ନୂଆଦିଲ୍ଲୀ: ଆମେରିକା ଆକାଶରେ ଦେଖାଯାଉଥିବା ‘ଅଜଣା ଉଡ଼ନ୍ତା ବସ୍ତୁ’ ବା ୟୁଏଫୟୁ ଏଲିୟନଙ୍କ ସ୍ପେସ୍କ୍ରାଫ୍ଟ ନୁହେଁ ବୋଲି କହିଛନ୍ତି ସ୍ପେଶ୍ ଏକ୍ସର ସିଇଓ ଏଲନ ମସ୍କ । ଟକର କାର୍ଲସନ୍ଙ୍କ ସହ ସାକ୍ଷାତକାର ସମୟରେ ମସ୍କ ଅଭିଯୋଗ କରିଛନ୍ତି ଯେ, ଲୋକେ ଯେଉଁ ୟୁଏଫକୁ ଦେଖିଛନ୍ତି ବୋଲି ଦାବି କରୁଛନ୍ତି ତାହା ସମ୍ଭବତଃ ଆମେରିକା ସରକାରଙ୍କ ଦ୍ବାରା କରାଯାଉଥିବା ନୂଆ ଯୁଦ୍ଧାସ୍ତ୍ର କାର୍ଯ୍ୟକ୍ରମ । ବିଭିନ୍ନ ମହାକାଶ ଅଭିଯାନ କରୁଥିବା ସେସ୍ଏକ୍ସର ମାଲିକ ହୋଇଥିବା ବେଳେ ସେ କେବେ ବି ଏଲିୟନ ଥିବା ନେଇ କୌଣସି ପ୍ରମାଣ ପାଇନାହାନ୍ତି ବୋଲି ମସ୍କ କହିଛନ୍ତି । କିନ୍ତୁ ବ୍ରହ୍ମାଣ୍ଡରେ ଏମିତି କିଛି କଥା ରହିଛି ସେ ସଂପର୍କରେ କାହାକୁ ଜଣାନାହିଁ ବୋଲି କହିଛନ୍ତି ମସ୍କ ।
ଏଲନ ମସ୍କ କାର୍ଲସନ୍ଙ୍କୁ ପଚାରିଛନ୍ତି, ‘ଆମେ କେଉଁଠୁ ଆସିଛନ୍ତି ? ଏଲିୟନ୍ସ କେଉଁଠି ଅଛନ୍ତି ?’ ମହାକାଶରେ ଥିବା ଉପଗ୍ରହର ଉଦାହରଣ ଦେଇ ସେ କହିଛନ୍ତି, ଏଲିୟନ୍ସର ଅସ୍ତିତ୍ବ ସମ୍ଭବ ନୁହେଁ । କକ୍ଷରେ ୬ ହଜାରରୁ ଅଧିକ ଉପଗ୍ରହ ରହିଛି କିନ୍ତୁ ଏଲିୟନ୍ସ ଥରେ ହେଲେ ବି ନିଜ ସ୍ପେସକ୍ରାଫ୍ଟରେ ବୁଲୁଥିବା ଦେଖିବାକୁ ମିଳିନାହିଁ । ୟୁଏଫଓକୁ ନେଇ ଆମେରିକୀୟ ସେନା ଦାବି କରିଆସିଛି କିନ୍ତୁ ଏନେଇ କାହିଁକି ବଳିଷ୍ଠ ପ୍ରମାଣ ଦେଇପାରୁନି ବୋଲି ପ୍ରଶ୍ନରେ ମସ୍କ କହିଛନ୍ତି, ଅଜଣା ଉଡ଼ନ୍ତା ବସ୍ତୁ ଗୋଟିଏ କଥା ହୋଇପାରେ କିନ୍ତୁ ଅନେକ ସମୟରେ ବିଭିନ୍ନ ପରୀକ୍ଷଣ କରାଯାଉଛି ।
ଆମେରିକା ସରକାର ନୂଆ ବିମାନ, ନୂଆ ମିସାଇଲ୍ ଏବଂ ନୂଆ ବସ୍ତୁର ପରୀକ୍ଷଣ କରୁଛନ୍ତି । ଏହି ସବୁ ପରୀକ୍ଷଣ ଏତେ ଗୁପ୍ତ ଉପାୟରେ କରାଯାଉଛି ଯେ, ଆମେରିକୀୟ ସେନାର ଶୀର୍ଷ ଅଧିକାରୀଙ୍କୁ ମଧ୍ୟ ଜଣାନଥାଏ ବୋଲି ମସ୍କ ଦାବି କରିଛନ୍ତି । ମସ୍କ ଆହୁରି କହିଛନ୍ତି ଯେ, କିଛି ପାଇଲଟ୍ ତାଙ୍କ ଆଗରେ କିଛି ଜିନିଷ ଦ୍ରୁତ ଗତିରେ ଗତି କରୁଥିବା ଦେଖିଲେ ସେମାନେ କହୁଛନ୍ତି ଆମେ ୟୁଏଫଓ ଦେଖିଲୁ । କିନ୍ତୁ ଏହା ଏକ ନୂତନ ଯୁଦ୍ଧାସ୍ତ୍ର ପରୀକ୍ଷଣ ହୋଇପାରେ ।
ସେପଟେ ଯଦି ଭବିଷ୍ୟତରେ ଏଲିୟନ ସଂପର୍କରେ କିଛି ପ୍ରମାଣ ମିଳେ ତେବେ ଲୋକଙ୍କୁ ଏନେଇ ବିସ୍ତୃତ୍ବ ଭାବରେ ସୂଚନା ଦେବେ ବୋଲି ମସ୍କ କହିଛନ୍ତି । ଏହା ପୂର୍ବରୁ ୨୦୨୩ରେ ଏଲିୟନର ଉପସ୍ଥିତି ନେଇ ଆଶାବ୍ୟକ୍ତ କରିଥିଲେ ଏଲନ ମସ୍କ । ତେବେ ନିକଟ ଅତୀତରେ ଆମେରିକା ଅନେକ ୟୁଏଫଓ ଦେଖାଯାଇଥିବା ନେଇ ଦାବି କରିଥିଲା । କିନ୍ତୁ ଏଥିରେ ବାହାର ଗ୍ରହର ଜୀବ କିମ୍ବା ଏଲିୟନ୍ ଥିବା ନେଇ କୌଣସି ପ୍ରମାଣ ଦେଇପାରି ନଥିଲା ।
