ଭୁବନେଶ୍ୱର,୨୩/୦୯: ଭରତପୁର ଥାନା ମାମଲାର ବିଚାର ବିଭାଗୀୟ ତଦନ୍ତ ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ରବିବାର ଲୋକସେବା ଭବନରେ ମୁଖ୍ୟମନ୍ତ୍ରୀ ମନ୍ତ୍ରିସ୍ତରୀୟ କମିଟି ବୈଠକ ପରେ ଏହି ନିର୍ଦ୍ଦେଶ ଦେଇଛନ୍ତି । ବିଚାରପତି ଜଷ୍ଟିସ୍ ଚିତ୍ତରଂଜନ ଦାଶ ଏହି ତଦନ୍ତ ଦାୟିତ୍ୱ ନେବେ । ୬୦ ଦିନ ମଧ୍ୟରେ ରିପୋର୍ଟ ପ୍ରଦାନ କରିବା ପାଇଁ କମିଶନଙ୍କୁ ଅନୁରୋଧ କରାଯାଇଛି । ଏଥି ସହ କ୍ରାଇମବ୍ରାଞ୍ଚ ତଦନ୍ତର ମନିଟରିଂ କରିବେ ହାଇକୋର୍ଟର ଜଣେ ବିଚାରପତି । ଏଥି ପାଇଁ ହାଇକୋର୍ଟଙ୍କୁ ଅନୁରୋଧ କରାଯାଇଛି ।
ବୈଠକରେ ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓ, ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା, ରାଜସ୍ୱ ମନ୍ତ୍ରୀ ସୁରେଶ ପୂଜାରୀ, ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ଯୋଗ ଦେଇଥିଲେ । ଏଥି ସହ ଆଡଭୋକେଟ୍ ଜେନେରାଲ ପୀତାମ୍ବର ଆଚାର୍ଯ୍ୟ, ମୁଖ୍ୟ ଶାସନ ସଚିବ ମନୋଜ ଆହୁଜା, ମୁଖ୍ୟମନ୍ତ୍ରୀଙ୍କ ଅତିରିକ୍ତ ମୁଖ୍ୟ ସଚିବ ନିକୁଞ୍ଜ ବିହାରୀ ଧଳ, ଗୃହ ବିଭାଗର ଅତିରିକ୍ତ ମୁଖ୍ୟ ସଚିବ ସତ୍ୟବ୍ରତ ସାହୁ, ପୁଲିସ ଡିଜି ୱାଇ. ବି. ଖୁରାନିଆ ଉପସ୍ଥିତ ଥିଲେ ।
ପୂର୍ବରୁ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକ୍ରମେ ରାଜ୍ୟ ଅତିଥି ଭବନରେ ନିର୍ଯ୍ୟାତନାର ଶିକାର ହୋଇଥିବା ସେନା ଅଧିକାରୀ ଓ ମହିଳା ବନ୍ଧୁଙ୍କ ସହ ଉପରୋକ୍ତ ୪ ଜଣ ମନ୍ତ୍ରୀ ଆଲୋଚନା କରିଥିଲେ । ମହିଳାଙ୍କ ବାପା ଓ ବରିଷ୍ଠ ସେବା ନିବୃତ୍ତ ସେନା ଅଧିକାରୀମାନେ ଉପସ୍ଥିତ ଥିଲେ । ବୈଠକରେ ଘଟଣାର ସମସ୍ତ ଦିଗ ଉପରେ ଆଲୋଚନା ହୋଇଥିଲା । ଏହି ଘଟଣାରେ ସମ୍ପୃକ୍ତ ସବୁ ପୁଲିସ୍ ଅଧିକାରୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ହେବ ବୋଲି ମନ୍ତ୍ରୀମାନେ ପ୍ରତିଶ୍ରୁତି ଦେଇଥିଲେ ।
ସୂଚନାଯୋଗ୍ୟ ଭୁବନେଶ୍ୱରର ଭରତପୁର ଥାନାରେ ସେନାଧିକାରୀ ଓ ତାଙ୍କ ବାନ୍ଧବୀଙ୍କୁ ନିର୍ଯାତନା ଅଭିଯୋଗ ଓ ଏହା ଉପରେ ତୁରନ୍ତ କାର୍ଯ୍ୟାନୁଷ୍ଠାନ ଦାବି କରି ଓଡ଼ିଶା ହାଇକୋର୍ଟ ମୁଖ୍ୟ ବିଚାରପତିଙ୍କ ନିକଟକୁ ଲେଖାଯାଇଥିବା ଏକ ଚିଠି ଆଧାରରେ ଉଚ୍ଚ ନ୍ୟାୟାଳୟ ନିଜ ଆଡ଼ୁ ଏକ ଜନସ୍ୱାର୍ଥ ସମ୍ବଳିତ ମାମଲା ରୁଜୁ କରିଛନ୍ତି । ଏହି ମାମଲା ଶୁଣାଣି ସୋମବାର ହେବ ବୋଲି ଧାର୍ଯ୍ୟ ହୋଇଛି । ସେନାବାହିନୀ ମଧ୍ୟଭାରତ ଏରିଆ ମୁଖ୍ୟାଳୟର ଲେଫ୍ଟନାଣ୍ଟ ଜେନେରାଲ ପିଏସ୍ ଶେଖାୱତ ହାଇକୋର୍ଟ ମୁଖ୍ୟ ବିଚାରପତି ଜଷ୍ଟିସ୍ ଚକ୍ରଧାରୀ ଶରଣ ସିଂହଙ୍କ ନିକଟକୁ ଚିଠିଟି ଲେଖିଥିଲେ ।
ସେଥିରେ ସେ ଲେଖିଛନ୍ତି, ଗତ ୧୫ ତାରିଖ ରାତିରେ ଭରତପୁର ଥାନାକୁ ସେନାଧିକାରୀ ଓ ତାଙ୍କ ବାନ୍ଧବୀ (ସେନାର ଜନୈକ ବ୍ରିଗେଡିୟରଙ୍କ ଝିଅ) କିଛି ଅସାମାଜିକଙ୍କ ବିରୋଧରେ ଅଭିଯୋଗ କରିବାକୁ ଯାଇଥିଲେ ମଧ୍ୟ ତାଙ୍କ ଅଭିଯୋଗ ରଖାଯାଇନଥିଲା । ବରଂ ନିର୍ଯାତନା ଓ ଅସଦାଚରଣ କରାଯାଇଥିଲା । ସେନାକୁ କୌଣସି ସୂଚନା ନ ଦେଇ ସେନାଧିକାରୀଙ୍କୁ ୧୪ ଘଣ୍ଟା ହାଜତରେ ରଖାଯାଇଥିଲା । ସେନାର ହସ୍ତକ୍ଷେପ ପରେ ସେ ହାଜତରୁ ମୁକୁଳିଥିଲେ । ପୁଲିସର ଏଭଳି କାମ ସେନାର ମର୍ଯ୍ୟାଦା ଉପରେ ଅଞ୍ଚଳ ଆଣିଛି । ମହିଳାଙ୍କୁ ବିନା ଦୋଷରେ ଜେଲ ପଠାଯାଇଥିଲା । ପୁଲିସ ନିର୍ଯାତନାରେ ସେ ଆହତ ହୋଇଥିଲେ ମଧ୍ୟ ଏବଂ ଜେଲ୍ ଡାକ୍ତର ଚିକିତ୍ସା ପାଇଁ ପରାମର୍ଶ ଦେବା ସତ୍ତେ୍ୱ ଝାରପଡ଼ା ଜେଲ୍ କର୍ତ୍ତୃପକ୍ଷ ଚିକିତ୍ସା ସୁବିଧା ନ ଦେଇ ଅମାନବିକତା ଦେଖାଇଛନ୍ତି । ହାଇକୋର୍ଟଙ୍କ ହସ୍ତକ୍ଷେପ ପରେ ମହିଳାଙ୍କୁ ଜାମିନ ମିଳିଥିଲା ।
ଘଟଣାର ନିରପେକ୍ଷ ତଦନ୍ତ, ଅଭିଯୁକ୍ତଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ, ସୁପ୍ରିମକୋର୍ଟଙ୍କ ନିର୍ଦ୍ଦେଶ ଆଧାରରେ ସବୁ ଥାନାରେ ସିସିଟିଭି ବାଧ୍ୟତାମୂଳକ କରିବା, ଚିକିତ୍ସା ସୁବିଧା ଦେଇ ନଥିବା ଜେଲ୍ କର୍ତ୍ତୃପକ୍ଷଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଚିଠିରେ ଅନୁରୋଧ କରାଯାଇଛି ।