ଭଦ୍ରକ,୦୫/୦୯: ୧୦୮ ଆମ୍ବୁଲାନ୍ସର ବିଚିତ୍ର ବ୍ୟବସ୍ଥା । ବୁଧବାର ବିଳମ୍ୱିତ ରାତିରେ ଅଜଣା ମହିଳାଙ୍କ ପ୍ରସବ ପରେ ରାସ୍ତା କଡରେ ପ୍ରାୟ ୬ ଘଣ୍ଟାରୁ ଅଧିକ ସମୟ ପଡ଼ି ରହିଲେ ମା ଓ ଶିଶୁ । ୨ଟି ଆମ୍ବୁଲାନ୍ସ ଫେରିବା ପରେ ତୃତୀୟ ୧୦୮ ଆମ୍ବୁଲାନ୍ସ ନେଲା ମେଡିକାଲ । ଭଦ୍ରକ ସହରର ପୋଷ୍ଟ ଅଫିସ ଛକ ନିକଟରେ ଏଭଳି ଦୃଶ୍ୟ ଦେଖିବାକୁ ମିଳିଛି ।
ସୂଚନା ମୁତାବକ, ଭଦ୍ରକ ସହରର ପୋଷ୍ଟ ଅଫିସ ଛକ ନିକଟସ୍ଥ ଏକ ଦୋକାନ ବାରଣ୍ଡାରେ ଜଣେ ଅଜଣା ମାନସିକ ବିକାର ଗ୍ରସ୍ତ ମହିଳା ସନ୍ତାନ ଜନ୍ମ ଦେଇଥିଲେ । ବୁଧବାର ବିଳମ୍ୱିତ ରାତିରେ ମହିଳା ଜଣକ ଶିଶୁଟିକୁ ଜନ୍ମ ଦେଇଥିଲେ । ଏହା ଦେଖି ସ୍ଥାନୀୟଲୋକେ ୧୦୮ ଆମ୍ବୁଲାନ୍ସକୁ କଲ୍ କରିଥିଲେ । କିଛି ସମୟ ପରେ ୧୦୮ ଆମ୍ବୁଲାନ୍ସ ଆସିଥିଲା କିନ୍ତୁ ମା ଓ ଶିଶୁଙ୍କୁ ନନେଇ ପଳାଇଥିଲା । ପରେ ଜନନୀ ଓ ଶିଶୁଙ୍କ ପାଇଁ ଉଦିଷ୍ଟ ଆମ୍ବୁଲାନ୍ସକୁ ଲୋକେ ଡାକିଥିଲେ । ପୂର୍ବପରି ଏହି ଆମ୍ବୁଲାନ୍ସ ମଧ୍ୟ ମାଆ ଏବଂ ନବଜାତ ଶିଶୁକୁ ମେଡିକାଲ ନେଇ ନଥିଲା । ଏହି କାରଣରୁ ପ୍ରାୟ ୬ ଘଣ୍ଟାରୁ ଅଧିକ ସମୟ ଦୋକାନ ବାରଣ୍ଡାରେ ପଡ଼ି ରହିଥିଲେ ମାଆ ଏବଂ ଶିଶୁ । ଶେଷରେ ଦିନ ହେବା ପରେ ଏକ ଆମ୍ବୁଲାନ୍ସ ମା ଓ ଶିଶୁଙ୍କୁ ନେଇ ମେଡିକାଲରେ ଭର୍ତ୍ତି କରିଛି ।