ନୂଆଦିଲ୍ଲୀ: ଆମ ଆଦମୀ ପାର୍ଟିର ରାଜ୍ୟସଭା ସାଂସଦ ସ୍ବାତୀ ମାଲିଓ୍ବାଲଙ୍କୁ ମାଡ଼ ମାରିବା ଅଭିଯୋଗରେ ଜେଲରେ ଥିବା ବିଭବ କୁମାରଙ୍କ ଅଡ଼ୁଆ ବଢ଼ିଲା । ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କ ପୂର୍ବତନ ସହଯୋଗୀ ବିଭବ କୁମାରଙ୍କ ହାଜତ ମିଆଦ ଜୁନ୍ ୨୨କୁ ବୃଦ୍ଧି କରିଛନ୍ତି ଦିଲ୍ଲୀର ଏକ କୋର୍ଟ । ମେ’ ୧୩ରେ ମୁଖ୍ୟମନ୍ତ୍ରୀଙ୍କ ବାସଭବରେ ସ୍ବାତୀ ମାଲିଓ୍ବାଲଙ୍କୁ ବିଭବ କୁମାର ମାଡ଼ ମାରିଥିବା ନେଇ ଅଭିଯୋଗ ହୋଇଥିଲା । ଦିଲ୍ଳୀ ମହିଳା କମିଶନର ପୂର୍ବତନ ଅଧ୍ୟକ୍ଷା ସ୍ବାତୀଙ୍କ ଅଭିଯୋଗ ଆଧାରରେ ବିଭବ କୁମାରଙ୍କୁ ଦିଲ୍ଲୀ ପୋଲିସ ଗିରଫ କରିଥିଲା ।
ଆଜି ବିଭବ କୁମାର ଭିଡିଓ କନଫରେନ୍ସିଂ ଜରିଆରେ ଦିଲ୍ଲୀର ମେଟ୍ରୋପଲିଟାନ୍ ମାଜିଷ୍ଟ୍ରେଟ୍ଙ୍କ ସମ୍ମୁଖରେ ହାଜର ହୋଇଥିଲେ । କୋର୍ଟ ତାଙ୍କୁ ଜୁନ୍ ୨୨ରେ ପୁଣି ଥରେ ହାଜର କରାଇବାକୁ ପୋଲିସକୁ ନିର୍ଦ୍ଦେଶ ଦେଇଛନ୍ତି । ତେବେ ମେ ୧୮ରେ ପୋଲିସ ବିଭବ କୁମାରଙ୍କୁ ଗିରଫ କରିଥିଲା । ସେହିଦିନ ତାଙ୍କୁ ୫ ଦିନ ଲାଗି ରିମାଣ୍ଡରେ ପଠାଇଥିଲେ । ଏହା ପରେ ବିଭବ କୁମାରଙ୍କ ଜାମିନ ଆବେଦନ ଖାରଜ ହୋଇଥିଲା ଏବଂ ପୁଣି ଥରେ ମେ’ ୨୪ରେ ତାଙ୍କୁ ୪ ଦିନ ପାଇଁ ନ୍ୟାୟିକ ହେପାଜତକୁ ପଠାଇ ଦେଇଥିଲେ କୋର୍ଟ ।
ସୂଚନାଯୋଗ୍ୟ, ବିଭବଙ୍କ ବିରୋଧରେ ମେ’ ୧୬ରେ ଏକ ମାମଲା ରୁଜୁ ହୋଇଥିଲା ।ତାଙ୍କ ଉପରେ ମହିଳାଙ୍କୁ ଦୁର୍ବ୍ୟବହାର ଏବଂ ମାଡ଼ ମାରିବା ଭଳି ସଙ୍ଗୀନ ଦଫା ଲାଗିଛି । ବିଭବ କୁମାରଙ୍କ ଗିରଫଦାରୀକୁ ନେଇ ଦିଲ୍ଲୀ ରାଜନୀତିରେ ହାଇଡ୍ରାମା ଦେଖିବାକୁ ମିଳିଥିଲା। ବାସଭବରେ ମୁଖ୍ୟମନ୍ତ୍ରୀ ଥିବା ବେଳେ ତାଙ୍କ ଉପରେ ଆକ୍ରମଣ ହୋଇଥିଲା ବୋଲି ସ୍ବାତୀ ମାଲିଓ୍ବାଲ ସଙ୍ଗୀନ ଅଭିଯୋଗ ମଧ୍ୟ ଆଣିଥିଲେ ।