ସମ୍ବଲପୁର, ୧୨/୯ : ସମ୍ବଲପୁର ଜିଲ୍ଲାସ୍ତରୀୟ ସଂସ୍କୃତ ଦିବସ ସମ୍ବଲପୁରସ୍ଥିତ ସାଂସ୍କୃତିକ ସମାଜ ଭବନରେ ଅନୁଷ୍ଠିତ ହୋଇଯାଇଛି । ଜିଲ୍ଲା ସଂସ୍କୃତ ଶିକ୍ଷକ ମହାସଂଘର ସଭାପତି ସୁଶୀଳ କୁମାର ମହାକୁଳଙ୍କ ସଭାପତିତ୍ବରେ ସଂସ୍କୃତ ଦିବସ ଅନୁଷ୍ଠିତ ହୋଇଥିଲା । ମୁଖ୍ୟ ଅତିଥି ଭାବେ ଜିଲ୍ଲା ଶିକ୍ଷାଧିକାରୀ ମିନାରାଣୀ ମଙ୍ଗଳ ଯୋଗଦେଇ ସଂସ୍କୃତ ଭାଷାର ପ୍ରଚାର ପ୍ରସାର ଏବଂ ଭାଷା ପ୍ରତି କିପରି ସମସ୍ତଙ୍କର ଆଗ୍ରହ ହେବ ସେଥିପ୍ରତି ଦୃଷ୍ଟି ଦେବାକୁ ସମସ୍ତ ଶିକ୍ଷକଶିକ୍ଷୟିତ୍ରୀଙ୍କୁ ଉଦବୋଧନ ଦେଇଥିଲେ । ମୁଖ୍ୟବକ୍ତା ଭାବେ ପୁରୀ ଶ୍ରୀବିହାର ଶ୍ରୀ ଜଗନ୍ନାଥ ସଂସ୍କୃତ ବିଶ୍ବ ବିଦ୍ୟାଳୟର ପ୍ରିୟବ୍ରତ ମିଶ୍ର ଯୋଗଦେଇ ସଂସ୍କୃତ ଭାଷା କେବଳ ଏକ ଭାଷା ନୁହେଁ ବରଂ ସମସ୍ତ ଭାଷାମାନଙ୍କର ମା’ ବୋଲି କହିଥିଲେ । ଏହାସହ କାହିଁକି ଦ୍ବିତୀୟ ଭାଷାର ମାନ୍ୟତା ପାଇବ ନାହିଁ ବୋଲି ‌ସେ ଯୁକ୍ତି ଉପସ୍ଥାପନ କରିଥିଲେ । 

ସମ୍ମାନୀତ ଅତିଥି ଭାବେ ରାଉରକେଲା ବେଦବ୍ୟାସ ଗୁରୁକୁଳ ସଂସ୍କୃତ ମହାବିଦ୍ୟାଳୟର ଅବସରପ୍ରାପ୍ତ ଅଧ୍ୟକ୍ଷ ଶ୍ରୀ ନିବାସ ପାଠୀ ଶର୍ମା , ଡ. ଅକ୍ଷୟ କୁମାର ଦାଶ, ମୁରଲି ଧର ବେହେରା, ଜୟଶ୍ରୀ ଦୋରା, ହରିନାରାୟଣ ପଣ୍ଡା ପ୍ରମୁଖ ଯୋଗଦେଇ ସମାଜରେ ସଂସ୍କୃତର ଉପାଦେୟତା, ସଂସ୍କୃତ ବିନା ସଂସ୍କୃତି ପଙ୍ଗୁ ବୋଲି କହି ସଂସ୍କୃତର ମହନୀୟତା ପ୍ରକାଶ କରିଥିଲେ । ଶେଷରେ ସମ୍ପାଦକ ଦେବରାଜ ରଥ ବିବରଣୀ ପାଠ କରିଥିବାବେଳେ ଅସୀତ ପଣ୍ଡା ସଭା ପରିଚାଳନା କରିଥିଲେ । ଏହି ଅବସରରେ ଜିଲ୍ଲାର ସମସ୍ତ ସଂସ୍କୃତ ଶିକ୍ଷକଶିକ୍ଷୟିତ୍ରୀ ଯୋଗଦେଇଥିଲେ ।