ହାଇଦ୍ରାବାଦ,୧୦/୦୧: ତେଲେଙ୍ଗାନାରେ ମର୍ମନ୍ତୁଦ ସଡ଼କ ଦୁର୍ଘଟଣା । ଟ୍ରକକୁ ପଛରୁ ପିଟିଲା ବସ୍ । ଫଳରେ ଘଟଣାସ୍ଥଳରେ ଚାଲିଗଲା ୪ ଓଡ଼ିଆ ଶ୍ରମିକଙ୍କ ଜୀବନ । ତେବେ ତେଲେଙ୍ଗାନାର ସୂର୍ଯ୍ୟାପେଟ-ଖମାମ ହାଇଓ୍ବେରେ ଘଟିଛି ଏହି ଦୁର୍ଘଟଣା ।
ସୂଚନା ମୁତାବକ, ଗତକାଲି ନୂଆପଡା ସିନାପାଲିରୁ ଭାୟା ମାଲକାନଗିରି ହୋଇ ୩୨ ଜଣ ଶ୍ରମିକ ଗୁପ୍ତା ନାମକ ଏକ ଘରୋଇ ବସ୍ ଯୋଗେ ହାଇଦ୍ରାବାଦ ଯାଉଥିଲେ । ହେଲେ ଯିବା ସମୟରେ ଆଜି ଭୋର ୩.୩୦ ରୁ ୪ଟା ମଧ୍ୟରେ ଚିଭମେଲା ମଣ୍ଡଳର ଆଲିପୁର ଗ୍ରାମ ନିକଟରେ ବସଟିର ଟାୟାର ଫାଟିଯିବାରୁ ଭାରସାମ୍ୟ ହରାଇ ବାଲି ବୋଝେଇ ଟ୍ରକକୁ ପଛରୁ ଧକ୍କା ଦେଇଥିଲା । ଫଳରେ ୪ ଜଣ ଓଡିଆ ଶ୍ରମିକଙ୍କର ମୃତ୍ୟୁ ହୋଇଥିବା ବେଳେ ୧୮ଜଣ ଆହତ ହୋଇଛନ୍ତି । ତେବେ ସମସ୍ତ ଆହତଙ୍କୁ ଘଟଣାସ୍ଥଳରୁ ଉଦ୍ଧାର କରାଯାଇ ଡ଼ାକ୍ତରଖାନାରେ ଭର୍ତ୍ତି କରାଯାଇଛି। ମୃତକଙ୍କ ମଧ୍ୟରେ ବସ୍ ଡ୍ରାଇଭର, ୨ ମହିଳା ଶ୍ରମିକ ଓ ଜଣେ ପୁରୁଷ ଶ୍ରମିକ ଥିବା ଜଣାଯାଇଛି। ତେବେ ମୃତ୍ୟୁ ସଂଖ୍ୟା ବୃଦ୍ଧି ପାଇବାର ସମ୍ଭାବନା ରହିଥିବା ବେଳେ ଏନେଇ ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ଏଥିସହ ମୃତଦେହଗୁଡ଼ିକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି । ତେବେ କେଉଁ ପରିସ୍ଥିତିରେ ଏଭଳି ଦୁର୍ଘଟଣା ଘଟିଗଲା ତାହା ବର୍ତ୍ତମାନ ସୁଦ୍ଧା ଜଣାପଡି ନାହିଁ । ଉକ୍ତ ବସଟି ଓଡିଶାର ନୂଆପଡା ସିନା ପାଲୀ ଠାରୁ ବାହାରି କଳାହାଣ୍ଡି, ଜୟପୁର, ମାଲକାନଗିରି ହୋଇ ହାଇଦ୍ରାବାଦକୁ ଯାଉଥିଲା,। ସେହିପରି ଉକ୍ତ ବସର ଟିକେଟ ଅନଲାଇନରେ କଟା ଯାଉଥିବାରୁ କେଉଁ ଜିଲ୍ଲାର କେତେଜଣ ଯାତ୍ରୀ ଥିଲେ କିଛି ଜଣା ପଡିନାହିଁ।
