କେନ୍ଦୁଝର ସଦର,୧୨/୯ : କେନ୍ଦୁଝର ଜିଲ୍ଲା ସଦର ଥାନା ଅନ୍ତର୍ଗତ ୨୦ନମ୍ବର ଜାତୀୟ ରାଜପଥ ପଳାଶପଙ୍ଗା ନିକଟରେ ଟ୍ରକ୍ ସ୍କୁଟି ମଧ୍ୟରେ ଧକ୍କା ହୋଇଛି । ଫଳରେ ସ୍କୁଟି ଚଳାଉଥିବା ମହିଳା ଗୁରୁତର ଆହତ ହୋଇଛନ୍ତି।  ଗୁରୁତର ମହିଳା ଜଣଙ୍କ କେନ୍ଦୁଝର ଜିଲ୍ଲା ସଦର ନିର୍ବାଚନୀ ମଣ୍ଡଳୀ ୪ନମ୍ବର ଜୋନର ଜିଲ୍ଲା ପରିଷଦ ସଦସ୍ୟା ଲୀଳାବତୀ ମହାନ୍ତ ବୋଲି ଜଣାପଡ଼ିଛି । 

ପ୍ରକାଶ ଯେ, ଲୀଳାବତୀ ଆଜି ସନ୍ଧ୍ୟାରେ କୌଣସି କାମ ନେଇ ଝୁମ୍ପୁରା ଯାଉଥିଲେ । ଏହି ସମୟରେ ସେ ଘରକୁ ଫେରିବାବେଳେ ଦୁର୍ଘଟଣା ଗ୍ରସ୍ତ ହୋଇଛନ୍ତି । ସ୍ଥାନୀୟ ଲୋକମାନେ ଲୀଳାବତୀଙ୍କୁ ପ୍ରଥମେ ଝୁମ୍ପୁରା ଗୋଷ୍ଠି ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ସେଠାରେ ପ୍ରାଥମିକ ଚିକିତ୍ସା କରାଯାଇଥିଲେ ହେଁ ସ୍ବାସ୍ଥ୍ୟବସ୍ଥା ଗୁରୁତର ଥିବାରୁ ତାଙ୍କୁ କେନ୍ଦୁଝର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ଲୀଳାବତୀଙ୍କ ପେଟ ତଳକୁ କଟିଯାଇଥିବାବେଳେ ଜଙ୍ଘରେ ମଧ୍ୟ ଗଭୀର ଆଘାତ ଲାଗିଛି।