ଭଦ୍ରକ, ୦୩/୦୯ : ଶାଶୁଘରୁ ନିର୍ଯାତନା ସହି ନପାରି ଚାଲି ଆସିଲେ। ଭାବିଥିଲେ କାମଧନ୍ଦା କରି ନିଜ ପେଟ ପୋଷିବେ। ହେଲେ ଯାହାକୁ ଭରସା କରି ସହାୟତା ମାଗିଲେ ସିଏ ହିଁ ସାହାଯ୍ୟ କରିବା ବଦଳରେ ଦୁଷ୍କର୍ମ କଲା। ଏଭଳି ସ୍ପର୍ଶକାତର ଘଟଣା ଦେଖିବାକୁ ମିଳିଛି ଭଦ୍ରକ ସହରାଞ୍ଚଳ ଥାନା ଅଞ୍ଚଳରେ। 

ସୂଚନାନୁଯାୟୀ, ଯାଜପୁର ଅଞ୍ଚଳର ଜୈନେକ ମହିଳା କିଛିମାସ ତଳେ ଶାଶୁଘରେ ନିର୍ଯାତନା ସହିନପାରି ଭଦ୍ରକ ଚାଲିଆସିଥିଲେ। ମହିଳା ଜଣକ କେତେବେଳେ ମେଡିକାଲ ବାରଣ୍ଡା ତ କେତେବେଳେ ବସଷ୍ଟାଣ୍ଡ ଆଶ୍ରୟସ୍ଥଳୀରେ ରହୁଥିଲେ। ଗତ ଶନିବାର ବିଳମ୍ବିତ ରାତିରେ ମହିଳା ଜଣକ ବସଷ୍ଟାଣ୍ଡର ଆଶ୍ରୟସ୍ଥଳୀରେ ଆଶ୍ରୟ ନେଇଥିଲେ। ଏତିକି ବେଳେ ସ୍ଥାନୀୟ ଗଙ୍ଗାଧର ଦାସ ନାମକ ଜଣେ ଯୁବକ ମହିଳାଙ୍କୁ ଘର ଯୋଗାଇ ଦେବାକୁ କହି ତାଙ୍କ ସାଙ୍ଗରେ ଯିବାକୁ କହିଥିଲେ। ମହିଳା ଜଣକ ରାଜି ନହେବାରୁ ବସଷ୍ଟାଣ୍ଡରେ ମଦୁଆ ଓ ନିଶାଡୀଙ୍କ ପାଦୁର୍ଭାବ କହି ଯୁବକ ଜଣକ ମହିଳାଙ୍କୁ ଡରାଇଥିଲେ। ଫଳରେ ମହିଳା ଜଣକ ଭୟରେ ସେହି ଯୁବକଙ୍କ ସାଙ୍ଗରେ ଆସିଥିଲେ।

ଯୁବକ ଜଣକ ମହିଳାଙ୍କ ଅସହାୟତାର ସୁଯୋଗ ନେଇ ଭଡା ଘରକୁ ନେବା ବଦଳରେ ଏକ ନିରୋଳା ଗୃହକୁ ନେଇଥିଲେ। ସେଠାରେ କେହି ନଥିବାରୁ ମହିଳାଙ୍କ ସନ୍ଦେହ ହୋଇଥିଲା। ସେ ପାଟି କରିବାରୁ ଯୁବକ ଜଣକ ଭିତର ପଟୁ କବାଟ କିଳି ମହିଳାଙ୍କ ସହ ଦୁର୍ବ୍ୟବହାର କରିଥିଲେ। କିଛି ସମୟ ପରେ ମହିଳାଙ୍କର ଚେତା ଚାଲିଯାଇଥିଲା। ଆଉ ଚେତା ଫେରିବା ପରେ ମହିଳା ଜଣକ ସକାଳୁ ପୋଲିସ ଷ୍ଟେସନରେ ପହଞ୍ଚି ଅଭିଯୋଗ କହିଥିଲେ। ପୋଲିସ ମହିଳାଙ୍କୁ ଡାକ୍ତରଖାନାରେ ଭର୍ତି କରିଥିଲା। ପୀଡ଼ିତାଙ୍କ ବୟାନ ରେକର୍ଡ କରିବା ସହ ଅଭିଯୁକ୍ତକୁ ଗିରଫ କରିଥିଲା। ତେବେ ଜଣେ ଅସହାୟ ମହିଳାଙ୍କୁ ସାହାଯ୍ୟ କରିବାକୁ କହି ଅସଦାଚରଣ କରିବା ଘଟଣା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।