ଝାରସୁଗୁଡା, ୧୬/୦୭ : ଝାରସୁଗୁଡା ଜିଲ୍ଲାରୁ ସମ୍ବଲପୁର ଜିଲ୍ଲା ରେଙ୍ଗାଲିକୁ ସଂଯୋଗ କରୁଥିବା ରମ୍ପେଲା ସେତୁରେ ସୋମବାର ରାତିରେ ଗୁଳିକାଣ୍ଡ। ଏଥିରେ ଝାରସୁଗୁଡା ଜିଲ୍ଲା ବନ୍ଧବାହାଲର ମନୋଜ ବାରିକ ଆହତ ହୋଇଛନ୍ତି। ଅଭିଯୁକ୍ତ ବନ୍ଧବାହାଲର ଏମଡି ସୋନୁ ଏବଂ ସହଯୋଗୀ ଅଶ୍ୱିନୀ ରଣାଙ୍କୁ ବନହରପାଲି ପୋଲିସ ଗିରଫ କରିଛି। ଅଭିଯୁକ୍ତମାନଙ୍କ ନିକଟରୁ ଗୋଟିଏ ଦେଶୀ ବନ୍ଧୁକ, ଗୋଟିଏ ୯ ଏମଏମ୍ ପିସ୍ତଲ ଏବଂ ୧୫ଟି ଜୀବନ୍ତ ଗୁଳି ପୋଲିସ ଜବତ କରିଛି। 

ସୂଚନାନୁଯାୟୀ, ବନ୍ଧବାହାଲ ଅଞ୍ଚଳର ମନୋଜ, ଏମଡିସୋନୁ, ଶିବ ସାଗର ଓ କିଛି ସାଙ୍ଗ ମିଶି ସମ୍ବଲପୁରକୁ ବରଯାତ୍ରୀ ଯାଇଥିଲେ। ଏମଡି ସୋନୁଙ୍କଠୁ ଶିବ ସାଗର କିଛି ଟଙ୍କା ପୂର୍ବରୁ ଧାର ନେଇଥିଲେ। ଏମଡି ସୋନୁ ଶିବ ସାଗରଙ୍କୁ ନିଜ ଟଙ୍କା ଫେରସ୍ତ ମାଗିବା ସହ ଟଙ୍କା ନଦେଲେ ଗୁଳି କରିଦେବାକୁ ଧମକ ଦେଇଥିଲେ। ଏହି ସମୟରେ ମନୋଜ ବାରିକ ଏମଡି ସୋନୁଙ୍କୁ ବୁଝାସୁଝା କରିବାରୁ ଏଥିରେ ଏମଡି ସୋନୁ ଉତ୍ୟକ୍ତ ହୋଇଯାଇଥିଲା। ଏମଡି ସୋନୁ ଏବଂ ତାଙ୍କ ସହଯୋଗୀ ଅଶ୍ୱିନୀ ରାଣା ମନୋଜଙ୍କ ଉପରକୁ ଗୁଳି ଚଳାଇ ଫେରାର ମାରିଥିଲେ। ଆହତ ମନୋଜଙ୍କୁ ବୁର୍ଲା ମେଡିକାଲରେ ଭର୍ତି କରାଯାଇଥିବା ବେଳେ ବନହରପାଲି ପୋଲିସ ଘଟଣାର ତଦନ୍ତ କରିବାସହ ଅଭିଯୁକ୍ତମାନଙ୍କୁ ଗିରଫ କରିଛି।