ଚନ୍ଦାହାଣ୍ଡି,୨୯/୧୨ : ନବରଙ୍ଗପୁର ଜିଲ୍ଲା ଚନ୍ଦାହାଣ୍ଡି ବ୍ଲକ ଗମ୍ଭାରୀଗୁଡା ପଞ୍ଚାୟତ ଅଧିନ ଖପ୍ରାଡିହି ଗ୍ରାମର ତନ୍ତି ପରିବାର l ସରକାରୀ ସହାୟତା ଏବଂ ଜୀବିକା ମିଶିନ ଦୁରଦୃଷ୍ଟି ଅଭାବରେ ନିଜର କୌଳିକ ବୃତ୍ତି ଲୁଗାବୁଣା ଛାଡି ଦାଦନ ଯାଉଛନ୍ତି ତନ୍ତି ପରିବାର l ଏହାଛଡା ତନ୍ତି ପରିବାରର ୧୦ଜଣ ମହିଳା ମହାଲକ୍ଷ୍ମୀ ନାମକ ଏକ ସ୍ୱୟଂ ସହାୟିକା ଗୋଷ୍ଠୀ ଗଠନ କରିବା ସହ ସେମାନେ ସିଲେଇ କାମ କରି ସ୍ୱାବଲମ୍ବୀ ହୋଇଥିଲେ ମଧ୍ୟ ମିଶନ ଶକ୍ତି ଏବଂ ଜୀବିକା ମିଶନର ଏଥିପ୍ରତି କୌଣସି ନିଘା ନାହିଁ ବୋଲି ସଂଘର ସଭାନେତ୍ରୀ ପାନ ମେହେର ପ୍ରକାଶ କରିଛନ୍ତି l ଯଦି ସେମାନଙ୍କୁ ମିଶନ ଶକ୍ତି ଏବଂ ଜୀବିକା ମିଶନ ତରଫରୁ ତାଲିମ୍ ଏବଂ ସରକାରୀ ସହାୟତା ପ୍ରଦାନ କରାଯାଏ ସେମାନେ ନିଜର କୌଳିକ ବୃତ୍ତି ଲୁଗାବୁଣାକୁ ପୁଣି ଥରେ ଆରମ୍ଭ କରିବେ ବୋଲି ଦମ୍ଭର ସହ ପ୍ରକାଶ କରିଛନ୍ତି l ଏ ଦିଗରେ ଜିଲ୍ଲା ପ୍ରଶାସନ ତୁରନ୍ତ ଦୃଷ୍ଟି ଦେଇ ପଦକ୍ଷେପ ନେବାକୁ ବିଭିନ୍ନ ମହଲରେ ଦାବି କରାଯାଇଛି l
ସୂଚନା ମୁତାବକ ଗମ୍ଭାରୀଗୁଡା ପଞ୍ଚାୟତ ଅଧିନ ଖପ୍ରାଡିହି ଗ୍ରାମରେ ୬୦ରୁ ୮୦ଦଶକ ପର୍ଯ୍ୟନ୍ତ ଗ୍ରାମରେ ରହିଥିବା ୩୦ ରୁ ୪୦ତନ୍ତି ପରିବାର ଲୁଗାବୁଣି ନିଜର ଗୁଜୁରାଣ ମେଣ୍ଟାଇବା ସହ ଏଠାରେ ବିଶେଷ ଲୋକପ୍ରିୟତା ହାସଲ କରି ଥିବା ନେଇ ବରିଷ୍ଠ ନାଗରିକ ତଥା ବରିଷ୍ଠ ମହିଳା ବୁଣାକାର ପଦ୍ମା ମେହେର ପ୍ରକାଶ କରିଛନ୍ତି l ସେ ସମୟରେ ତାଙ୍କ ସ୍ୱାମୀ ଚୈତନ୍ୟ ମେହେର ଲୁଗାବୁଣା କାର୍ଯ୍ୟ କରୁଥିବାବେଳେ ସେ ସୁତା କାମ ଏବଂ ରଙ୍ଗ ଦେବାରେ ସହାୟତା କରୁ ଥିଲେ l ଲୁଗା ବୁଣିବା ପାଇଁ ଏକ କାଠ ଯନ୍ତ୍ର (ଡଙ୍ଗି) ଏବଂ ସୁତା ସଜାଇବା ପାଇଁ ଯନ୍ତ୍ର (ବବିନ)ର ଦରକାର ପଡୁଥିଲା l ସେ ସମୟରେ ଏଠାରେ ସୂତା ମିଳୁ ନ ଥିବାରୁ ପଡୋଶୀ ଛାତିଶଗଡ଼ ରାୟପୁର ଉପରେ ନିର୍ଭର କରିବାକୁ ପଡୁଥିଲା ବୋଲି ସେ ପ୍ରକାଶ କରିଛନ୍ତି l
କପଟା ( ଶାଢ଼ୀ ) ୫ଟଙ୍କା ରଙ୍ଗ ବେରଙ୍ଗ ଶାଢ଼ୀ (ମସୁରୀ ) ୭ଟଙ୍କା ଭାଳୁଆ ଶାଢ଼ୀ ଉନ୍ନତ ଧାରଣର ୧୦ଟଙ୍କା, ଗାମୁଛା ୫ଟଙ୍କା ଏବଂ ଧୋତି ୧୦ଟଙ୍କାରେ ବିକ୍ରି ହେଉଥିବା ନେଇ ସେ ପ୍ରକାଶ କରିଛନ୍ତି l ଏଥିରେ ସେମାନଙ୍କ ପରିବାର ବେଶ ହସଖୁସିରେ ଚଳୁଥିଲେ l ତାଙ୍କ ସ୍ୱାମୀ ସ୍ୱର୍ଗତ ଚୈତନ୍ୟ ମେହେରଙ୍କ ବ୍ୟତୀତ ସ୍ୱର୍ଗତ ଗୌର ମେହେର, ସ୍ୱର୍ଗତ ସୌରା ମେହେର କଇତନ ମେହେର ଏକ ଭଲ ବୁଣାକାର ରହିଥିଲେ l ଆଧୁନିକ କାରିଗରି କୌଶଳ ଅଭାବରେ ଲୋକଙ୍କ ଚାହିଦା କମିଯିବା ସହ ସରକାରୀ ପ୍ରୋତ୍ସାହନ ଅଭାବରେ ବର୍ତ୍ତମାନର ଯୁବ ପୀଢ଼ି ଏହି ବୃତ୍ତି ପ୍ରତି ମୁହଁ ଫେରାଇ ନିଜର ପେଟପାଟଣା ପାଇଁ ଦାଦନ ଯାଉଛନ୍ତି l ବୁଣାକାରଙ୍କ ପାଇଁ ସରକାରଙ୍କ ବିଭିନ୍ନ ଯୋଜନା ରହିଥିଲେ ମଧ୍ୟ ଏମାନଙ୍କ ଉପରେ କାହାର ନଜର ନାହିଁ l ଏ ସମ୍ପର୍କରେ ଜିଲ୍ଲା ମିଶନ ଶକ୍ତି ମହାସଂଘ ସଦସ୍ୟା(ଡିଏଲଏଫ) କୌଶଲ୍ୟା ପାଣ୍ଡେ ସେମାନଙ୍କ ସ୍ୱୟଂ ସହାୟିକା ଗୋଷ୍ଠୀଙ୍କୁ ମିଶନ ଶକ୍ତି ମାଧ୍ୟମରେ ତାଲିମ୍ ପ୍ରଦାନ ସହ ସରକାରୀ ପ୍ରୋତ୍ସାହନ ଯୋଗାଇଦେବା ପାଇଁ ଜିଲ୍ଲା ମିଶନ ଶକ୍ତି ମହାସଙ୍ଘ ବୈଠକରେ କଥା ଉପସ୍ଥାପନା କରିବା ସହ ସେମାନେ ବୁଣାକାର ବୃତ୍ତିକୁ ଆପଣେଇ କିପରି ରୋଜଗାର କ୍ଷମ ହୋଇପାରିବେ ସେ ବିଶେଷ ଧ୍ୟାନ ଦେବେ ବୋଲି ଗଣମାଧ୍ୟମକୁ ପ୍ରକାଶ କରିଛନ୍ତି l
ଏ ଦିଗରେ ଜିଲ୍ଲା ପ୍ରଶାସନ ତୁରନ୍ତ ଦୃଷ୍ଟି ଦେଇ ପଦକ୍ଷେପ ନେବାକୁ ତରୁଣୀ ମେହେର, ଶେଷଦେବ ମେହେର ଚଞ୍ଚଳା ମେହେର, ତିଲୋତ୍ତମା ମେହେର, ବିଏଲଏଫ ସମ୍ପାଦିକା ପ୍ରତିମା ଦାସ ପ୍ରମୁଖ ଦାବି କରିଛନ୍ତି l
