ନୂଆଦିଲ୍ଲୀ,୧୫।୬: ଲୋକସଭା ନିର୍ବାଚନ ୨୦୨୪ରେ ମହା ବିକାଶ ଅଘାଡି(ଏମ୍ବିଏ)ର ଜିତିବାରେ ଶିବସେନା(ୟୁବିଟି) ମୁଖ୍ୟ ଉଦ୍ଧବ ଠାକରେ ଖୁବ୍ ଉତ୍ସାହିତ ଅଛନ୍ତି। ଶନିବାର ସେ ଘୋଷଣା କରିଛନ୍ତି, ବିରୋଧି ମେଣ୍ଟ ମହାରାଷ୍ଟ୍ର ବିଧାନସଭା ନିର୍ବାଚନ ଏକାଠି ଲଢିବ। ଏହା ସହ ଠାକରେ ଏହା ସ୍ପଷ୍ଟ କରିଛନ୍ତି ଯେ, ଏକନାଥ ସିନ୍ଦେଙ୍କ ଗୋଷ୍ଠୀକୁ ଯାଇଥିବା ନେତା ତାଙ୍କ ପାଖକୁ ଫେରିବାର ସମ୍ଭାବନା ହିଁ ନାହିଁ। ସେ କହିଛନ୍ତି, ଯେଉଁ ଲୋକ ମୋତେ ଛାଡିକି ଚାଲି ଯାଇଛନ୍ତି, ତାଙ୍କୁ ପାର୍ଟିକୁ ଫେରାଇ ଅଣାଯିବ ନାହିଁ।’
ଠାକରେ ଏନସିପି ମୁଖ୍ୟ ଶରଦ ପାଓ୍ବାର, କଂଗ୍ରେସ ନେତା ପୃଥ୍ବୀରାଜ ଚହ୍ବାଣ ଓ ମେଣ୍ଟର ଅନ୍ୟ ବରିଷ୍ଠ ନେତାଙ୍କ ସହିତ ଏକ ସାମ୍ବାଦିକ ସମ୍ମିଳନୀକୁ ସମ୍ବୋଧିତ କରୁଥିଲେ। ସେ କହିଛନ୍ତି, ଏହା ସମ୍ବିଧାନ ଓ ଲୋକତନ୍ତ୍ର ଓ ଲୋକତନ୍ତ୍ରକୁ ବଞ୍ଚାଇବାକୁ ଲଢେଇ ଚାଳିଥିଲା। ଖୁବ୍ ଶୀଘ୍ର ବିଧାନସଭା ନିର୍ବାଚନ ହେବାକୁ ଯାଉଛି। ଏହି ସରକାର ମୋଦି ସରକାର ଥିଲା ଓ ଏବେ ଏହା ଏନ୍ଡିଏ ସରକାର ହୋଇଯାଇଛି। ଏବେ ଦେଖିବାର ଅଛି ଏହା କେତେ ଦିନ ଚାଲୁଛି ?
ଠାକରେ କହିଛନ୍ତି, ମୋଦି କ’ଣ ନ୍ୟାରେଟିଭ୍ ବ୍ୟବହାର କରିଛନ୍ତି ? ମଙ୍ଗଳ ସୁତ୍ର ନ୍ୟାରେଟିଭ୍ କ’ଣ ଥିଲା ? ବିଜେପି ନିଜେ ୪୦୦ ପାର ବୋଲି କହୁଥିଲା। ଅଛେ ଦିନର ନ୍ୟାରେଟିଭ୍ କ’ଣ ହେଲା। ମୋଦି ଗ୍ୟାରେଣ୍ଟିର କ’ଣ ହେଲା ? ସେ କେନ୍ଦ୍ରର ବିଜେପି ସରକାରଙ୍କ ତୁଳନା ତିନି ଚକିଆ ରିକ୍ସା ସହିତ କରିଥିଲେ। ଗତ ଏମ୍ଭିଏ ସରକାରର ବର୍ଣ୍ଣାନା କରି ଫଡନାଭିସ୍ ମଧ୍ୟ ଏଭଳି ଶବ୍ଦର ବ୍ୟବହାର କରିଥିଲେ। ସେ କହିଛନ୍ତି, ଫଡନାଭିସ୍ ଆମକୁ କୁହନ୍ତୁ, ଆମ ସରକାର ରିକ୍ସାର ତିନି ଚକ ଭଳି, କେନ୍ଦ୍ରର ବିଜେପି ସରକାରର ସ୍ଥିତି ମଧ୍ୟ ସେଭଳି ହୋଇଛି।