ଖଲ୍ଲିକୋଟ, ୧୧/୦୪: ସରକାରୀ ବିଦ୍ୟାଳୟ ପରିସରରେ ଥିବା ଗଛରୁ ମଧ୍ୟ ରାତ୍ରୀରେ ଗୋଟିଏ ଗୋଷ୍ଠୀ ନଡ଼ିଆ ତୋଳୁଥିଲେ। ଏହି ସମୟରେ ଗ୍ରାମର ଅନ୍ୟ ଗୋଷ୍ଠୀର ଯୁବକମାନେ ପହଞ୍ଚି ବିରୋଧ କଲେ। ଏହାକୁ ନେଇ ଆରମ୍ଭ ହୋଇଗଲା ଝଗଡା। ଦୁଇ ଗୋଷ୍ଠୀ ପରସ୍ପର ଉପରେ ଆକ୍ରମଣ କଲେ। ଗଣ୍ଡଗୋଳରେ ୪ ଜଣଙ୍କ ମୁଣ୍ଡ ଫାଟିଲା। ଆଉ ମାମଲା ଥାନାକୁ ଯିବା ପରେ ପୁଲିସ ଉଭୟପକ୍ଷର ୮ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି।
ଏଭଳି ଘଟଣା ଘଟିଛି ଖଲ୍ଲିକୋଟ ଥାନା ଅନ୍ତର୍ଗତ ମାଣିକପୁର ଗ୍ରାମରେ। ଖବର ମୁତାବକ, ମାଣିକପୁର ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ ପରିସରରେ ଥିବା ଗଛରୁ ଗ୍ରାମର କିଛି ଯୁବକ ଗତକାଲି ମଧ୍ୟରାତ୍ରୀରେ ନଡ଼ିଆ ତୋଳୁଥିଲେ।ଏହି ସମୟରେ ଗ୍ରାମର ଅନ୍ୟ ଏକ ଗୋଷ୍ଠୀର ଯୁବକ ମାନେ ପହଞ୍ଚି ଏହାକୁ ବିରୋଧ କରିଥିଲେ। ଏହାକୁ ନେଇ ଉଭୟ ଗୋଷ୍ଠୀ ମଧ୍ୟରେ ଝଗଡା ଆରମ୍ଭ ହୋଇଯାଇଥିଲା। ଆଉ ଉଭୟ ଗୋଷ୍ଠୀ ପରସ୍ପର ଉପରେ ଆକ୍ରମଣ ଆରମ୍ଭ କରିଦେଇଥିଲେ। ଗଣ୍ଡଗୋଳରେ ୪ ଜଣଙ୍କ ମୁଣ୍ଡ ଫାଟିଥିଲା। ଏହି ଘଟଣାକୁ ନେଇ ଉଭୟପକ୍ଷରୁ ଖଲ୍ଲିକୋଟ ଥାନାରେ ଅଭିଯୋଗ ଦାଏର କରାଯାଇଥିଲା।
ଅଭିଯୋଗକୁ ଭିତ୍ତି କରି ଖଲ୍ଲିକୋଟ ଥାନା ପୁଲିସ କେସ ନମ୍ବର ୨୮୪ ଏବଂ ୨୮୫/୨୦୨୫ ଅନୁଯାୟୀ ଦୁଇଟି ପୃଥକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଥିଲା। ଆଜି ପୁଲିସ ଉଭୟ ପକ୍ଷରୁ ୪ ଜଣ ଲେଖାଏଁ ଗଣ୍ଡଗୋଳକାରୀଙ୍କୁ ଗିରଫ କରି କୋର୍ଟ ଚାଲାଣ କରିଛି। ଗିରଫ ୮ ଜଣ ଯୁବକ ହେଲେ ମାଣିକପୁର ଗ୍ରାମର ଚନ୍ଦ୍ରଭାନୁ ମଲିକ, ଶୁଭେନ୍ଦୁ ମଲିକ, ନିଲୁ ପଲେଇ,ଯୁଗଳ ମଲିକ, ସତ୍ୟବ୍ରତ ମଲିକ,ବାଦଲ ଗୌଡ଼, ଶୁଭଙ୍କର ଗୌଡ଼ ଓ ନାଗେଶ୍ୱର ଦୁହୁଡି ବୋଲି ଆଇଆଇସି ରମେଶ କୁମାର ପ୍ରଧାନ ସୂଚନା ଦେଇଛନ୍ତି।
