ନୂଆଦିଲ୍ଲୀ: ଥାଇଲ୍ୟାଣ୍ଡର ପୂର୍ବତନ ପ୍ରଧାନମନ୍ତ୍ରୀ ଥାନିନ୍ କ୍ରାଇଭିଚିଏନ୍ଙ୍କର ୯୭ ବର୍ଷ ବୟସରେ ଦେହାନ୍ତ ଘଟିଛି। ୧୯୭୦ ମସିହାରେ କ୍ରାଇଭିଚିୟାନ୍ ଜଣେ କଠୋର କମ୍ୟୁନିଷ୍ଟ ବିରୋଧୀ ନେତା ଭାବରେ ଉଭା ହୋଇଥିଲେ। ୧୯୭୬ ମସିହାରେ ସାମରିକ ବିଦ୍ରୋହ ପରେ ସେ ଦେଶର ପ୍ରଧାନମନ୍ତ୍ରୀ ପଦ ସମ୍ଭାଳିଥିଲେ। ଆଉ ଏହାର ଠିକ୍ ଗୋଟିଏ ବର୍ଷ ପରେ ଦ୍ୱିତୀୟ ବିଦ୍ରୋହରେ ତାଙ୍କୁ ଗାଦିଚ୍ୟୁତ କରାଯାଇଥିଲା।
ତାଙ୍କ ପରିବାର ଏକ ସୋସିଆଲ ମିଡିଆ ପୋଷ୍ଟରେ ତାଙ୍କ ମୃତ୍ୟୁ ବିଷୟରେ ସୂଚନା ଦେଇଛନ୍ତି। ହେଲେ ତାଙ୍କ ମୃତ୍ୟୁର କାରଣ ପ୍ରକାଶ କରାଯାଇ ନାହିଁ। ୧୯୭୬ ମସିହାରେ ରାଜା ଭୂମିବୋଲ ଆଦୁଲ୍ୟାଦେଜଙ୍କ ଦ୍ୱାରା ଥାନିନଙ୍କୁ ଥାଇଲ୍ୟାଣ୍ଡର ୧୪ତମ ପ୍ରଧାନମନ୍ତ୍ରୀ ଭାବରେ ନିଯୁକ୍ତ କରାଯାଇଥିଲା। ପ୍ରଧାନମନ୍ତ୍ରୀ ପଦ ଛାଡିବା ପରେ, ଥାନିନଙ୍କୁ ରାଜାଙ୍କ ପରାମର୍ଶଦାତା ପରିଷଦରେ ନିଯୁକ୍ତ କରାଯାଇଥିଲା, ଯେଉଁଠାରେ ସେ ପ୍ରାୟ ଚାଳିଶ ବର୍ଷ ଧରି କାର୍ଯ୍ୟ କରିଥିଲେ।
ପ୍ରଧାନମନ୍ତ୍ରୀ ପାଟୋଙ୍ଗଟାର୍ଣ୍ଣ ସିନାୱାତ୍ରା ଏକ ସୋସିଆଲ ମିଡିଆ ପୋଷ୍ଟରେ ଥାନିନଙ୍କ ମୃତ୍ୟୁରେ ଶୋକ ପ୍ରକାଶ କରିଛନ୍ତି ଏବଂ ତାଙ୍କୁ ଜଣେ ଜଣାଶୁଣା ବ୍ୟକ୍ତିତ୍ୱ ଭାବରେ ବର୍ଣ୍ଣନା କରିଛନ୍ତି । ଯେତେବେଳେ ଥାନିନ୍ ପ୍ରଧାନମନ୍ତ୍ରୀ ହୋଇଥିଲେ, ସେ ସମୟ ଥାଇଲ୍ୟାଣ୍ଡ ପାଇଁ ବହୁତ ଅସ୍ଥିର ଥିଲା। ୧୯୭୬ ମସିହାରେ, ଯେତେବେଳେ ଥାଇଲ୍ୟାଣ୍ଡର ପଡ଼ୋଶୀ ଦେଶଗୁଡ଼ିକ (ଭିଏତନାମ, ଲାଓସ ଏବଂ କାମ୍ବୋଡିଆ)ରେ କମ୍ୟୁନିଷ୍ଟ ମାନେ କ୍ଷମତାକୁ ଆସୁଥିଲେ, ସେ କମ୍ୟୁନିଷ୍ଟ ମାନଙ୍କ ବିରୁଦ୍ଧରେ କଠୋର ନୀତି ପ୍ରଣୟନ କରିଥିଲେ।
