ବେତନଟୀ,୨୭ା୩(ଆପ୍ର): ରାଜ୍ୟରେ ଡବଲ ଇଞ୍ଜିର ସରକାର ଆସୁଆସୁ ଧାନର ସର୍ବନିମ୍ନ ସହାୟକ ମୂଲ୍ୟରେ ବୃଦ୍ଧି ସାଙ୍ଗକୁ ଇନପୁଟ ସବସିଡି ସହାୟତା ରାଶି ପ୍ରଦାନ ପରେ ବର୍ତ୍ତମାନ ଧାନର ସରକାରୀ ମୂଲ୍ୟ କୁଇଣ୍ଟାଲ ପିଛା ୩୧ଶହ ଟଙ୍କାରେ ପହଞ୍ଚିଛି । ତେବେ ଧାନ କୁଇଣ୍ଟାଲ ପିଛା ୩୧ଶହ ଟଙ୍କାରେ ପହଞ୍ଚିବା ପରେ ବର୍ତ୍ତମାନ ଖରାଟିଆ ଧାନଚାଷ(ରବିଧାନ)କୁ ନେଇ ଚାଷୀଙ୍କ ମଧ୍ୟରେ ବେଶ୍ ଆଗ୍ରହ ଦେଖିବାକୁ ମିଳିଥିବା ବେଳେ ବିଗତବର୍ଷ ତୁଳନାରେ ବେତନଟୀ ବ୍ଲକରେ ଏବେ ଖରାଟିଆ ଧାନଚାଷ ପ୍ରତି ଚାଷୀଙ୍କ ଆଗ୍ରହ ଆଶାତୀତ ଭାବରେ ବଢିଥିବାର ଦେଖିବାକୁ ମିଳିଛି ।
ମାତ୍ର ଖରାଟିଆ(ରବିଧାନ)ଚାଷ କରୁଥିବା ଚାଷୀମାନେ ମଣ୍ଡିରେ ଧାନବିକ୍ରୟ ପାଇଁ ସରକାରଙ୍କ ପକ୍ଷରୁ ଯେଉଁ ମାନଦଣ୍ଡ ନିର୍ଦ୍ଧାରଣ କରାଯାଇଛି ସେଥିରେ ଅଧିକାଂଶ ଚାଷୀ ବର୍ତ୍ତମାନ ନିଜର ନାମ ପଞ୍ଜୀକରଣ ପ୍ରକ୍ରିୟାରୁ ବାଦ ପଡିବେ । ସରକାରଙ୍କ ନିର୍ଦେଶ ମୁତାବକ ରବି ଧାନ (ଖରାଟିଆ)ଚାଷ କରୁଥିବା ଚାଷୀମାନେ ମଣ୍ଡିରେ ଧାନବିକ୍ରୟ ପାଇଁ ଅନଲାଇନ ପଞ୍ଜୀକରଣ ସମୟରେ ଉଠାଜଳସେଚନ ପ୍ରକଳ୍ପର ବିଦ୍ୟୁତ୍ ବିଲ୍ର ଉପଭୋକ୍ତା ନମ୍ବର ନଚେତ କୃଷିଭିତ୍ତିକ ବୋରୱେଲ ସହିତ ଜଡିତ ବିଦ୍ୟୁତ ସଂଯୋଗର ଉପଭୋକ୍ତା ନମ୍ବର ନଚେତ ବିଭିନ୍ନ କେନାଲରୁ ପାଣି ମଡାଇ ଯଦି ଚାଷ କରିଥାନ୍ତି ତାହେଲେ କ୍ଷୁଦ୍ର ଜଳସେଚନ ବିଭାଗର ଅଧିକାରୀଙ୍କ ଚିଠି ଦାଖଲ କଲେ ଯାଇ ହିଁ ଖରାଟିଆ ଧାନଚାଷ କରିଥିବା ଚାଷୀ ଟିଏ ମଣ୍ଡିରେ ଧାନବିକ୍ରିୟ ପାଇଁ ନିଜର ନାମ ପଞ୍ଜୀକରଣ କରିପାରିବ । ନଚେତ ଯଦି ଧାନ କୁଇଣ୍ଟାଲପିଛା ୩୧ଶହ ଟଙ୍କାରେ ବିକ୍ରି କରିବା ଆଶାରେ କୈାଣସି ଚାଷୀ ନଦୀ,ନାଳ କିମ୍ବା ଗଡିଆ, ପୋଖରୀ ଭଳି ଜଳାଶୟରୁ ପାଣିମଡାଇ ଚାଷ କରିଥିବ ତା’ହେଲେ ସମ୍ପୃକ୍ତ ଚାଷୀ କୈାଣସି ପ୍ରକାରେ ନିଜର ନାମ ଅନଲାଇନ ପ୍ରକ୍ରିୟାରେ ପଞ୍ଜୀକରଣ କରିପାରିବ ନାହିଁ ।
ଖରାଟିଆ ଧାନଚାଷକୁ ନେଇ ସରକାରଙ୍କ ଏଭଳି ଅଜବ ନିୟମ ବାବଦରେ ଅଜ୍ଞ ବେତନଟୀ ବ୍ଲକର ଏକାଧିକ ଚାଷୀ କୁଇଣ୍ଟାଲ ପିଛା ୩୧ଶହ ଟଙ୍କାରେ ଧାନ ବିକ୍ରି କରିବା ଆଶାରେ ଚାଷକରି ଏବେ ହତାଶ ହୋଇପଡିଛନ୍ତି ।ତେବେ ମଣ୍ଡିରେ ଧାନବିକ୍ରି ପାଇଁ ସରକାରଙ୍କ ପକ୍ଷରୁ ସତ୍ୟାସତ୍ୟ ଯାଞ୍ଚ କରିବାକୁ ସମ୍ପୃକ୍ତ ଜମିର ସାଟେଲାଇଟ ସର୍ଭେ କରାଯାଉଥିବା ବେଳେ ସେଥିରୁ ଚାଷୀଟି ପ୍ରକୃତରେ ଚାଷ କରିଛି କି ନାହିଁ ସ୍ପଷ୍ଟ ପ୍ରମାଣି ମିଳିଯାଉଛି ା ଏପଟେ ଖରାଟିଆ ଧାନଚାଷ ସମୟରେ ପାଣି ମଡାଇବା ପାଇଁ ବ୍ୟବହୃତ ବିଦ୍ୟୁତ ସଂଯୋଗର ଉପଭୋକ୍ତା କ୍ରମିକ ନମ୍ବର ଦାଖଲକୁ ବାଧ୍ୟତାମୂଳ କରାଯାଇଛି । ଖରାଟିଆ ଧାନଚାଷକୁ ନେଇ ସରକାରଙ୍କ ଏଭଳି ଅଜବ ନିୟମ ପାଇଁ ବର୍ତ୍ତମାନ ବେତନଟୀ ବ୍ଲକର ଏକାଧିକ ଚାଷୀ ନିଜର ନାମ ପଞ୍ଜୀକରଣ କରାଇବାରୁ ବାଦ୍ ପଡିଛନ୍ତି । ଯାହାକୁ ନେଇ ଚାଷୀମାନଙ୍କ ମଧ୍ୟରେ ତୀବ୍ର ଅସନ୍ତୋଷ ବଢିବାରେ ଲାଗିଛି । ଏନେଇ ମୟୂରଭଞ୍ଜ ଜିଲ୍ଲା ଡିଆରସିଏସ କୃଷ୍ଣଚନ୍ଦ୍ର ଦାଶଙ୍କୁ ଯୋଗାଯୋଗ କରିବାରୁ ସରକାରୀ ନିର୍ଦେଶାବଳୀ ମୁତାବକ ଖରାଟିଆ ଧାନଚାଷ କରିଥିବା ଚାଷୀମାନଙ୍କର ନାମ ଅନଲାଇନ ପଞ୍ଜୀକରଣ କରାଯାଇଥିବା କହିଛନ୍ତି ।
