ନୂଆଦିଲ୍ଲୀ: ଟ୍ରମ୍ପ ସରକାର ଆମେରିକାରେ ବିଦେଶୀ ନାଗରିକଙ୍କ ପାଇଁ ଏକ ନୂତନ ନିୟମ ଲାଗୁ କରିଛନ୍ତି। ଏହି ନୂତନ ନିୟମ ଅନୁଯାୟୀ, ୩୦ ଦିନରୁ ଅଧିକ ସମୟ ପାଇଁ ଆମେରିକାରେ ରହୁଥିବା ବିଦେଶୀ ନାଗରିକ ମାନଙ୍କୁ ନିଜକୁ ପଞ୍ଜୀକୃତ କରିବାକୁ ପଡିବ। ଯଦି ସେମାନେ ଏହା କରିବାରେ ବିଫଳ ହୁଅନ୍ତି, ତେବେ ସେମାନଙ୍କୁ ଜରିମାନା ହୋଇପାରେ କିମ୍ବା ଜେଲ ମଧ୍ୟ ଯିବାକୁ ପଡ଼ିପାରେ। ଏହା ସହିତ, ସେମାନଙ୍କୁ ଦେଶରୁ ନିର୍ବାସିତ ମଧ୍ୟ କରାଯାଇ ପାରିବ।
ହୋମ୍ଲ୍ୟାଣ୍ଡ୍ ସୁରକ୍ଷା ବିଭାଗ ଏକ ନୂତନ ନିର୍ଦ୍ଦେଶ ଜାରି କରିଛି, ଯାହା ଅନୁଯାୟୀ ୩୦ ଦିନରୁ ଅଧିକ ସମୟ ପାଇଁ ଆମେରିକାରେ ରହୁଥିବା ବିଦେଶୀ ନାଗରିକ ମାନଙ୍କୁ ସଂଘୀୟ ସରକାରଙ୍କ ବା ଫେଡେରାଲ୍ ଗଭର୍ଣ୍ଣମେଣ୍ଟ ନିକଟରେ ନିଜକୁ ପଞ୍ଜୀକୃତ କରିବାକୁ ପଡିବ। ଏପରି ନ କଲେ ତାହାକୁ ଅପରାଧ ବୋଲି ବିବେଚନା କରାଯିବ। ଟ୍ରମ୍ପ ରାଷ୍ଟ୍ରପତି ହେବା ପରଠାରୁ, ସରକାର ଆମେରିକାରେ ଅବୈଧ ଭାବରେ ରହୁଥିବା ଲୋକଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିଆସୁଛନ୍ତି।
ହୋମଲ୍ୟାଣ୍ଡ ସିକ୍ୟୁରିଟି ଅନୁଯାୟୀ, ରାଷ୍ଟ୍ରପତି ଟ୍ରମ୍ପଙ୍କ ସ୍ପଷ୍ଟ ନିର୍ଦ୍ଦେଶ ହେଉଛି ଯେ, ଯେଉଁମାନେ ଆମେରିକାରେ ଅବୈଧ ଭାବରେ ରହୁଛନ୍ତି ସେମାନେ ନିଜେ ଦେଶ ଛାଡି ଚାଲିଯାଆନ୍ତୁ କିମ୍ବା ନିଜକୁ ନିର୍ବାସିତ କରନ୍ତୁ। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ଆମେରିକା ଗୃହ ସୁରକ୍ଷା ସଚିବ କ୍ରିଷ୍ଟି ନୋଏମଙ୍କୁ ଟ୍ୟାଗ୍ କରି ହୋମଲ୍ୟାଣ୍ଡ ସିକ୍ୟୁରିଟି X ରେ ପୋଷ୍ଟ କରିଛି । ସେ ଲେଖିଛନ୍ତି ଯେ ଯଦି ଆପଣ ଚୂଡ଼ାନ୍ତ ନିର୍ବାସନ ଆଦେଶ ପାଇଛନ୍ତି ଏବଂ ତା'ପରେ ମଧ୍ୟ ଆପଣ ଆମେରିକା ଛାଡ଼ନ୍ତି ନାହିଁ, ତେବେ ଆପଣଙ୍କୁ ପ୍ରତିଦିନ ୯୯୮ ଡଲାର ଜରିମାନା ଦେବାକୁ ପଡିବ। ଆମେରିକାରୁ ନିଜକୁ ନିର୍ବାସନ ନଦେଲେ ୧୦୦୦ ଡଲାରରୁ ୫୦୦୦ ଡଲାର ପର୍ଯ୍ୟନ୍ତ ଜରିମାନା କିମ୍ବା ଜେଲଦଣ୍ଡ ମଧ୍ୟ ହୋଇପାରେ।
ସୂଚନାଥାଉକି, ଟ୍ରମ୍ପ ସରକାରଙ୍କ ଏହି ନିଷ୍ପତ୍ତି ସିଧାସଳଖ ସେମାନଙ୍କୁ ପ୍ରଭାବିତ କରିବ ନାହିଁ ଯେଉଁମାନେ H-1B କିମ୍ବା ଛାତ୍ର ପରମିଟ୍ ଭଳି ଭିସାରେ ଆମେରିକାରେ ରହୁଛନ୍ତି। ଏହା ବ୍ୟତୀତ, ଏହି ନିୟମ ଅନ୍ୟ ବିଦେଶୀ ନାଗରିକଙ୍କ ଉପରେ ପ୍ରଯୁଜ୍ୟ ହେବ। ଯେତେବେଳେ H-1B ଭିସା ଥିବା ଜଣେ ବ୍ୟକ୍ତି ତାଙ୍କ ଚାକିରି ହରାଇବେ କିନ୍ତୁ ନିର୍ଦ୍ଧାରିତ ସମୟ ମଧ୍ୟରେ ଦେଶ ଛାଡିବେ ନାହିଁ, ତେବେ ତାଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ହୋଇପାରେ। ଏହି ନିୟମ ଯୋଗୁଁ, ଏବେ ଛାତ୍ର ଏବଂ H-1B ଭିସା ଧାରକ ମାନଙ୍କୁ ସମୟ ମଧ୍ୟରେ କାଗଜପତ୍ର ପୂରଣ କରିବାକୁ ପଡିବ।
