ସାଲେପୁର,୨୫/୦୭: ଶବଦାହ କରିବା ପାଇଁ ମଶାଣୀ ଅଛି ହେଲେ ରାସ୍ତା ନାହିଁ। କାଗଜ କଲମରେ ଅଟକିଛି ସରକାରଙ୍କର ମାଳମାଳ ଯୋଜନା । ଶବଦାହ ପାଇଁ ମଶାଣୀକୁ ରାସ୍ତା ନଥିବାରୁ ରାସ୍ତା ନିର୍ମାଣ କଲେ ଗ୍ରାମବାସୀ । କଟକ ଜିଲ୍ଲା ସାଲେପୁର ବ୍ଲକ ସିଢ଼ୋ ପଞ୍ଚାୟତ ଖଇରା ଗ୍ରାମରେ ଏଭଳି ଦୃଶ୍ୟ ଦେଖିବାକୁ ମିଳିଛି।
ସୂଚନା ଅନୁଯାୟୀ, ସାଲେପୁର ବ୍ଲକ ଖଇରା ଗ୍ରାମରେ ମଶାଣୀକୁ ଭଲ ରାସ୍ତା ନଥିବାରୁ ଶବଦାହ ପାଇଁ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ବର୍ଷା ଦିନେ ବେକେ ପାଣିରେ ପଶି ଶବଦାହ କରିବାକୁ ନେବାକୁ ପଡୁଛି। ବାରମ୍ବାର ସ୍ଥାନୀୟ ବିଧାୟକ ପ୍ରଶାସନକୁ ଅଭିଯୋଗ କରିବା ସତ୍ତ୍ୱେ ମଶାଣୀକୁ ରାସ୍ତା ଖଣ୍ଡେ ହୋଇପାରିଲା ନାହିଁ । ଏହି ସମସ୍ୟା ସମ୍ପର୍କରେ ବର୍ଷବର୍ଷ ଧରି ପ୍ରଶାସନ, ଜନପ୍ରତିନିଧି, ନେତା-ମନ୍ତ୍ରୀଙ୍କୁ ବାରମ୍ବାର ଅବଗତ କରାଇଥିଲେ ମଧ୍ୟ କୌଣସି ସୁଫଳ ମିଳିନଥିଲା । ଶେଷରେ ଗ୍ରାମବାସୀ ଅତିଷ୍ଠ ହୋଇ ନିଜସ୍ୱ ଅର୍ଥରେ ରାସ୍ତା ତିଆରି କରିଛନ୍ତି। ପାଖାପାଖି ୮୦୦ ମିଟରରୁ ଉର୍ଦ୍ଧ୍ଵ ରାସ୍ତାକୁ ଗ୍ରାମବାସୀମାନେ ନିଜେ ଶ୍ରମଦାନ ସହ ନିଜସ୍ୱ ଅର୍ଥରେ ତିଆରି କରିଛନ୍ତି।