ନୂଆଦିଲ୍ଲୀ,୧୭।୫: ଦିଲ୍ଲୀରେ ଆମ୍ ଆଦମୀ ପାର୍ଟିକୁ ବଡ଼ ଝଟକା। ଦଳର ୧୫ ବରିଷ୍ଠ ନେତା ଦିଲ୍ଲୀ ନଗର ନିଗମରୁ ଦେଇଛନ୍ତି ଇସ୍ତଫା।ଏହାସହ ଅଲଗା ପାର୍ଟି ତିଆରି କରିବାର କରିଛନ୍ତି ଘୋଷଣା । ଅର୍ଥାତ ଏମସିଡିରେ ତୃତୀୟ ସାମୁଖ୍ୟ ତିଆରି ହେବ।ଏହାର ନେତା ରହିବେ ମୁକେଶ ଗୋୟଲ।
ଦିଲ୍ଲୀ ନଗର ନିଗମରେ ବଡ଼ ଧରଣର ପରିବର୍ତ୍ତନ। ଏମ୍ସିଡି ନିର୍ବାଚନରେ ବିଜେପି କାଉନସିଲର ରାଜା ଇକବାଲ ସିଂହ ନୂଆ ମେୟର ହୋଇଥିଲେ। ତାଙ୍କୁ ୧୩୩ ଖଣ୍ଡ ଭୋଟ ମିଳିଥିଲା। କଂଗ୍ରେସ ପ୍ରାର୍ଥୀ ମନଦୀପଙ୍କୁ ମାତ୍ର ୮ଟି ଭୋଟ୍ ମିଳିଥିଲା। ଆପ୍ ମେୟର ନିର୍ବାଚନ ବହିଷ୍କାର କରିଥିଲା ଓ ନିଜର ପ୍ରାର୍ଥୀ ମଧ୍ୟ ଓହ୍ଲାଇନଥିଲା। ଏହି ପୁରା ଘଟଣାକ୍ରମ ପରେ ଆପ୍ ନେତାଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳିଥିଲା। ଆପ୍ର ବରିଷ୍ଠ ନେତା ଓ ଏମ୍ସିଡିରେ ଗୃହର ପୂର୍ବତନ ନେତା ମୁକେଶ ଗୋହଲଙ୍କ ନେତୃତ୍ବରେ ଆପ୍ରେ ଫାଟ। ଗୋୟଲ ଘୋଷଣା କରିଛନ୍ତି ସେ ଓ ତାଙ୍କ ସମର୍ଥକ କାଉନସିଲର ଅଲଗା ପାର୍ଟି ତିଆରି କରିବାର ନିଷ୍ପତ୍ତି ନେଇଛନ୍ତି। ଏହି ପାର୍ଟିର ନାଁ ରହିଛି ‘ଇନ୍ଦ୍ରପ୍ରସ୍ତ ବିକାଶ ପାର୍ଟି’। ମୁକେଶଙ୍କ କହିବା ଅନୁସାରେ, ଏହି ଗୋଷ୍ଠୀ ସହ ସମସ୍ତ ୧୫ କାଉନସିଲର ଆମ ସହ ଅଛନ୍ତି। ସେମାନେ ‘ଇନ୍ଦ୍ରପ୍ରସ୍ତ ବିକାଶ ପାର୍ଟି’ର ଅଂଶ ହେବେ। ଏହି ପଦକ୍ଷେପ ଏବେ ଆପ୍ ପାଇଁ ବଡ଼ ଚ୍ୟାଲେଞ୍ଜ ବୋଲି କୁହାଯାଉଛି।
