ନୂଆଦିଲ୍ଲୀ: ଫେବ୍ରୁଆରୀ ୨୪, ୨୦୨୫ । ୟୁକ୍ରେନ୍ ଯୁଦ୍ଧକୁ ୩ ବର୍ଷ ପୂରିବ । ଏହା ପୂର୍ବରୁ ୟୁକ୍ରେନ ଉପରେ ରେକର୍ଡ ସଂଖ୍ୟକ ଡ୍ରୋନ୍ ମାଡ଼ କରିଛି ଋଷ । ଏନେଇ ୟୁକ୍ରେନ ରାଷ୍ଟ୍ରପତି ଭୋଲଦିମିର ଜେଲେନସ୍କି ଏକ୍ସରେ ସୂଚନା ଦେଇଛନ୍ତି । ସେ ଲେଖିଛନ୍ତି, ୟୁକ୍ରେନ ଉପରେ ରେକର୍ଡ ସଂଖ୍ୟକ ଡ୍ରୋନ ଆକ୍ରମଣ କରିଛି ଋଷ । ଯୁଦ୍ଧ ଆରମ୍ଭ ହେବା ପରଠାରୁ ଏହା ସବୁଠାରୁ ବଡ଼ ଡ୍ରୋନ ଆକ୍ରମଣ । ମସ୍କୋ ଆରମ୍ଭ କରିଥିବା ଯୁଦ୍ଧ ତୃତୀୟ ବାର୍ଷିକୀ ପୂର୍ବରୁ ଏହି ଆକ୍ରମଣ ହୋଇଛି । ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ନେତୃତ୍ୱରେ କିଭ୍ ଏବଂ ସମଗ୍ର ୟୁରୋପର ନେତାମାନେ ଆମେରିକାର ବୈଦେଶିକ ନୀତିରେ ଦ୍ରୁତ ପରିବର୍ତ୍ତନ ଆଣିବାକୁ ଚେଷ୍ଟା କରୁଥିବା ସମୟରେ ଏହି ଆକ୍ରମଣ ହୋଇଛି ।
ଏକ୍ସ ପୋଷ୍ଟରେ ଜେଲେନସ୍କି ଲେଖିଛନ୍ତି ଯେ, ‘ଯୁଦ୍ଧ ଆରମ୍ଭ ପରଠାରୁ ଋଷ ଶନିବାର ୨୬୭ଟି ଡ୍ରୋନ୍ ୟୁକ୍ରେନୀୟ ସହର ଏବଂ ଗାଁ ଉପରେ ମାଡ଼ କରିଛି ।’ ୟୁକ୍ରେନର ବାୟୁସେନା ଅନୁସାରେ, ୧୩ଟି ଅଞ୍ଚଳରେ ୧୩୮ ଟି ଡ୍ରୋନ୍ମାଡ଼ ହୋଇଛି । ଅନ୍ୟ ୧୧୯ ଟି ଲକ୍ଷ୍ୟଭେଦ କରିପାରି ନାହିଁ। ଏହା ଯୁଦ୍ଧ ଆରମ୍ଭ ହେବା ପରଠାରୁ ସବୁଠାରୁ ବ୍ୟାପକ ଡ୍ରୋନ୍ ଆକ୍ରମଣ ମଧ୍ୟରୁ ଗୋଟିଏ । କ୍ରିଭି ରିହ ସାମରିକ ପ୍ରଶାସନର ମୁଖ୍ୟଙ୍କ ଅନୁଯାୟୀ, ତିନୋଟି ବାଲିଷ୍ଟିକ୍ କ୍ଷେପଣାସ୍ତ୍ର ମଧ୍ୟ ନିକ୍ଷେପ କରାଯାଇଛି। କ୍ରିଭି ରିହ ସହରରେ ଏକ କ୍ଷେପଣାସ୍ତ୍ର ଆକ୍ରମଣରେ ଜଣେ ବ୍ୟକ୍ତି ପ୍ରାଣ ହରାଇଛନ୍ତି । ଜେଲେନସ୍କି କହିଛନ୍ତି ଯେ, ଗତ ସପ୍ତାହରେ ରୁଷ ଦ୍ୱାରା ୟୁକ୍ରେନରେ ମୋଟ ୧୧୫୦ ଡ୍ରୋନ୍ ଆକ୍ରମଣ, ୧୪୦୦ ରୁ ଅଧିକ ଗାଇଡେଡ୍ ଏରିୟଲ୍ ବୋମା ଏବଂ ବିଭିନ୍ନ ପ୍ରକାରର ୩୫ କ୍ଷେପଣାସ୍ତ୍ର ନିକ୍ଷେପ କରାଯାଇଛି ।
ରାଷ୍ଟ୍ରପତି ୟୁକ୍ରେନର ବାୟୁ ପ୍ରତିରକ୍ଷା ଦାୟିତ୍ୱରେ ଥିବା ଲୋକଙ୍କୁ ଧନ୍ୟବାଦ ଜଣାଇଛନ୍ତି ଏବଂ ବିଦେଶୀ ସହଯୋଗୀମାନଙ୍କୁ "ନ୍ୟାୟପୂର୍ଣ୍ଣ ଏବଂ ସ୍ଥାୟୀ ଶାନ୍ତି" ସୁନିଶ୍ଚିତ କରିବା ପାଇଁ ଏକତ୍ରିତ ହେବାକୁ ଆହ୍ୱାନ ଦେଇଛନ୍ତି । ଏହା କେବଳ ସମସ୍ତ ସହଯୋଗୀଙ୍କ ଏକତା ମାଧ୍ୟମରେ ହାସଲ କରାଯାଇପାରିବ - ଆମକୁ ସମଗ୍ର ୟୁରୋପର ଶକ୍ତି, ଆମେରିକାର ଶକ୍ତି, ସ୍ଥାୟୀ ଶାନ୍ତି ଚାହୁଁଥିବା ସମସ୍ତଙ୍କ ଶକ୍ତି ଆବଶ୍ୟକ ବୋଲି ସେ କହିଛନ୍ତି । ସେପଟେ ଜେଲେନସ୍କିଙ୍କ ବିରୋଧରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଆକ୍ରମଣାତ୍ମକ ଆଭିମୁଖ୍ୟ ଏବଂ ରିୟାଦରେ ଆମେରିକା ଏବଂ ରୁଷ ପ୍ରତିନିଧିମଣ୍ଡଳୀ ମଧ୍ୟରେ ହୋଇଥିବା ବୈଠକ ଦ୍ୱାରା କିଭ ଏବଂ ଏହାର ୟୁରୋପୀୟ ସହଯୋଗୀମାନେ ଚିନ୍ତିତ ହୋଇପଡ଼ଛନ୍ତି । ତେବେ ରିୟାଦ ଆୟୋଜିତ ଏହି ବୈଠକରେ ସାମିଲ ହେବାକୁ ୟୁକ୍ରେନକୁ ନିମନ୍ତ୍ରଣ କରାଯାଇ ନଥିଲା ।
