ଜଗତସିଂହପୁର,୩୦ା୩(ଆପ୍ର): ସରକାରୀ ଜମି ଜବରଦଖଲ ହୋଇଚାଲୁଛି । ଉଚ୍ଛେଦ ସତ୍ତ୍ୱେ ପୁଣି ଉକ୍ତ ଜମିକୁ ମାଡ଼ି ବସୁଛନ୍ତି ଜବରଦଖଲକାରୀ । ଶେଷରେ ପ୍ରଶାସନିକ ଅଧିକାରୀମାନେ ଅନ୍ୟ ଉପାୟ ନପାଇ ଉପରକୁ ହାତ ଟେକି ଦେଇ ପୁଲିସର ସହାୟତା ଲୋଡ଼ିବା ଆଶ୍ଚର୍ଯ୍ୟର ବିଷୟ ହୋଇଛି । କାରଣ ସରକାରୀ ଜମିର ସୁରକ୍ଷା ନେଇ ରାଜ୍ୟ ସରକାର ଲକ୍ଷ ଲକ୍ଷ ଟଙ୍କା ମଞ୍ଜୁର କରୁଛନ୍ତି । ଜିଲ୍ଲା କ୍ଷେତ୍ରରେ ଅର୍ଥ ରାଶି ପଡ଼ୁରହୁଥିବା ବେଳେ ସରକାରୀ ଜମିକୁ ଆବଦ୍ଧ ରଖିବାକୁ ପ୍ରଶାସନ ପକ୍ଷରୁ ତତ୍ପରତା ଦୂରର କଥା ସାମାନ୍ୟତମ ସମୀକ୍ଷା କରାଯାଉଥିବା ମନେ ହେଉନାହିଁ । ଫଳରେ ଜବରଦଖଲ ଉଚ୍ଛେଦ ଲୋକଦେଖାଣିଆ ହୋଇପଡ଼ିଛି ।
ଗତ ୨୪ ତାରିଖରେ କୁଜଙ୍ଗ ତହସିଲ ପକ୍ଷରୁ ଜବରଦଖଲକୁ ନେଇ ପାରାଦୀପ ଲକ୍ ଥାନାରେ ଏତଲା ଦିଆଯାଇଛି । ଅଭିଯୋଗ ମୁତାବକ, ଉଦୟବଟ ଗ୍ରାମର ପ୍ଲଟ ନଂ ୧୪୭୦ ଓ ଖାତା ନମ୍ବର ୮୮୮ରେ ୧ ଏକର ୩୦ ଡିସିମିଲ ଝାଟି ଜଙ୍ଗଲ କିସମ ସରକାରୀ ଜାଗା ରହିଛି । ତେବେ ପିପଳ ଗ୍ରାମର ଜଣେ ବ୍ୟକ୍ତି ଝାଟି ଜଙ୍ଗଲ କିସମ ଜମିକୁ ଜବରଦଖଲ କରିଛନ୍ତି । ଜବରଦଖଲକୁ ନେଇ ଗ୍ରାମବାସୀମାନେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ୨୦୨୩ ମସିହା ମେ’ ମାସ ୧୭ରେ ପୁଲିସ ସହାୟତାରେ ତହସିଲ ପକ୍ଷରୁ ଉକ୍ତ ଜବରଦଖଲକୁ ଉଚ୍ଛେଦ କରାଯାଇଥିଲା । ଏବେ କିନ୍ତୁ ଉକ୍ତ ଝାଟି ଜଙ୍ଗଲ କିସମ ଜମିକୁ ସେଇ ବ୍ୟକ୍ତି ପୁଣି କବ୍ଜା କରି ନେଇଛନ୍ତି । ଏପରିକି ସେଠାରେ ଏକ ଘର ନିର୍ମାଣ କରିଛନ୍ତି । ପାରାଦୀପଗଡ଼ ରାଜସ୍ୱ ନିରୀକ୍ଷକଙ୍କ ରିପୋର୍ଟ ପାଇବା ପରେ ତହସିଲ ତରଫରୁ ଜବରଦଖଲ ସଂକ୍ରାନ୍ତରେ ପାରାଦୀପ ଲକ୍ ଥାନାର ଦୃଷ୍ଟି ଆକର୍ଷଣ କରାଯାଇଛି ।
କୁଜଙ୍ଗ ତହସିଲ ଅଞ୍ଚଳରେ ଜମି ଜବରଦଖଲ ନୂଆ କଥା ନୁହେଁ । ତତ୍କାଳୀନ ଜିଲ୍ଲାପାଳ ସଂଗ୍ରାମ କେଶରୀ ମହାପାତ୍ର ବଳପୂର୍ବକ ସରକାରୀ ଜମି ଜବରଦଖଲ ଏବଂ କିଣାବିକା ଉପରେ ସୁରାକ ପାଇବା ପରେ ତନାଘନା କରିଥିବାର ନଜିର ରହିଛି । ବସୁନ୍ଧରା ଯୋଜନାରେ ଚଞ୍ଚକତା କରାଯାଇ ଭୂମିହୀନ ଆଳରେ କିଛି ଲୋକଙ୍କୁ ୪ ଡିସିମିଲ କରି ଜମି ଯୋଗାଇ ଦିଆଯାଇଥିବା ମଧ୍ୟ ସେତେବେଳେ ବିବାଦ ଘେରକୁ ଆସିଥିଲା । କେବଳ ସେତିକି ନୁହେଁ ପାଣିଯୋର ଜମିର କିସମକୁ ମଧ୍ୟ ବଦଳାଇ କିଣାବିକା ହୋଇଥିବାର ଗନ୍ଧ ବାହାରିଥିଲା । ୧୦/୧୨ ବର୍ଷ ତଳୁ ଉଦୟବଟ ଅଞ୍ଚଳର ମୂଳଖାତା ୮୮୮ ଓ ୧୩୦୯ରେ ରହିଥିବା ଜମିର ପରିମାଣ ଓ କିସମକୁ ବେଶ ଚତୁରାତର ସହ ବଦଳାଇ ଦିଆଯାଇଥିଲା । ୨୦୦ ବର୍ଷ ତଳର ଉକ୍ତ ପାଣି ଯୋର ସମୟକ୍ରମେ ନକ୍ସାରୁ ଉଭେଇ ଯାଇଛି । ଉକ୍ତ ଦୁଇ ଖାତାରେ ୨ ଏକର ୯୫ ଡିସିମିଲ ପାଣି ଯୋର କିସମ ଜମି ରହିଥିଲା । ହେଲେ ପିପଳ ଅଞ୍ଚଳର ଜଣେ ବ୍ୟକ୍ତି ପ୍ରଥମେ ଏହି ଗୋଲକଧନ୍ଦାର ର୍ୟାକେଟ ଆରମ୍ଭ କରିଥିବା ନେଇ ୨୦୨୦ ମସିହା ଆଲୋଚନା ପରିଧିକୁ ଆସିଥିଲା । ପାରାଦୀପ ଉପକଣ୍ଠରେ ଜମିର ମୂଲ୍ୟ ଉପରମୁହାଁ ଧରିଛି ।
ଏଣେ ଜବରଦଖଲକାରୀଙ୍କ ଭୂସ୍ୱର୍ଗ ପାଲଟିଛି ପୂରା ଜିଲ୍ଲା କହିଲେ ଅତ୍ୟୁକ୍ତି ହେବ ନାହିଁ । କାରଣ ବାଲିକୁଦା, ନାଉଗାଁ, ଏରସମା ଓ କୁଜଙ୍ଗ ଅଞ୍ଚଳରେ ୯୨୫୬.୮୧ ହେକ୍ଟର ଜଙ୍ଗଲ ଜମି ରହିଛି । ରାଜନଗର ସ୍ଥିତ ହେନ୍ତାଳ ବନ ବିଭାଗ(ବନ୍ୟଜନ୍ତୁ ସମ୍ପଦ) ଅଧୀନରେ ଏହି ବିସ୍ତୀର୍ଣ୍ଣ ଅଞ୍ଚଳ ରହିଥିଲେ ସୁଦ୍ଧା ଜବରଦଖଲ କାରଣରୁ ବନୀକରଣ ହୋଇପାରୁ ନାହିଁ । ଅତୀତରେ ଯୁଗ୍ମ ସର୍ଭେ ବଳରେ ଉଭୟ ଜିଲ୍ଲାର ରାଜସ୍ୱ ଓ ବନ ବିଭାଗ ପ୍ରାୟ ୨୫୦୦ ହେକ୍ଟର ଜମିରେ ବେଆଇନ ଚିଙ୍ଗୁଡ଼ି ଘେରି ନିର୍ମାଣ ହୋଇଥିବା ଜାଣିବାକୁ ପାଇଥିଲେ । ଅଧିସୂଚିତ ଜଙ୍ଗଲ ଜମିକୁ କବ୍ଜା କରାଯିବା ଦ୍ୱାରା ବ୍ୟାପକ ମୃତ୍ତିକା କ୍ଷୟ ଏବଂ ପରିବେଶ ଉପରେ ଅତିରିକ୍ତ ପ୍ରତିକୂଳ ପ୍ରଭାବ ବିସ୍ତାର କରିଆସୁଛି । ଏରସମା ସିଆଳି ବେଳାଭୂମିର ଭିୟ୍ୟୁ ଟାୱାରଟି ମାଟିରେ ମିଶିବା ଏହାର ଚାକ୍ଷୁସ ପ୍ରମାଣ ମଧ୍ୟ । ସେସମୟରେ ବି ୨୨୮ଟି ଅନଧିକାର ଦଖଲ ବିରୋଧରେ ମାମଲା ରୁଜୁ ହୋଇଥିଲା । ବିରୋଧ ହେବାରୁ ଉଚ୍ଛେଦ ଅଭିଯାନ ଆଗେଇ ପାରି ନଥିଲା । ଅନୁରୂପ ଭାବେ ସମୁଦ୍ର ତଟବର୍ତ୍ତୀ ସରକାରୀ ଜଙ୍ଗଲ ଜମିର କିସମ ପରିବର୍ତ୍ତନ କରି ଦେଇଛନ୍ତି କେତେକ ପ୍ରଭାବଶାଳୀ ବ୍ୟକ୍ତି ି ବିଶେଷ । ବାଲିକୁଦା ଓ ଏରସମାର ଉପକୂଳବର୍ତ୍ତୀ ମୌଜାରେ ଶହଶହ ଏକର ସରକାରୀ ଜଙ୍ଗଲ ଜମିକୁ ହାତେଇ ନିଆଯାଇଛି । ଏରସମା ତହସିଲର ପଦ୍ମପୁର ଆରଆଇ ସର୍କଲ, ଗଡ଼ହରିଶପୁର ମୌଜାରେ ଏପ୍ରକାର କେଳେଙ୍କାରୀ କରାଯାଇଛି ।
କିଛି ବର୍ଷ ତଳେ ମଧ୍ୟ ବାଲିକୁଦାରେ ୨୦୪ ହେକ୍ଟର ଓ ଏରସମା ବ୍ଲକ ଅଞ୍ଚଳରେ ୫୩୩ ହେକ୍ଟର ସରକାରୀ ଅନାବାଦି ଯୋଗ୍ୟ ଜମି ଓ ଜଙ୍ଗଲ ଜମି ମାଫିଆମାନଙ୍କ ଦଖଲରେ ଥିବା ଚର୍ଚ୍ଚାର ପରିଧିକୁ ଆସିଥିଲା । ଏଣେକିନ୍ତୁ ଦେଖିଲେ ନିଜ ଭୂଭାଗ ତଥା ସମ୍ପତ୍ତିର ସୁରକ୍ଷା ନିମନ୍ତେ ସରକାର ପ୍ରତି ବର୍ଷ ଲକ୍ଷ ଲକ୍ଷ ଟଙ୍କା ବିନିଯୋଗ କରି ଚାଲିଛନ୍ତି । ଜଗତସିଂହପୁର ଜିଲ୍ଲା ଉପରେ ଆଖି ବୁଲାଇଲେ ୧ କୋଟି ୬୬ ଲକ୍ଷ ୭୦ ହଜାର ୫୬୪ ଟଙ୍କା ସରକାରୀ ସମ୍ପତ୍ତିର ସୁରକ୍ଷା ଦିଗରେ ବିନିଯୋଗ ହେବା ବଦଳରେ ପକାଇ ରଖାଯାଇଥିବା ୨/୩ ମାସ ତଳେ ଜଣାପଡ଼ିଥିଲା । ୨୦୧୨ ୧୩ ମସିହା ପୂର୍ବରୁ ସରକାର ନିଜର ବହୁମୂଲ୍ୟ ସମ୍ପତ୍ତିର ସୁରକ୍ଷା ଦିଗକୁ ଅଗ୍ରାଧିକାର ଦେଇଥିଲେ । ସର୍ବମୋଟ ଏହି ବର୍ଷ ଗୁଡ଼ିକରେ ଜିଲ୍ଲାକୁ ୨ କୋଟି ୮୯ ଲକ୍ଷ ୭୬ ହଜାର ୧୦୦ ଟଙ୍କା ମଞ୍ଜୁର ହୋଇଥିଲା । କିନ୍ତୁ ୨୦୧୫-୧୬ରେ ଅନ୍ୟ ତହସିଲକୁ ଛାଡ଼ି କେବଳ କୁଜଙ୍ଗକୁ ୮ ଲକ୍ଷ ଟଙ୍କା ଆସିଥିଲା । ୨୦୨୧ ୨୨, ୨୨-୨୩ରେ ମଧ୍ୟ କୁଜଙ୍ଗ ତହସିଲକୁ ମିଳିଥିଲା ମୋଟ ୪୫ ଲକ୍ଷ ୩୧ ହଜାର ୧୦୦ ଟଙ୍କା । ତଥାପି ସରକାରୀ ଜମି ଅସୁରକ୍ଷିତ ରହିବା ଆଶ୍ଚର୍ଯ୍ୟର ବିଷୟ । ଜିଲ୍ଲାର ରାଜସ୍ୱ ବିଭାଗ ଖାତାକୁ ପାଖାପାଖି ୩ କୋଟି ଟଙ୍କାର ଅନୁଦାନ ଆସିଥିଲେ ସୁଦ୍ଧା ଏଥିରୁ ୧ କୋଟି ୨୩ ଲକ୍ଷ ୫ ହଜାର ୫୩୬ ଟଙ୍କା ବ୍ୟୟରେ ସର୍ବମୋଟ ୭୬ ଏକର ୨୧ ଡିସିମିଲ ସରକାରୀ ଜାଗାକୁ ସୁରକ୍ଷିତ ରଖାଯାଇଥିବା ଦାବି ହେବା କୌତୂହଳର ବିଷୟ ହୋଇଛି
