ନୂଆଦିଲ୍ଲୀ,୧୨/୦୧:ଆମେରିକାର ରାଷ୍ଟ୍ରପତି ଭାବେ ଆସନ୍ତା ୨୦ ତାରିଖରେ ଦ୍ବିତୀୟ ଥର ପାଇଁ ଶପଥ ନେବେ ଡ଼ୋନାଲ୍ଡ ଟ୍ରମ୍ପ ।ତେବେ ଟ୍ରମ୍ପଙ୍କ ଏହି ଶପଥ ସମାରୋହରେ ଭାରତ ପକ୍ଷରୁ ସାମିଲ ହେବାକୁ ଯାଉଛନ୍ତି ବୈଦେଶିକ ବ୍ୟାପାର ମନ୍ତ୍ରୀ ଏସ୍. ଜୟଶଙ୍କର। ଏନେଇ ବୈଦେଶିକ ମନ୍ତ୍ରଣାଳୟ ପକ୍ଷରୁ ସୂଚନା ମିଳିଛି। ସେହିପରି ତାଙ୍କର ଏହି ସମାରୋହରେ ଅନେକ ବଡ଼ ବଡ଼ ନେତା ସାମିଲ ହେବେ । ଟ୍ରମ୍ପ-ଭାନ୍ସ ଉଦ୍ଘାଟନି କମିଟି ଶପଥ ଗ୍ରହଣ ସମାରୋହରେ ଭାଗ ନେବା ପାଇଁ ଭାରତ ସରକାରଙ୍କୁ ନିମନ୍ତ୍ରଣ କରିଛନ୍ତି । ଆଉ ଏହି ନିମନ୍ତ୍ରଣ ଅନୁସାରେ ଏସ୍.ଜୟଶଙ୍କର ଭାରତର ପ୍ରତିନିଧିତ୍ୱ କରିବେ। ଏନେଇ ଆଜି ବୈଦେଶିକ ମନ୍ତ୍ରାଳୟ ପକ୍ଷରୁ ସୂଚନା ମିଳିଛି।
ଏହି ସମୟରେ ସେ ଟ୍ରମ୍ପ ପ୍ରଶାସନ ସହିତ ମଧ୍ୟ ସାକ୍ଷାତ କରିପାରନ୍ତି। ତେବେ ଏହି ଶପଥ ସମାରୋହରେ ଜୟଶଙ୍କର ସାମିଲ ହେବା ଓ ତାଙ୍କର ଏହି ଗସ୍ତ ଭାରତ ଏବଂ ଆମେରିକା ମଧ୍ୟରେ କୂଟନୈତିକ ସମ୍ପର୍କକୁ ଆହୁରି ଦୃଢ଼ କରିବ ବୋଲି ଆଶା କରାଯାଉଛି। ବୈଦେଶିକ ମନ୍ତ୍ରଣାଳୟ ଏକ ବିବୃତ୍ତିରେ କହିଛି, "ଟ୍ରମ୍ପ୍-ଭାନ୍ସ ଉଦଘାଟନୀ କମିଟିର ନିମନ୍ତ୍ରଣ କ୍ରମେ, ବୈଦେଶିକ ମନ୍ତ୍ରୀ (EAM) ଡକ୍ଟର ଏସ. ଜୟଶଙ୍କର ନିର୍ବାଚିତ ରାଷ୍ଟ୍ରପତିଙ୍କ ଶପଥ ଗ୍ରହଣ ଉତ୍ସବରେ ଭାରତ ସରକାରଙ୍କ ପ୍ରତିନିଧିତ୍ୱ କରିବେ। ଜୟଶଙ୍କର ଏହି ଗସ୍ତରେ ନୂତନ ଆମେରିକୀୟ ପ୍ରଶାସନର ସଦସ୍ୟମାନଙ୍କ ସହିତ ଭେଟିବେ।" ତେବେ ଶପଥ ଗ୍ରହଣ ଉତ୍ସବ ଜାନୁଆରି ୨୦ରେ ମାର୍ଟିନ୍ ଲୁଥର୍ କିଙ୍ଗ୍ ଜୁନିୟର ଡେ' ସହିତ ପାଳନ କରାଯିବ। ଡୋନାଲ୍ଡ ଟ୍ରମ୍ପ ୪୭ତମ ଥର ଏବଂ ଦ୍ୱିତୀୟ ଥର ପାଇଁ ଆମେରିକାର ରାଷ୍ଟ୍ରପତି ଭାବରେ ଶପଥ ଗ୍ରହଣ କରିବେ। ଏଥର ଟ୍ରମ୍ପଙ୍କ କ୍ୟାବିନେଟ୍ରେ ଅନେକ ଭାରତୀୟଙ୍କୁ ସ୍ଥାନ ମିଳିଛି।
