କାଲିମେଳା,୨୨/୦୭: କାଲିମେଳା ବ୍ଲକରେ ଲଗାଣ ବର୍ଷା । ଗତ ୪ଦିନ ହେଲା ବର୍ଷା ଲାଗି ରହିଥିବା ଫଳରେ ଜନଜୀବନ ଅସ୍ତବ୍ୟସ୍ତ। ବିଭିନ୍ନ ଅସୁବିଧାର ସମ୍ମୁଖୀନ ହେଉଛନ୍ତି ସ୍ଥାନୀୟ ବାସିନ୍ଦା । ପାହାଡ ଧସିବାରୁ ଜାତୀୟ ରାଜପଥରେ ଯାନବାହାନ ଚଳାଚଳ ଠପ୍ ।                                                                                                                                     ସୂଚନା ଅନୁଯାୟୀ, ଗତ ୪ଦିନ ହେଲା କାଲିମେଳା ବ୍ଲକରେ ଲାଗି ରହିଛି ବର୍ଷା । ଫଳରେ ଲୋକେ ନାହିଁ ନଥିବା ଅସୁବିଧାର ସମୁଖୀନ ହେଉଛନ୍ତି । ପ୍ରବଳ ବର୍ଷାରେ ଗତ ଶନିବାର ରାତିରେ ସାନଟେକଗୁଡ଼ା ନିକଟରେ ଏକ ପାହାଡ଼ ଧସି ଯାଇଥିଲା । ଏହି କାରଣରୁ ୩ଦିନ ହେଲା ଜାତୀୟ ରାଜପଥ ବନ୍ଦ ହୋଇ ରହିଛି । ଯାନବାହନ ଚଳାଚଳ ବନ୍ଦ ହେତୁ କାଲିମେଳା ବ୍ଲକର ବଡ଼ିଗେଟା ଗ୍ରାମ ପଞ୍ଚାୟତ ସହିତ ଭେଜାଙ୍ଗିୱାଡା ଗ୍ରାମ ପଞ୍ଚାୟତ ଗାଁମାନଙ୍କ ସହିତ ଯୋଗାଯୋଗ ବିଛିନ୍ନ ହୋଇଛି । ମାରିଗେଟା, କୁରୁବ, ଟେକଗୁଡା, ଟେକଗୁଡା କଲୋନୀ, ଟେକଗୁଡା -ଏ, ଓ ଟେକଗୁଡ଼ା -ବି ଇତ୍ୟାଦି ବଡ଼ିଗେଟା ଗ୍ରାମ ପଞ୍ଚାୟତ ଗାଁମାନଙ୍କ ସହିତ ଭେଜାଙ୍ଗିୱାଡା ଗ୍ରାମ ପଞ୍ଚାୟତର ବଡ଼ିଲି କୁରକୁଣ୍ଡି, ଭେଜାଙ୍ଗିୱାଡା ପଞ୍ଚାୟତ ସହିତ ଯୋଗାଯୋଗ ବନ୍ଦ ରହିଛି।