ଚେନ୍ନାଇ, ୧୦।୧: ଆତ୍ମୀୟଙ୍କୁ ଅନ୍ତିମ ବିଦାୟ ଦେବ ପରିବାର ପାଇଁ ହୋଇଥାଅ କଷ୍ଟଦାୟକ । ପରିବାରରେ ଜଣଙ୍କୁ ହରାଇଲେ, ଘରେ ଶୋକାକୂଳ ପରିବେଶ ଛାଇଯାଏ । କାନ୍ଦବୋବାଳି ପଡ଼େ । ହେଲେ ତାମିଲନାଡ଼ୁର ମଦୁରାଇର ଜଣେ ବୃଦ୍ଧା ମହିଳାଙ୍କ ଅନ୍ତିମ ବିଦାୟରେ ଠିକ୍ ଏହାର ବିପରୀତ ଦେଖିବାକୁ ମିଳିଛି । କାନ୍ଦି କାନ୍ଦି ବିଦାୟ ଦେବା ବଦଳରେ ହସି ହସି ମହିଳାଙ୍କୁ ଅନ୍ତିମ ବିଦାୟ ଦେଇଛନ୍ତି । ଖାଲି ଏତିକି ନୁହେଁ, ବିଦାୟ ବେଳେ ନାଚଗୀତ କାର୍ଯ୍ୟକ୍ରମର ମଧ୍ୟ ଆୟୋଜନ କରାଯାଇଛି । ଶୁଣି ଆଶ୍ଚର୍ଯ୍ୟ ଲାଗୁଥିବ ନିଶ୍ଚୟ । ଆପଣ ଭାବୁଥିବେ କେହି ପରିବାର ସଦସ୍ୟଙ୍କ ଏଭଳି ଅନ୍ତିମ ବିଦାୟ ଦେଉଥିବା ଲୋକ ବୋଧହୁଏ ମାନସିକ ବିକାରଗ୍ରସ୍ତ ହୋଇଥିବେ । ନାଇଁ ଆଜ୍ଞା । ମହିଳାଙ୍କ ପରିବାରରେ ସମସ୍ତେ ସୁସ୍ଥ । ପରିବାର ଲୋକଙ୍କର ଏପରି କରିବାର ପଛର କାରଣ ହେଉଛି କାରଣ ମୃତ ମହିଳାଙ୍କର ଏହା ଥିଲା ଶେଷ ଇଚ୍ଛା ।
କହିରଖୁ କି, ମୃତ ମହିଳା ଜଣକ ହେଉଛନ୍ତି ତାମିଲନାଡ଼ୁ ମଦୁରାଇର ଉସିଲାମପଟିସ୍ଥିତ ମନ୍ଦିରର ଜଣେ ପୂଜକ ପରମଥଦେବରଙ୍କ ୯୬ ବର୍ଷୀୟା ପତ୍ନୀ ନାଗମ୍ମଲ । ଯାହାଙ୍କ ମୃତ୍ୟୁରେ ତାଙ୍କ ପରିବାର ପକ୍ଷରୁ ଏମିତି କିଛି କରାଯାଇଥିଲା, ଯାହା ଏବେ ସମସ୍ତଙ୍କୁ ଚକିତ କରିଛି । ବୟସାଧିକ କାରଣରୁ ନାଗମଲ୍ଲଙ୍କର ମୃତ୍ୟୁ ହୋଇଥିଲା । ତାଙ୍କ ସ୍ୱାମୀଙ୍କର ପୂର୍ବରୁ ମୃତ୍ୟୁ ହୋଇଛି । ନାଗମଲ୍ଲଙ୍କର ୨ ପୁଅ, ୪ ଝିଅ ଓ ୭୮ ନାତିନାତୁଣୀ, ଅଣନାତିନାତୁଣୀ ଓ ପଣନାତିନାତୁଣୀ ଅଛନ୍ତି । ମୃତ୍ୟୁ ପୂର୍ବରୁ ତାଙ୍କ ଶେଷକୃତ୍ୟରେ କେହି ଶୋକ ନକରି ହସି ହସି ତାଙ୍କୁ ବିଦାୟ ଦିଅନ୍ତୁ ବୋଲି କହିଥିଲେ ନାଗମଲ୍ଲ । ଯାହା ପରେ ନାଗମଲ୍ଲଙ୍କ ଅନ୍ତିମ ଇଚ୍ଛାକୁ ସମ୍ମାନ ଜଣାଇ ତାଙ୍କ ପରିବାର ଲୋକଙ୍କ ପକ୍ଷରୁ ନାଚଗୀତ କାର୍ଯ୍ୟକ୍ରମର ଆୟୋଜନ କରାଯାଇଥିଲା ଏବଂ ଆଡମ୍ୱରର ସହ ତାଙ୍କୁ ବିଦାୟ ଦିଆଯାଇଥିଲା ।
ଏହି କାର୍ଯ୍ୟକ୍ରମରେ ପରିବାର ସଦସ୍ୟଙ୍କ ସହ ଗ୍ରାମବାସୀନମାନେ ମଧ୍ୟ ନୃତ୍ୟ ପରିବେଷଣ କରିଥିଲେ । ଏଥିରେ ଗାଁର କେତେକ ପିଲାଙ୍କ ସହ ନାତିନାତୁଣୀମାନେ ଲୋକକଳା ପ୍ରଦର୍ଶନ କରିବା ସହ ମହିଳାମାନେ ତାମିଲନାଡ଼ୁର ଲୋକନୃତ୍ୟ କୁମି ପ୍ରଦର୍ଶନ କରିଥିଲେ । ଗାଁର ଅନ୍ତିମ ସଂସ୍କାର କାର୍ଯ୍ୟଟି ଏକ ଆନନ୍ଦର ଉତ୍ସବରେ ପରିଣତ ହୋଇଥିଲା । ନାଗମଲ୍ଲଙ୍କ ଶବ ଚାରିପଟେ ମହିଳାମାନେ ହସି ହସି ନୃତ୍ୟ କରୁଥିବାର ଦେଖାଯାଇଥିଲା । ତାଙ୍କ ନାତିନାତୁଣୀ ଓ ଅଣନାତିନାତୁଣୀ ପାରମ୍ପରିକ ଗୀତ ବୋଲିବା ସହ ତାଙ୍କ ଅନ୍ତିମ ବିଦାୟ ବେଳକୁ ଉତ୍ସବ ଭଳି ପାଳିଥିଲେ ।
