ନୂଆଦିଲ୍ଳୀ,୧୫।୫: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କ ପରେ ଏବେ ତାଙ୍କ ପତ୍ନୀ ସୁନିତା କେଜ୍ରିଓ୍ବାଲଙ୍କ ଅଡୁଆ ବଢିପାରେ। ଦିଲ୍ଲୀ ହାଇକୋର୍ଟ ଶନିବାର ସୁନିତା ଓ ବହୁ ବ୍ୟକ୍ତିଙ୍କ ଫେସବୁକ୍, ୟୁଟ୍ୟୁବ୍ ଓ ଅନ୍ୟ ସୋସିଆଲ ମିଡିଆ ପ୍ଲାଟଫର୍ମ ସହିତ ସବୁ ପକ୍ଷର ଆବେଦନ ଉପରେ ନୋଟିସ୍ ଜାରି କରିଛନ୍ତି। ଆବେଦନରେ କେଜ୍ରିଓ୍ବାଲଙ୍କୁ ୨୮ ମାର୍ଚ୍ଚରେ ପୋଲିସ କଷ୍ଟଡିରେ ରାଉଜ ଏଭିନ୍ୟୁ କୋର୍ଟରେ ହାଜର ବେଳେ ଭିଡିଓ କନଫ୍ରେନ୍ସିଂ ନିୟମର ଉଲଂଘନ କରିବା ପାଇଁ କାର୍ଯ୍ୟାନୁଷ୍ଠାନ ଦାବି କରାଯାଇଥିଲା।
ଜଷ୍ଟିସ ନୀନା ବସଂଲ କୃଷ୍ଣ ଏବଂ ଜଷ୍ଟିସ ଅମିତ ଶର୍ମାଙ୍କ ଏକ ବେଞ୍ଚ ଏହି ମାମଲାର ଆଜି ଶୁଣାଣି କରିଛନ୍ତି। କେଜ୍ରିୱାଲଙ୍କୁ ମଦ ଦୁର୍ନୀତି ମାମଲାରେ ଇଡି ଗିରଫ କରିବା ପରେ କୋର୍ଟରେ ବ୍ୟକ୍ତିଗତ ରୂପେ ହାଜର ହୋଇ ନିଜ ମତ ରଖିଥିଲେ। ସେତବେଳର ଏହି ଭିଡିଓକୁ ସୁନୀତା ସୋସିଆଲ ମିଡିଆରେ ପୋଷ୍ଟ କରିଥିଲେ। ଏହାକୁ ବିରୋଧ କରି ଦିଲ୍ଲୀର ଜଣେ ଓକିଲ ବୈଭବ ସିଂହ କୋର୍ଟରେ ଆବେଦନ କରିଥିଲେ। ଭିଡିଓ କନଫରେନ୍ସିଂ ନିୟମ ଉଲ୍ଲଂଘନ ଅଭିଯୋଗରେ ସୁନୀତା କେଜ୍ରିୱାଲ ଏବଂ ଅନ୍ୟ ୫ ଜଣଙ୍କ ବିରୋଧରେ ବେଞ୍ଚ ଏକ ନୋଟିସ ଜାରି କରିଛନ୍ତି। ଭିଡିଓକୁ ସୋସିଆଲ ମିଡିଆରୁ ହଟାଇବା ପାଇଁ କୋର୍ଟ ନିର୍ଦ୍ଦେଶ ଦେଇଛନ୍ତି।
ଦିଲ୍ଲୀ ହାଇକୋର୍ଟ ସୁନୀତାଙ୍କ ସମେତ ସମସ୍ତ ପକ୍ଷକୁ ନିଜ ନିଜ ସୋସିଆଲ ମିଡିଆ ଆକାଉଣ୍ଟରୁ ଏହି ଭିଡିଓ ଡିଲିଟ୍ କରିବାକୁ କହିଛନ୍ତି। ଏହି ଭିଡିଓକୁ ଯେଉଁମାନେ ରି-ପୋଷ୍ଟ କରିଛନ୍ତି ତାକୁ ଡିଲିଟ କରିବାକୁ ହାଇକୋର୍ଟ ସୋସିଆଲ ମିଡିଆ କମ୍ପାନୀଗୁଡ଼ିକୁ ନିର୍ଦ୍ଦେଶ ଦେଇଛନ୍ତି। ଆସନ୍ତା ୯ ଜୁଲାଇ ସୁଦ୍ଧା ସୁନୀତା କେଜ୍ରିଓ୍ୱାଲଙ୍କ କୋର୍ଟ ଜବାବ ମାଗିଛନ୍ତି। ଏହି ମାମଲାର ପରବର୍ତ୍ତୀ ଶୁଣାଣି ୯ ଜୁଲାଇରେ ହେବ।