ନୂଆଦିଲ୍ଲୀ,୧୦/୦୧:ରାଜଧାନୀରେ ବୃଦ୍ଧି ପାଉଛି ଅପରାଧିକ ମାମଲା । ଦିଲ୍ଲୀର ଏୟାରପୋର୍ଟ ଓ ବିଭିନ୍ନ ସ୍କୁଲକୁ ବାରମ୍ବାର ଆସୁଛି ବୋମା ଧମକ । ତେବେ ଏଥିରେ ସଂପୃକ୍ତି ଥିବା ସନ୍ଦେହ କରି ଜଣେ ଦ୍ବାଦଶ ଶ୍ରେଣୀ ଛାତ୍ରଙ୍କୁ ଅଟକ ରଖିଛି ଦିଲ୍ଲୀ ପୋଲିସ୍ । ଇ-ମେଲ୍ ଜରିଆରେ ଛାତ୍ର ଜଣକ ଏଭଳି ଧମକ ଦେଉଥିବା ଅଭିଯୋଗ ପରେ ତାଙ୍କୁ ପୋଲିସ ଅଟକ ରଖିଥିବା ସୂଚନା ମିଳିଛି।
ସୂଚନା ମୁତାବକ, ଛାତ୍ର ଜଣକ ଇ-ମେଲ ଜରିଆରେ ଅତି କମରେ ୨୩ଟି ସ୍କୁଲକୁ ବୋମା ଧମକ ଇମେଲ୍ ପଠାଇଥିଲେ। ପ୍ରତ୍ୟେକ ଘଟଣାରେ, ସନ୍ଦେହ ନ ଉପୁଜିବା ପାଇଁ ବାଳକ ଜଣକ ଅନ୍ୟ ସ୍କୁଲ୍କୁ ମେଲ୍ରେ ସିସି ରଖୁଥିଲେ ବି କେବେ ବି ନିଜ ସ୍କୁଲ୍ର ନାମ ଉଲ୍ଲେଖ କରିନଥିଲେ। ତେବେ ଦିଲ୍ଲୀ ସ୍କୁଲ୍କୁ ବାରମ୍ବାର ବୋମା ଧମକ ମିଳିବା ପରେ ଏଥିରେ ସଂପୃକ୍ତି ଥିବା ସନ୍ଦେହ କରି ଦିଲ୍ଲୀ ପୋଲିସ୍ ଏବେ ଜଣେ ଦ୍ବାଦଶ ଶ୍ରେଣୀ ଛାତ୍ରଙ୍କୁ ଅଟକ ରଖିଛି। ଦିଲ୍ଲୀର ସ୍କୁଲ୍କୁ ଲଗାତାର ବୋମା ଧମକ ମିଳିଥିବା ବେଳେ ପରବର୍ତ୍ତୀ ସମୟରେ ସେଥିରୁ ଅଧିକାଂଶ ମିଥ୍ୟା ବୋଲି ଜଣାପଡ଼ିଛି।ତଦନ୍ତ ସମୟରେ ଜଣାପଡିଥିଲା ଯେ ଛାତ୍ର ଜଣକ ସ୍କୁଲ୍ ପରୀକ୍ଷାକୁ ବନ୍ଦ କରିବା ପାଇଁ ଏପରି କରୁଥିଲେ। ସେ ପୂର୍ବରୁ ମଧ୍ୟ ଧମକପୂର୍ଣ୍ଣ ଇମେଲ୍ ପଠାଇଥିବା ନେଇ ବରିଷ୍ଠ ପୋଲିସ ଅଧିକାରୀ ଅଙ୍କିତ ଚୌହାନ ଏ ନେଇ ଏଏନ୍ଆଇକୁ ସୂଚନା ଦେଇଛନ୍ତି।
