ଚାନ୍ଦବାଲି,୦୭/୦୯: ସାଇକେଲ ଆରୋହୀଙ୍କୁ ସାମ୍ନା ପଟୁ ଧକ୍କା ଦେଲା କାର୍ । ଦୁର୍ଘଟଣାରେ ସାଇକେଲ ଆରେହୀ ମୃତ । ମୃତକ ଜଣକ ଚନ୍ଦନପୁର ଗ୍ରାମର ଅକ୍ଷୟ ସାହୁ (୬୨)ବୋଲି ଜଣାପଡିଛି । ଡ୍ରାଇଭର ଜଣକ ହେଉଛନ୍ତି ଯାଜପୁର ଜିଲ୍ଲା ବିଞ୍ଝାରପୁର ଅଞ୍ଚଳର ମଳୟ ରଞ୍ଜନ ପରିଡା । ଭଦ୍ରକ-ଚାନ୍ଦବାଲି ମୁଖ୍ୟ ରାସ୍ତା ଚନ୍ଦନପୁର ନିକଟରେ ଏହି ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି ।
ସୂଚନା ମୁତାବକ, ଅକ୍ଷୟ ସାହୁ ଭଦ୍ରକ-ଚାନ୍ଦବାଲି ମୁଖ୍ୟ ରାସ୍ତା ଚନ୍ଦନପୁର ନିକଟରେ ନିଜ ସାଇକେଲ ଯୋଗେ ଯାଉଥିଲେ । ଏହି ସମୟରେ ବିପରୀପ ପାର୍ଶ୍ୱରୁ ଦ୍ରୁତ ଗତିରେ ଏକ କାର୍ ଆସି ଅକ୍ଷୟଙ୍କୁ ଧକ୍କା ଦେଇଥିଲା । କାର୍ଟି ତାଙ୍କୁ ସାମ୍ନା ପଟୁ ଖୁବ ଯୋରରେ ଧକ୍କା ଦେଇ ତାଙ୍କ ଉପରେ ଚଢି ଯାଇଥିଲା । ଫଳରେ ଘଟଣାସ୍ଥଳରେ ଚେତାଶୁନ୍ୟ ହୋଇ ପଡିଯାଇଥିଲେ ଅକ୍ଷୟ । ଏହା ଦେଖି ସ୍ଥାନୀୟଲୋକେ ତୁରନ୍ତ ତାଙ୍କୁ ଉଦ୍ଧାରକରି ଚାନ୍ଦବାଲି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏନେଇ ସ୍ଥାନୀୟଲୋକେ ପୋଲିସକୁ ଖବର ଦେଇଥିଲେ । ଦୁର୍ଘଟଣା ଘଟାଇଥିବା କାର୍ ଡ୍ରାଇଭରକୁ ଲୋକେ ଅଟକ ରଖିଥିଲେ । ଘଟଣାସ୍ଥଳରେ ଚାନ୍ଦବାଲି ପୋଲିସ ପହଞ୍ଚିବା ପରେ ଡ୍ରାଇଭରକୁ ପୋଲିସରେ ଜିମା ଦେଇଥିଲେ ସ୍ଥାନୀୟଲୋକେ । କାର୍ ଡ୍ରାଇଭରକୁ ଅଟକ ରଖି ଏକ ମାମଲା ରୁଜୁ କରି ତଦନ୍ତ ଆରମ୍ଭ ରଖିଛି ପୋଲିସ ।