ ଡକାୟତି ଯୋଜନା କରୁଥିବା ଖବର ପାଇ ମୁଣ୍ଡଘଟ ନିକଟରେ ପୋଲିସ ସେମାନଙ୍କୁ ଧରିଥିଲା। ଏହି ଘଟଣାରେ ୧୦ଜଣ ଡକାୟତ ଗିରଫ ହୋଇଛନ୍ତି । ସେମାନଙ୍କ ପାଖରୁ ୪୮୦ ଗ୍ରାମ ସୁନା, ୧୬୫ ଗ୍ରାମ ରୁପା ଅଳଙ୍କାର, ୫ ଲକ୍ଷ ୧୨ ହଜ଼ାର ଟଙ୍କା, ୧୧ ମୋବାଇଲ, ୫ ବାଇକ୍ ସହ ଦୁଇ ବୋଲେରୋ ଓ ଗୋଟିଏ ଟ୍ରାକ୍ଟର ଜବତ କରିଛି ବୁର୍ଲା ପୋଲିସ । ବଲାଙ୍ଗୀର, ଝାରସୁଗୁଡା ଓ ସୁନ୍ଦରଗଡ଼ ଜ଼ିଲ୍ଲାରେ ମଧ୍ୟ ଏମାନେ ଅପରାଧ କରିଥିବା ପୋଲିସ କହିଛି ।