ଭୁବନେଶ୍ୱର ୧୦/୦୯: ନମ୍ବର-୧ ହ୍ୱିସ୍କି (ନିପ୍-୧୮୦ ମିଲି)ର ଦାମ ୧୮୦ ଟଙ୍କା । ହେଲେ ଏହାକୁ ୧୦ ଟଙ୍କା ଅଧିକ ଦାମରେ ବିକ୍ରି କରୁଛନ୍ତି । ରୟଲ୍ ଗ୍ରୀନ୍ (ନିପ୍) ୨୦୦ ଟଙ୍କା । ନେଉଛନ୍ତି ୨୧୦ ଟଙ୍କା । ୯୦ ଟଙ୍କାର ବ୍ରିଜରକୁ ଫ୍ରିଜର ଚାର୍ଜ ସହ ୧୦୦ ଟଙ୍କା ଦେବାକୁପଡ଼ୁଛି । ମାଲକାନଗିରିରୁ ମୟୂରଭଞ୍ଜ, ବଡ଼ଗଡ଼ରୁ ଜଗତ୍ସିଂହପୁର, ଗ୍ରାମାଞ୍ଚଳରେ ଥିବା ଠିପି ବନ୍ଦ ଦୋକାନର ମାଲିକମାନେ ଏମିତି ଚଢ଼ା ଦରରେ ମଦ ବିକ୍ରି କରୁଛନ୍ତି । ଏ ବିଷୟରେ ଅବକାରୀ କମିଶନରଙ୍କ ଠାରୁ ଆରମ୍ଭ କରି ଇନ୍ସପେକ୍ଟର ପର୍ଯ୍ୟନ୍ତ ସମସ୍ତେ ଜାଣି ବି ଚୁପ୍ ।
ରାଜ୍ୟରେ ୧୦୩୦ଟି ଠିପି ବନ୍ଦ ଦୋକନ ଅଛି । ଯେଉଁମାନେ ଲାଇସେନ୍ସ ପାଇଛନ୍ତି ସେମାନଙ୍କୁ ଅବକାରୀ ବିଭାଗ ହାତ କାଟି ଲେଖି ଦେଇଛି ଗ୍ରାହକଙ୍କଠାରୁ ଏମ୍ଆରପିରୁ ୧ ପଇସା ବି ଅଧିକ ନେଇପାରିବେ ନାହିଁ । ଯଦିନେବେ ତା’ହେଲେ ୧ ଲକ୍ଷ ୫୦ ହଜାର ଟଙ୍କା ଜରିମାନା ଗଣିବେ । ହେଲେ ଦୋକାନୀମାନେ ଏହି ନିୟମ ମାନୁଛନ୍ତି କି ନାହିଁ ସେ ବିଷୟରେ ଅବକାରୀ ବିଭାଗ ପାଖରେ ଖବର ନାହିଁ । ସହରରେ ଥିବା ଠିପି ବନ୍ଦ ଦୋକାନୀ ଏହି ନିମୟ ମାନୁଛନ୍ତି । ହେଲେ ବ୍ଲକ୍ ଅଞ୍ଚଳରେ ଥିବା ଦୋକାନୀ ନିୟମକୁ ଦଳିମକଚି ବେପାର କରୁଛନ୍ତି । କେନ୍ଦ୍ରାପଡ଼ା ଓ ଜଗତ୍ସିଂହପୁର ଜିଲ୍ଲାରେ ଏହି ନିୟମ ମୋଟ ଉପରେ ନାହିଁ କହିଲେ ଚଳେ । ଏଠି ବୋତଲ ପିଛା ୨୦ରୁ ୩୦ ଟଙ୍କା ଅଧିକ ନେଉଛନ୍ତି ।
ନିୟମ କହୁଛି, ଲାଇସେନ୍ସ ପାଇଥିବା ଦୋକାନୀ ଲାଇସେନ୍ସର ଫଟୋ ଓ ମଦ ଦର ତାଲିକା ଲଗାଇବାକୁ ବାଧ୍ୟ । ଏହି ନିୟମ କୌଣସି ଠିପି ବନ୍ଦ ଦୋକାନୀ ନ ମାନିଲେ କାର୍ଯ୍ୟାନୁଷ୍ଠାନ ହେବ । ହେଲେ ଏହି ନିୟମ କେବଳ କଟକ-ଭୁବନେଶ୍ୱରରେ ଲାଗୁ । ବାକି ଅଞ୍ଚଳରେ ନିୟମ ଚୁଲିକୁଯାଇଛି । ଦୋକାନୀ ନିଜ ନିୟମରେ ମନଇଚ୍ଛା ଦରରେ ବିକୁଛନ୍ତି ।
ଧାର୍ଯ୍ୟଠୁ ଚଢ଼ା ଦରରେ ମଦ ବିକ୍ରିରେ ସବୁଠାରୁ ଆଗରେ ଅଛନ୍ତି କେନ୍ଦ୍ରାପଡ଼ା ଓ ଜଗତସିଂହପୁର ଜିଲ୍ଲା । ଏହି ଜିଲ୍ଲାରେ ନିପ୍ (୧୮୦ ମିଲି) ୨୦ ଟଙ୍କା, ହାଫ୍ (୩୭୫ ମିଲି) ରେ ୩୦ ଟଙ୍କା ଓ ଫୁଲ୍ (କ୍ୱାଟ୍ ୭୫୦ ମିଲି) ପିଛା ୫୦ ଟଙ୍କା ଅଧିକ ନେଉଛନ୍ତି । ଦ୍ୱିତୀୟ ସ୍ଥାନରେ ଅଛନ୍ତି ସୁନ୍ଦରଗଡ଼ ଜିଲ୍ଲା ହେମଗିରି, ବାଲିଶଙ୍କର ଓ ସବ୍ଡେଗା ବ୍ଲକ୍ ଅଞ୍ଚଳରେ ଥିବା ଠିପି ବନ୍ଦ ଦୋକାନ । କ୍ୱାଟ୍ ପିଛା ୪୦ରୁ୬୦ ଟଙ୍କା ଅଧିକ ନେଉଛନ୍ତି । ବିୟର ପାଇଁ ଫ୍ରିଜ୍ ଚାର୍ଜ ବାବଦରେ ୨୦ରୁ୩୦ ଟଙ୍କା ଅଧିକ ନେଉଛନ୍ତି ।
କେବଳ ଏହି ୩ ଜିଲ୍ଲା ନୁହେଁ, ରାଜ୍ୟର ସବୁ ଜିଲ୍ଲାରେ ଚଢ଼ା ଦରରେ ମଦ ବିକ୍ରି ହେଉଛି । ଯଦି କୌଣସି ଗ୍ରାହକ ବିଲ୍ ମାଗୁଛି କିମ୍ବା ପ୍ରତିବାଦ କରୁଛି ମଦ ଦୋକାନୀମାନେ ଖରାପ ବ୍ୟବହାର କରିବା ସହ ମାରପିଟ କରୁଛନ୍ତି । ଚଢ଼ା ଦରରେ ମଦ ବିକ୍ରିର ପ୍ରତିବାଦ କରିଥିବା କେତେକ ଗ୍ରାହକଙ୍କୁ ଗତମାସରେ ବାଲେଶ୍ୱର ସିମୁଳିଆ, ଗଞ୍ଜାମ, ନୂଆପଡ଼ାରେ ଦୋକାନୀମାନେ ଆକ୍ରମଣ କରିଥିବା ଅଭିଯୋଗ ଆସିଥିଲା । ଦୋକାନୀମାନେ ଚଢ଼ା ଦରରେ ମଦ ବିକ୍ରି କରି କୋଟି କୋଟି ଟଙ୍କା ରୋଜଗାର କରୁଛନ୍ତି । ଆଶ୍ଚର୍ଯ୍ୟ କଥା ଏ ବିଷୟରେ ଅବକାରୀ କମିଶନରଙ୍କ ଠାରୁ ଆରମ୍ଭ କରି ଅବକାରୀ କନଷ୍ଟେବଳ ପର୍ଯ୍ୟନ୍ତ ସମସ୍ତେ ଜାଣିଥିଲେ ମଧ୍ୟ କାର୍ଯ୍ୟାନୁଷ୍ଠାନ ନେଉନାହାନ୍ତି ।
୨୦୨୩-୨୪ ଆର୍ଥିକ ବର୍ଷରେ ଓଡ଼ିଶାର ମୋଟ ରାଜସ୍ୱ ଆଦାୟ ୧,୬୬,୫୬୪ କୋଟି ଟଙ୍କା ଥିଲା । ସେଥିରୁ କେବଳ ମଦ ବିକ୍ରିରୁ ୪.୩୩% ରାଜସ୍ୱ ମିଳିଥିଲା । ଗତ ଅଗଷ୍ଟ ୩୧ ପର୍ଯ୍ୟନ୍ତ ନିୟମ ଥିଲା ଚଢ଼ା ଦରରେ ମଦ ବିକ୍ରି କଲେ ୧ ଲକ୍ଷ ଟଙ୍କା ଜରିମାନା ଦେବାକୁ ପଡିବ । ସେପ୍ଟେମ୍ବର ୧ ତାରିଖରୁ ନୂଆ ଅବକାରୀ ନୀତି ଆସିବା ପରେ ସରକାର ନିର୍ଦ୍ଦେଶ ଦେଇଛନ୍ତି ଧାର୍ଯ୍ୟ ଦରଠାରୁ ଅଧିକ ଟଙ୍କା ନେଲେ ୧ ଲକ୍ଷ ୫୦ ହଜାର ଟଙ୍କା ଜରିମାନା ଦେବାକୁ ପଡିବ । ବର୍ଷ ବର୍ଷ ହେବ ମଦ ଦୋକାନୀମାନେ ଏମିତି କୋଟି କୋଟି ଟଙ୍କା ଖୋଲାଖୋଲି ଲୁଟ୍ କରୁଛନ୍ତି । ହେଲେ କାର୍ଯ୍ୟାନୁଷ୍ଠାନ ଗ୍ରହଣ କରୁନି ଅବକାରୀ ବିଭାଗ ।
ଅବକାରୀ କମିଶନର ଆଇପିଏସ୍ ନରସିଂହ ଭୋଳ କହିଛନ୍ତି, ଚଢ଼ା ଦରରେ ମଦ ବିକ୍ରି ହେଉଥିବା ଖବର ଆସୁଛି । ହେଲେ ସେମାନଙ୍କୁ ଧରି ପ୍ରମାଣିତ କରିବାକୁ ଆମ ପାଇଁ କଷ୍ଟକର ହେବ । ଖୁବ୍ ଶୀଘ୍ର ଆମେ ଆଉ ଏକ ବିଜ୍ଞପ୍ତି ବାହାର କରିବୁ । ଚଢ଼ା ଦରରେ ମଦ ବିକ୍ରି କରୁଥିବା ଦୋକାନୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବୁ ।
ଏହି ଘଟଣାରେ ମଦ ଦୋକାନୀମାନେ କହିଛନ୍ତି, ସ୍ଥାନୀୟ ବିଧାୟକ, ଅବକାରୀ ବିଭାଗର ବିଭିନ୍ନ ପଦସ୍ଥ ଅଧିକାରୀ, ସ୍ଥାନୀୟ ଥାନା, ଏସ୍ଡିପିଓ ଅଫିସ୍କୁ ମାସିକିଆ ମୋଟା ଅଙ୍କର ଚାନ୍ଦା ଦେବାକୁ ପଡ଼ିୁଛି । ସେ ସବୁ ଚାନ୍ଦାର ଭରଣା ପାଇଁ ଗ୍ରାହକଙ୍କୁ ଏମିତି ଚଢ଼ା ଦରରେ ବିକ୍ରି କରିବାକୁ ପଡ଼ୁଛି । ଏଥିରୁ ଗୋଟିଏ କଥା ସ୍ପଷ୍ଟ ଯେ, ଚଢ଼ା ଦରରେ ବିକିବା ପଛରେ ଅବକାରୀ ବିଭାଗର ହାତ ରହିଛି ।