ନୂଆଦିଲ୍ଲୀ,୨୨।୫: ଦେଶର ରାଜଧାନୀ ଦିଲ୍ଲୀକୁ ପୁଣିଥରେ ଆସିଛି ବମରେ ଉଡାଇବାର ଧମକପୂର୍ଣ୍ଣ ଇମେଲ। ଏଥର ନର୍ଥ ବ୍ଲକକୁ ଉଡାଇବାର ଧମକ ଦିଆଯାଇଛି। ଧମକ ପରେ ସର୍ଚ୍ଚ ଅପରେସନ୍ ଆରମ୍ଭ ହୋଇଛି ଓ ଏପର୍ଯ୍ୟନ୍ତ କିଛି ସନ୍ଦିଗ୍ଧ ଜିନିଷ ମିଳିନାହିଁ। ଗୃହ ମନ୍ତ୍ରଣାଳୟ ଏଠାରେ ଉପସ୍ଥିତ ଅଛି | ଦୁଇଟି ଫାୟାର ବ୍ରିଗେଡ ଗାଡି ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ପ୍ରାୟ ଏକ ଘଣ୍ଟାର ଯାଞ୍ଚ ପରେ ସୁରକ୍ଷା ଏଜେନ୍ସି କୌଣସି ସନ୍ଦେହଜନକ ବସ୍ତୁ ପାଇ ନାହାଁନ୍ତି। ସମଗ୍ର ନର୍ଥ ବ୍ଲକର ପ୍ରତ୍ୟେକ କୋଣ ଅନୁକୋଣ ଅନୁଧ୍ୟାନ କରାଯାଉଛି।
ଅଧିକାରୀଙ୍କୁ ତୁରନ୍ତ ଧମକପୂର୍ଣ୍ଣ ଇମେଲ ମିଳିବାପରେ ଏହାର ସୂଚନା ଦିଲ୍ଲୀର ପୋଲିସକୁ ଦିଆଯାଇଥିଲା। ସୂଚନା ମିଳିବା ମାତ୍ରେ ତୁରନ୍ତ ପୋଲିସର ବହୁ ଟିମ୍ ପହଁଞ୍ଚି ଯାଇଥିଲା। ଦମକଳ ବିଭାଗର ଗାଡି ଓ ବମ ନିରୋଧି ଟିମ୍କୁ ମଧ୍ୟ ଲଗାଯାଇଛି। ଗତ କିଛି ଦିନ ତଳେ ଦିଲ୍ଲୀର ବହୁ ସ୍କୁଲ ଓ ହସ୍ପିଟାଲକୁ ଏଭଳି ବମ୍ ଧମକ ଦେଇ ଥିବାର ସୂଚନା ଇମେଲ୍ରେ ଦିଆଯାଇଛି, କିନ୍ତୁ ସବୁଥର ଦାବି ଭୁଲ ପ୍ରମାଣିତ ହୋଇଛି।
ଗୃହ ମନ୍ତ୍ରଣାଳୟର ଅଫିସ ନର୍ଥ ବ୍ଲକରେ ରହିଛି। ନର୍ଥ ବ୍ଲକରେ କେନ୍ଦ୍ର ସରକାରଙ୍କ ବହୁ ଗୁରୁତ୍ବପୂର୍ଣ୍ଣ କାର୍ଯ୍ୟାଳୟ ଓ ମନ୍ତ୍ରଣାଳୟ ରହିଛି। ଏହା ରାଷ୍ଟ୍ରପତି ଭବନ ଓ ସଂସଦ ଭବନର ଖୁବ୍ ନିକଟରେ ରହିଛି। ଏତେ ସମ୍ବେଦନଶୀଳ ଅଞ୍ଚଳରେ ବୋମା ବିସ୍ଫୋରଣ ଧମକକୁ ପୋଲିସ ପୁରା ଗମ୍ଭୀରତାର ସହ ନେଇଛି ଓ ତୁରନ୍ତ ତଲାସୀ ଅଭିଯାନ ଆରମ୍ଭ କରାଯାଇଛି।
