ନବରଙ୍ଗପୁର,୨୩/୧୦: ନିଖୋଜ ହୋଇଥିଲେ ନାବାଳକ । ୧୬ ଦିନ ପରେ ଗୁରୁସିଙ୍ଗା ଜଙ୍ଗଲରୁ ନାବାଳକର ମୃତଦେହ ଉଦ୍ଧାର କରାଯାଇଛି । ମୃତକ ଝରିଗାଁ ବ୍ଳକ ସଦର ମହକୁମାର ସୁଭାଷ ପାଣ୍ଡେଙ୍କ ୧୫ ବର୍ଷର ନାବାଳକ ପୁଅ କ୍ଷୀରଧର ପାଣ୍ଡେ ବୋଲି ଜଣାପଡ଼ିଛି । ନବରଙ୍ଗପୁର ଜିଲ୍ଲା ଝରିଗାଁ ବ୍ଳକ ଗୁରୁସିଙ୍ଗା ଜଙ୍ଗଲରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଝରିଗାଁ ବ୍ଳକ ସଦର ମହକୁମାର ସୁଭାଷ ପାଣ୍ଡେଙ୍କ ୧୫ ବର୍ଷୀୟ ନାବାଳକ ପୁଅ କ୍ଷୀରଧର ପାଣ୍ଡେ ଅକ୍ଟୋବର ୮ ତାରିଖରେ ମଧ୍ୟାହ୍ନ ଗୋଟାଏ ବେଳେ ଘରୁ ବାହାରି କୁଆଡ଼େ ଚାଲି ଯାଇଥିଲେ । ପରେ ପରିବାରଲୋକେ ନିଜ ସମ୍ପର୍କୀୟଙ୍କ ଠାରୁ ଆରମ୍ଭ କରି ବହୁ ସ୍ଥାନରେ ଖୋଜାଖୋଜି କରିଥିଲେ । ହେଲେ ପୁଅର କୌଣସି ପତ୍ତା ମିଳି ନଥିଲା । ପରେ ଅକ୍ଟୋବର ୧୦ ତାରିଖରେ ଝରିଗାଁ ଥାନାରେ ପୁଅ ନିଖୋଜ ହୋଇଥିବା ନେଇ ଲିଖିତ ଅଭିଯୋଗ କରିଥିଲେ ପରିବାରଲୋକେ ।
ତେବେ ବୁଧବାର ସକାଳୁ ଗୁରୁସିଙ୍ଗା ଜଙ୍ଗଲ ମଧ୍ୟରେ କିଛି ମହିଳା କାଠ ସଂଗ୍ରହ କରିବାକୁ ଯାଇଥିବା ବେଳେ ଏକ ଗଳିତ ଶବ ଦେଖି ଗାଁ ଲୋକଙ୍କୁ କହିଥିଲେ । ପରେ ଗାଁ ଲୋକେ ଝରିଗାଁ ପୋଲିସକୁ ଏହି ଘଟଣା ସମ୍ୱନ୍ଧରେ ଅବଗତ କରାଇଥିଲେ । ଉକ୍ତ ମୃତଦେହଟି ୧୬ ଦିନ ଧରି ନିଖୋଜ ଥିବା କ୍ଷୀରଧର ପାଣ୍ଡେଙ୍କ ହିଁ ମୃତ୍ୟୁଦେହ ବୋଲି ଜାଣିବା ପରେ ପରିବାର ଲୋକେ ଘଟଣା ସ୍ଥଳରେ ପହଞ୍ଚି ଶବକୁ ଚିହ୍ନଟ କରିଥିଲେ । ଏହା ଜାଣି ପୋଲିସ ଏକ ସାଇଣ୍ଟିଫିକ୍ ଟିମ୍ ସହ ଘଟଣାସ୍ଥଳରେ ତଦନ୍ତ ଚଳାଇଛି । ତେବେ ଏହା ଏକ ହତ୍ୟା ନା ଆତ୍ମହତ୍ୟାର ତାର ତଦନ୍ତ ଆରମ୍ଭ କରିଛି ପୋଲିସ । ବର୍ତ୍ତମାନ ପର୍ଯ୍ୟନ୍ତ ମୃତ୍ୟୁ ର କାରଣ ସ୍ପଷ୍ଟ ହୋଇନଥିବା ବେଳେ ଶବ ବ୍ୟବଚ୍ଛେଦ ରିପୋର୍ଟ ଆସିଲେ କାରଣ ସ୍ପଷ୍ଟ ହେବ ବୋଲି ପୋଲିସ ସୂଚନା ଦେଇଛି।
