ନୂଆଦିଲ୍ଲୀ,୧୫/୦୨: ଡୋନାଲ୍ଡ ଟ୍ରମ୍ପଙ୍କ କ୍ଷମତାକୁ ଫେରିବା ପରେ ସରକାରୀ କର୍ମଚାରୀଙ୍କ ଉପରେ ଅନେକ ପ୍ରଭାବ ପଡ଼ୁଛି। ସେ ଦ୍ବିତୀୟ ଥର ରାଷ୍ଟ୍ରପତି ହେବାର ଗୋଟିଏ ମାସ ନହେଉଣୁ ସେପଟେ ୯,୫୦୦ ରୁ ଅଧିକ ସରକାରୀ କର୍ମଚାରୀଙ୍କୁ ବହିଷ୍କାର କରାଯାଇସାରିଛି। ସରକାରୀ ଖର୍ଚ୍ଚ ହ୍ରାସ କରିବା ଲକ୍ଷ୍ୟରେ ଏହି ଅଭିଯାନ ଚାଲିଛି। ଭବିଷ୍ୟତରେ ମଧ୍ୟ ଶହ ଶହ ଲୋକ ଚାକିରି ହରାଇପାରନ୍ତି ବୋଲି ବିଶେଷଜ୍ଞମାନେ କହିଛନ୍ତି। 

କହିରଖୁଛୁ ଯେ, ଡୋନାଲ୍ଡ ଟ୍ରମ୍ପ ଦ୍ୱିତୀୟ ଥର ପାଇଁ ରାଷ୍ଟ୍ରପତି ହେବା ମାତ୍ରେ, ସେ ସ୍ପେସଏକ୍ସ ମାଲିକ ଏଲନ ମସ୍କଙ୍କୁ ସରକାରୀ ଦକ୍ଷତା ବିଭାଗର ମୁଖ୍ୟ ଭାବରେ ନିଯୁକ୍ତ କରିଥିଲେ। ଏହା ଏକ ପ୍ରକାରର ଅସ୍ଥାୟୀ ବିଭାଗ, ଯାହାକୁ ଟ୍ରମ୍ପ ସରକାରୀ ଖର୍ଚ୍ଚ ହ୍ରାସ କରିବା ଏବଂ ଉନ୍ନତ ପ୍ରଯୁକ୍ତିବିଦ୍ୟା ମାଧ୍ୟମରେ ସରକାରୀ କାର୍ଯ୍ୟର ଦକ୍ଷତା ଯଥାସମ୍ଭବ ବୃଦ୍ଧି କରିବା ଉଦ୍ଦେଶ୍ୟରେ ସୃଷ୍ଟି କରିଛନ୍ତି। ଏହି ବିଭାଗର ପରାମର୍ଶ କ୍ରମେ ବହୁ ସଂଖ୍ୟକ କେନ୍ଦ୍ରୀୟ କର୍ମଚାରୀଙ୍କୁ ଛଟେଇ କରାଯାଉଛି।

ଏପର୍ଯ୍ୟନ୍ତ, ଗୃହ, ଶକ୍ତି, ସୈନିକ, କୃଷି, ସ୍ୱାସ୍ଥ୍ୟ ଏବଂ ମାନବ ସେବା ବିଭାଗର କର୍ମଚାରୀମାନଙ୍କୁ ଛଟେଇ କରାଯାଇଛି। କିଛି ଏଜେନ୍ସିକୁ ମଧ୍ୟ ବନ୍ଦ କରିଦିଆଯାଇଛି, ଯେଉଁଥିରେ ସ୍ୱାଧୀନ ଗାର୍ଡ, କଞ୍ଜ୍ୟୁମର ଫାଇନାନ୍ସିଆଲ୍ ପ୍ରୋଟେକ୍ସନ୍ ବ୍ୟୁରୋ ମଧ୍ୟ ରହିଛି। ଟ୍ରମ୍ପ ପ୍ରଶାସନର ଏହି ଛଟେଇରେ ଠିକା କର୍ମଚାରୀଙ୍କୁ ମଧ୍ୟ ସାମିଲ କରାଯାଇଛି। ଟିକସ ସଂଗ୍ରହ ଏଜେନ୍ସି ଏବଂ ଆଭ୍ୟନ୍ତରୀଣ ରାଜସ୍ୱ ସେବା ମଧ୍ୟ ହଜାର ହଜାର କର୍ମଚାରୀଙ୍କୁ ଛଟେଇ କରିବାକୁ ପ୍ରସ୍ତୁତ ହେଉଛନ୍ତି।

ଆଗୁଆ ଇସ୍ତଫା ଦେଊଛନ୍ତି କର୍ମଚାରୀ: 

ରାଷ୍ଟ୍ରପତି ଟ୍ରମ୍ପ କହିଛନ୍ତି ଯେ ସଂଘୀୟ ସରକାର ଅତ୍ୟଧିକ ଋଣରେ ବୁଡ଼ି ରହିଛି। ଗତ ବର୍ଷ ୧.୮ ଟ୍ରିଲିୟନ ଡଲାର ନିଅଣ୍ଟ ଥିଲା ଏବଂ ମୋଟ ଋଣ ୩୬ ଟ୍ରିଲିୟନ ଡଲାର। ତାଙ୍କର ଧାରଣା ରହିଚି ଯେ, ଅନେକ ବିଭାଗରେ କେନ୍ଦ୍ରୀୟ କର୍ମଚାରୀଙ୍କ ସଂଖ୍ୟା ଅନାବଶ୍ୟକ ଭାବରେ ଅଧିକ ଏବଂ ଏହି ସଂଖ୍ୟାକୁ ହ୍ରାସ କରାଯିବା ଆବଶ୍ୟକ। 

ଜାନୁଆରୀ ମାସରେ ହିଁ ଟ୍ରମ୍ପ ପ୍ରଶାସନ ୨୦ ଲକ୍ଷରୁ ଅଧିକ ସରକାରୀ କର୍ମଚାରୀଙ୍କୁ ନୋଟିସ ପଠାଇଥିଲା। ଏଥିରେ ତାଙ୍କୁ ସ୍ୱେଚ୍ଛାକୃତ ଭାବରେ ଇସ୍ତଫା ଦେବାକୁ ପ୍ରସ୍ତାବ ଦିଆଯାଇଥିଲା, ପ୍ରତିବଦଳରେ ସରକାର ତାଙ୍କୁ ୮ ମାସର ଦରମା ଦେବେ। ଏଥି ସହିତ, ଟ୍ରମ୍ପ ପ୍ରଶାସନ ମଧ୍ୟ ଚେତାବନୀ ଦେଇଥିଲା ଯେ ଯେଉଁମାନେ ଏହି ପ୍ରସ୍ତାବକୁ ଗ୍ରହଣ କରିବେ ନାହିଁ ସେମାନଙ୍କ ପାଇଁ ଚାକିରିର କୌଣସି ଗ୍ୟାରେଣ୍ଟି ନାହିଁ। ଏପରି ପରିସ୍ଥିତିରେ, ଏପର୍ଯ୍ୟନ୍ତ ୭୫ ହଜାରରୁ ଅଧିକ ସରକାରୀ କର୍ମଚାରୀ ଏହି ବିକଳ୍ପକୁ ବାଛି ଚାକିରି ଛାଡ଼ି ସାରିଛନ୍ତି। ଏହା ମୋଟ ଆମେରିକୀୟ ସରକାରୀ କର୍ମଚାରୀଙ୍କ ପ୍ରାୟ ୩% ପ୍ରତିନିଧିତ୍ୱ କରେ। ଆମେରିକାରେ ୨୩ ଲକ୍ଷରୁ ଅଧିକ କେନ୍ଦ୍ରୀୟ କର୍ମଚାରୀ ଅଛନ୍ତି।