ବାରଙ୍ଗ,୨୧/୦୯: ନନ୍ଦନକାନନ ପ୍ରାଣୀ ଉଦ୍ୟାନ ଚିକତ୍ସାଳୟ ନିକଟ ହାତୀ ଶାଳରେ ରହୁଥିବା ୧୭ ମାସର ହାତୀ ଶାବକ ‘ଅଭି’ ଅସୁସ୍ଥ ହୋଇପଡ଼ିଛି । ଦେହର ତାପମାତ୍ରା ବଢ଼ିବା ସହିତ ଥୋଡ଼ପାହୁଲରୁ ଲାଳ ଗଡ଼ୁଛି । ତେଣୁ ତାକୁ ହରପିସ୍ ଭୂତାଣୁ ସଂକ୍ରମଣ ହୋଇଥିବା ଅନୁମାନ କରି ପରୀକ୍ଷା କରାଯିବା ପରେ ହରପିସ୍ରେ ଆକ୍ରାନ୍ତ ଥିବା ଜଣାପଡିଛି । ଏନେଇ ନନ୍ଦନକାନନ କର୍ତ୍ତୃପକ୍ଷ ଚିନ୍ତାରେ ପଡ଼ିଯାଇଛନ୍ତି । ଶାବକଟି ଠିକ ଭାବରେ ଖାଦ୍ୟ ଗ୍ରହଣ କରୁନାହିଁ ।
ନନ୍ଦନକାନନ ପ୍ରାଣୀ ଚିକିତ୍ସକ ଏବଂ ଓୟୁଏଟିର ପ୍ରଫେସରଙ୍କ ତତ୍ତ୍ୱାବଧାନରେ ‘ଅଭି’ର ଚିକିତ୍ସା ଜାରୀ ରହିଛି । ଶାବକଟି ଉପରେ ୨୪ ଘଣ୍ଟା ନଜର ରଖିବା ପାଇଁ କର୍ତ୍ତୃପକ୍ଷ ନିର୍ଦ୍ଦେଶ ଦେଇଛନ୍ତି । କିଛି ଦିନ ପୂର୍ବରୁ ‘ଅଭି’ ଖାଦ୍ୟ ଖାଇବା କମାଇ ଦେଇଥିଲା । ପ୍ରାଣୀ ଚିକିତ୍ସକ ତାର ସ୍ୱାସ୍ଥ୍ୟ ପରିକ୍ଷା କରି ଔଷଧ ଦେଉଥିଲେ । ସ୍ୱାସ୍ଥ୍ୟରେ ପରିବର୍ତ୍ତନ ନହେବାରୁ ଆଜି ତାର ହରପିସ୍ ପରୀକ୍ଷା କରାଯାଇଥିଲା । ରିପୋର୍ଟ ପଜିଟିଭ ଆସିଥିଲା । ପ୍ରାଣୀ ଉଦ୍ୟାନର ଛୋଟ ହାତୀ ଲାଳନପାଳନ ଶାଳାରେ ଅଭି ସହ ‘ଲିସା’ ଓ ‘ଆଶା’ ରହୁଥିଲେ । ଅଗଷ୍ଟରେ ଉଭୟ ହରପିସ୍ରେ ସଂକ୍ରମିତ ହୋଇଥିଲେ । କିନ୍ତୁ ସେମାନେ ସୁସ୍ଥ ହୋଇଗଲେ । ବର୍ତ୍ତମାନ ଅଭିକୁ ହରପିସ୍ ହେବା ଚିନ୍ତାର କରଣ ସାଜିଛି ।
୨୫ ଜୁନ ୨୦୨୩ ରେ ୨ ମାସର ହୋଇଥିବା ବେଳେ କେନ୍ଦୁଝର ଘଟଗାଁରୁ ହାତୀ ଛୁଆ ‘ଅଭି’ ଊଦ୍ଧାର ହେଇ ପ୍ରାଣୀ ଉଦ୍ୟାନକୁ ଆସିଥିଲା। ହାତୀ ପଲ ଗାଁ ଅଭିମୁଖେ ଆସିଥିବା ବେଳେ ସକାଳେ ଜଙ୍ଗଲକୁ ଫେରିବା ବେଳେ ହାତୀ ଛୁଆଟି ଏକ ଗାତରେ ପଡ଼ିଯାଇଥିଲା। ଗ୍ରାମବାସୀ ତାକୁ ଉଦ୍ଧାର କରିଥିଲେ । ମଣିଷ ସଂସ୍ପର୍ଶରେ ଆସିବାରୁ ତା ମା’ ଗ୍ରହଣ ନକରିବାରୁ ତାକୁ ବନବିଭାଗ ଉଦ୍ଧାର କରି ନନ୍ଦନକାନନ ପଠାଇଥିଲେ ।
