ମୁମ୍ବାଇ,୧୧/୦୧: ଆଗାମୀ ଇଂଲଣ୍ଡ ବିପକ୍ଷ ଘରୋଇ ସୀମିତ ଓଭର ସିରିଜ ଓ ଆଇସିସି ଚାମ୍ପିଅନ୍ସ ଟ୍ରଫି ପାଇଁ ଖୁବ୍ ଶୀଘ୍ର ଦଳ ଘୋଷଣା କରାଯିବ । ଚାମ୍ପିଅନ୍ସ ଟ୍ରଫି ପାଇଁ ଆସନ୍ତା ୧୨ତାରିଖ ସୁଦ୍ଧା ପ୍ରତ୍ୟେକ ବୋର୍ଡ ସମ୍ଭାବ୍ୟ ଦଳ ତାଲିକା ଆଇସିସିକୁ ପ୍ରଦାନ କରିବେ । ଫ୍ରେବୁଆରୀ ୧୨ ତାରିଖ ମଧ୍ୟରେ ଦଳରେ ଅଦଳ ବଦଳ ହୋଇପାରିବ । ତେଣୁ ରବିବାର ମଧ୍ୟରେ ଭାରତୀୟ ଦଳ ଘୋଷଣା କରାଯିବ । ଅଜିତ ଅଗରକରଙ୍କ ଅଧ୍ୟକ୍ଷତାରେ ଚୟନ କମିଟି ବୈଠକ ଆୟୋଜନ କରାଯାଇ ଉଭୟ ଇଂଲଣ୍ଡ ବିପକ୍ଷ ସିରିଜ ଓ ଚାମ୍ପିଅନ୍ସ ଟ୍ରଫି ପାଇଁ ଦଳ ଚୟନ କରାଯିବ । ଇଂଲଣ୍ଡ ବିପକ୍ଷରେ ଭାରତ ୫ଟି ଟି-ଟ୍ୱେଣ୍ଟି ଓ ୩ଟି ଦିନିକିଆ ଖେଳିବ । ଦକ୍ଷିଣ ଆଫ୍ରିକାରେ ସିରିଜ ଜିତିଥିବା ଟି-ଟ୍ୱେଣ୍ଟି ଦଳରେ ବିଶେଷ ପରିବର୍ତ୍ତନ ହେବା ସମ୍ଭାବନା ନାହିଁ । କିନ୍ତୁ ଦିନିକିଆ ଦଳ ଚୟନ କରିବା ସହଜ ହେବ ନାହିଁ । ଦିନିକିଆ ଦଳରେ ବହୁ ଖେଳାଳି ଦୌଡ଼ରେ ରହିଛନ୍ତି । ମୁଖ୍ୟତଃ ପେସ୍ ବୋଲର, ୱିକେଟ୍ କିପର ଓ ଓପନର ସ୍ଥାନ ପାଇଁ ଚୟନ କମିଟି ମଧ୍ୟରେ ଜୋରଦାର ଆଲୋଚନା ହେବା ଆଶା କରାଯାଉଛି ।
୨୦୨୩ ଦିନିକିଆ ବିଶ୍ୱକପ୍ ପରେ ଭାରତ ମୋଟ୍ ୬ଟି ଦିନିକିଆ ମ୍ୟାଚ୍ ଖେଳିଛି । ଗତବର୍ଷ ଦଳ ମାତ୍ର ୩ଟି ଦିନିକିଆ ଖେଳିଥିଲା । ତେଣୁ ପୂର୍ବ ପ୍ରଦର୍ଶନକୁ ଆଧାର କରି ଦଳ ପ୍ରସ୍ତୁତ କରାଯାଇପାରିବ ନାହିଁ ।
ଓପନର: ଦୌଡ଼ରେ ଆଗୁଆ ଜୈସ୍ୱାଲ
ଦିନିକିଆରେ ରୋହିତ ଶର୍ମା ଓ ଶୁଭମନ ଗିଲ ମୁଖ୍ୟତଃ ଓପନ କରୁଛନ୍ତି । ଗତ ଦିନିକିଆ ବିଶ୍ୱକପ୍ରେ ଉଭୟ ଓପନ କରିଥିଲେ। ମାତ୍ର ଏହାପରେ ଡିସେମ୍ବରରେ ଦକ୍ଷିଣ ଆଫ୍ରିକାରେ ଅନୁଷ୍ଠିତ ୩ମ୍ୟାଚ୍ ବିଶିଷ୍ଟ ଦିନିକିଆ ସିରିଜରୁ ଉଭୟ ରୋହିତ ଓ ଗିଲଙ୍କୁ ବିଶ୍ରାମ ଦିଆଯାଇଥିଲା । ସେମାନଙ୍କ ସ୍ଥାନରେ ଋତୁରାଜ ଗାଏକୱାଡ୍, ସାଇ ସୁଦର୍ଶନ ଓ ରଜତ ପାତିଦାର ଓପନ କରିଥିଲେ । ସେହିପରି ଗତ ବର୍ଷ ଶ୍ରୀଲଙ୍କା ଯାତ୍ରା କରି ଭାରତ ୩ଟି ଦିନିକିଆ ଖେଳିଥିଲା । ହେଲେ ଗିଲ୍ଙ୍କୁ ଏହି ସିରିଜରୁ ବାଦ ଦିଆଯାଇଥିଲା ।
ଏହାପରେ ଗିଲ୍ ବାଂଲାଦେଶ ବିପକ୍ଷ ଟେଷ୍ଟ ସିରିଜରେ ଏକ ଶତକ ଅର୍ଜନ କରିଥିଲେ । କିନ୍ତୁ ବର୍ଡର-ଗାଭାସ୍କର ଟ୍ରଫିରେ ଭଲ ଆରମ୍ଭ ସତ୍ତେ୍ୱ ସେ ବଡ଼ ଇନିଂସ ଖେଳିବାରେ ବିଫଳ ହୋଇଥିଲେ ।
ଏହି ସମୟ ମଧ୍ୟରେ ଯଶସ୍ୱୀ ଜୈସ୍ୱାଲ ଦକ୍ଷ ଓପନର ଭାବେ ଉଭା ହୋଇଥିଲେ ଓ ସବୁ ଫର୍ମାଟ୍ରେ ଓପନ କରିବାକୁ ପ୍ରସ୍ତୁତ ଥିବା ପ୍ରମାଣ କରିଥିଲେ । ଜୈସ୍ୱାଲ ଏପର୍ଯ୍ୟନ୍ତ ଦିନିକିଆ ଦଳରେ ସ୍ଥାନ ପାଇ ନାହାନ୍ତି । କିନ୍ତୁ ତାଙ୍କୁ ଆଗାମୀ ଇଂଲଣ୍ଡ ବିପକ୍ଷ ସିରିଜରେ ଓପନର ଭାବେ ପଦାର୍ପଣ ସୁଯୋଗ ମିଳିପାରେ । ଚାମ୍ପିଅନ୍ସ ଟ୍ରଫିରେ ଗିଲ୍ ଓ ରୋହିତ ମୁଖ୍ୟ ଓପନର ରହିବେ ଓ ଜୈସ୍ୱାଲଙ୍କୁ ତୃତୀୟ ଓପନର ଭାବେ ଚୟନ କରାଯିବାର ଯଥେଷ୍ଟ ସମ୍ଭାବନା ରହିଛି । ଚାମ୍ପିଅନ୍ସ ଟ୍ରଫିରେ ରୋହିତ ଅଧିନାୟକ ରହିବେ । ତେଣୁ ସେ ଓପନ କରିବା ନିଶ୍ଚିତ । ଦ୍ୱିତୀୟ ଓପନର ପାଇଁ ଗିଲଙ୍କୁ ଜୈସ୍ୱାଲ କଡ଼ା ଟକ୍କର ଦେବେ ।
ଘରୋଇ ଦିନିକିଆରେ ଜୈସ୍ୱାଲ ଦମଦାର ପ୍ରଦର୍ଶନ କରିଛନ୍ତି । ସେ ୩୨ଟି ଦିନିକିଆ ମ୍ୟାଚ୍ ଖେଳି ୫୪ହାରରେ ମୋଟ୍ ୧୫୧୧ ରନ୍ ସଂଗ୍ରହ କରିଛନ୍ତି ।
ସୁରକ୍ଷିତ ନାହିଁ ଜାଡେଜାଙ୍କ ସ୍ଥାନ
ଗତ ୨୦୨୩ ବିଶ୍ୱକପ୍ ପରେ ରବିନ୍ଦ୍ର ଜାଡେଜା କୌଣସି ଦିନିକିଆ ଖେଳି ନାହାନ୍ତି । ସେ ଟିଟ୍ୱେଣ୍ଟି ଫର୍ମାଟରୁ ମଧ୍ୟ ଅବସର ନେଇ ସାରିଛନ୍ତି । ଦିନିକିଆ ଦଳରେ ତାଙ୍କ ସ୍ଥାନକୁ ନେଇ ଆଲୋଚନ ହେବ । କାରଣ ଜାଡେଜାଙ୍କୁ ଅଲ୍ରାଉଣ୍ଡର ଭାବେ ଖେଳାଯାଉଛି । ଏହି ସ୍ଥାନ ପାଇଁ ଦୌଡ଼ରେ ହାର୍ଦ୍ଦିକ ପାଣ୍ଡ୍ୟା, ନୀତିଶ କୁମାର ରେଡ୍ଡୀ, ୱାସିଂଟନ ସୁନ୍ଦର, ଅକ୍ଷର ପଟେଲ, ରିୟାନ ପରାଗ ଓ ଶିବମ ଦୁବେଙ୍କ ପରି ଅଲ୍ରାଉଣ୍ଡର ରହିଛନ୍ତି ।
ପାଣ୍ଡ୍ୟା ଦଳକୁ ଫେରୁଥିବାରୁ ଅଲ୍ରାଉଣ୍ଡର ସ୍ଥାନ ପାଇଁ ପ୍ରତିଦ୍ୱନ୍ଦ୍ୱିତା ବଢି ଯାଇଛି। ଭାରତ ଦୁବାଇରେ ଚାମ୍ପିଅନ୍ସ ଟ୍ରଫିର ସମସ୍ତ ମ୍ୟାଚ୍ ଖେଳିବ । ସେଠାକାର ପିଚ୍ ସ୍ପିନରଙ୍କ ପାଇଁ ଅନୁକୂଳ । ହେଲେ ପାଣ୍ଡ୍ୟା ଦଳରେ ସ୍ଥାନ ପାଇବା ନିଶ୍ଚିତ । ବର୍ତ୍ତମାନ ନୀତିଶ ଓ ସୁନ୍ଦର ଚମତ୍କାର ଫର୍ମରେ ରହିଛନ୍ତି । ତେଣୁ ଜାଡେଜା ଦିନିକିଆ ଦଳରେ ସ୍ଥାନ ପାଇବା ନେଇ ଆଶଙ୍କା ଦେଖା ଦେଇଛି ।
ଦ୍ୱିତୀୟ ୱିକେଟ କିପର ଦୌଡ଼
ଭାରତ ଦିନିକିଆ ଦଳରେ ୨ଜଣ ୱିକେଟ୍ କିପରଙ୍କୁ ସ୍ଥାନ ଦେବ । ମାତ୍ର ଦୌଡ଼ରେ ରହିଛନ୍ତି ୪ ୱିକେଟ୍ କିପର । ରିଷଭ ପନ୍ତ ଓ କେଏଲ ରାହୁଲ ଆଗରେ ରହିଥିଲେ ହେଁ ଇଶାନ କିଷନ ଓ ସଞ୍ଜୁ ସାମସନ ମଧ୍ୟ ଦିନିକିଆ ଦଳରେ ସ୍ଥାନ ପାଇବାକୁ ଯୋଗ୍ୟ । କିଷନ ବିଶ୍ୱକପ୍ ଦଳରେ ଥିଲେ । ସାମସନ ଗତ ଦକ୍ଷିଣ ଆଫ୍ରିକା ବିପକ୍ଷ ଟି-ଟ୍ୱେଣ୍ଟି ସିରିଜରେ ୨ଟି ଶତକ ଅର୍ଜନ କରିଥିଲେ । ୨୦୨୩ରେ ଅନୁଷ୍ଠିତ ଦକ୍ଷିଣ ଆଫ୍ରିକା ବିପକ୍ଷ ଦିନିକିଆ ସିରିଜରେ ମଧ୍ୟ ସାମସନ ଏକ ଶତକ ଅର୍ଜନ କରିଥିଲେ । ତେଣୁ ଉଭୟ ଦିନିକିଆ ଦଳରେ ସ୍ଥାନ ପାଇବାକୁ ହକ୍ଦାର ।
ଚିନ୍ତାରେ ପକାଇଛି ପେସ ବୋଲିଂ
ବିଭାଗ ଦିନିକିଆ ଦଳ ପାଇଁ ପେସ୍ ବୋଲିଂ ବିଭାଗ ପ୍ରସ୍ତୁତ କରିବା କଷ୍ଟକର ହେବ । କାରଣ ଯଶପ୍ରୀତ ବୁମରା ସମ୍ପ୍ରତି ଆହତ ଅଛନ୍ତି । ମହମ୍ମଦ ସାମି ଫିଟ୍ ହୋଇ ଖେଳ ଆରମ୍ଭ କରିଥିଲେ ହେଁ ଏନ୍ସିଏ ତାଙ୍କ ଅନ୍ତର୍ଜାତୀୟ ମ୍ୟାଚ୍ ଖେଳିବା ପାଇଁ ଫିଟନେସ ପ୍ରମାଣ ପତ୍ର ଦେଇ ନାହିଁ ।
ଅସ୍ତ୍ରୋପଚାର ପରେ ଫିଟ୍ ହୋଇ ସାମି ଗୋଟିଏ ରଣଜୀ ଟ୍ରଫି ମ୍ୟାଚ୍, ୯ଟି ଟି-ଟ୍ୱେଣ୍ଟି ଓ ବିଜୟ ହଜାରେ ଟ୍ରଫିର କିଛି ଦିନିକିଆ ଖେଳି ସାରିଛନ୍ତି । ତଥାପି ତାଙ୍କ ଉପରେ ଏନ୍ସିଏ କୌଣସି ନିଷ୍ପତ୍ତି ନେଇ ନାହିଁ । ତାଙ୍କ ଆଣ୍ଠୁରେ ସାମାନ୍ୟ ଫୁଲା ରହୁଥିବା ଗତ ବର୍ଡର-ଗାଭାସ୍କର ଟ୍ରଫି ଟେଷ୍ଟ ସିରିଜ ସମୟରେ ରୋହିତ ପ୍ରକାଶ କରିଥିଲେ ।
ଉଭୟ ଫିଟ୍ ହୋଇ ନପାରିଲେ ମହମ୍ମଦ ସିରାଜ ପେସ୍ ବୋଲିଂ ବିଭାଗ ସମ୍ଭାଳିବେ । ତାଙ୍କ ବ୍ୟତୀତ ଅର୍ଶଦୀପ ସିଂହ ଦଳରେ ସ୍ଥାନ ପାଇବା ନିଶ୍ଚିତ । ଗତ ୨୦୨୩ ଦକ୍ଷିଣ ଆଫ୍ରିକା ଗସ୍ତରେ ସେ ୩ଟି ଦିନିକିଆ ଖେଳି ୧୦ଟି ୱିକେଟ୍ ନେଇଥିଲେ । ପାଣ୍ଡ୍ୟା ତୃତୀୟ ପେସ୍ ବୋଲର ଭୂମିକାରେ ଅବତ୍ତୀର୍ଣ୍ଣ ହେବେ । ଏମାନଙ୍କ ବ୍ୟତୀତ ପ୍ରସିଦ୍ଧ କ୍ରିଷ୍ଣା, ମୁକେଶ କୁମାର ଓ ହର୍ଷିତ ରାଣା ଦୌଡ଼ରେ ରହିବେ ।
ସ୍ପିନ ବିଭାଗରେ ଏକାଧିକ ପ୍ରତିଦ୍ୱନ୍ଦ୍ୱୀ
ସ୍ପିନ ବିଭାଗରେ ପ୍ରବଳ ଗହଳି ଲାଗି ରହିଛି । ସୀମିତ ଓଭର କ୍ରିକେଟ୍ ପାଇଁ ବହୁ ସ୍ପିନର ପ୍ରସ୍ତୁତ ରହିଛନ୍ତି । ତଥାପି ଚୟନ କମିଟି କୁଲଦୀପ ଯାଦବଙ୍କ ଫିଟନେସ ରିପୋର୍ଟକୁ ଅପେକ୍ଷା କରିଛି । କୁଲଦୀପ ଗତ ଅକ୍ଟୋବରରେ ହାର୍ନିଆ ଅସ୍ତ୍ରୋପଚାର କରିଥିଲେ । ଏହା ପରଠୁ ସେ କୌଣସି ପ୍ରତିଦ୍ୱନ୍ଦ୍ୱିତାମୂଳକ ମ୍ୟାଚ୍ ଖେଳି ନାହାନ୍ତି । ସ୍ପିନ ବିଭାଗ ପାଇଁ ଜାଡେଜା, ଅକ୍ଷର ଓ ସୁନ୍ଦରଙ୍କ ବ୍ୟତୀତ କୁଲଦୀପ ଓ ବରୁଣ ଚକ୍ରବର୍ତ୍ତୀ ଦୌଡ଼ରେ ରହିବେ । କୁଲଦୀପ ଫିଟ୍ ଘୋଷିତ ନହେଲେ ବରୁଣ ସ୍ଥାନ ପାଇବା ନିଶ୍ଚିତ । ଚଳିତ ବିଜୟ ହଜାରେ ଟ୍ରଫିରେ ସେ ତାମିଲନାଡୁକୁ ପ୍ଲେ- ଅଫରେ ପହଞ୍ଚାଇଥିଲେ ।
