ନୂଆଦିଲ୍ଲୀ: ମହାକାଶ ମିଶନ କ୍ଷେତ୍ରରେ ଭାରତ ମଜଭୁତର ସହ ଆଗକୁ ବଢ଼ୁଛି । ଚନ୍ଦ୍ରଯାନ-୩ର ବଡ଼ ସଫଳତା ପରେ ଏ‌ବେ ଭାରତ ଆଉ ଦୁଇ ପାଦ ଆଗକୁ ଯିବାକୁ ପ୍ରସ୍ତୁତ ହେଉଛି । ଆଜି (ବୁଧବାର) ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ବସିଥିବା କ୍ୟାବିନେଟ୍‌ ବୈଠକରେ ଚନ୍ଦ୍ରଯାନ-୪ ମିଶନକୁ ମଞ୍ଜୁରି ମିଳିଛି । ଏହି ମିଶନ ଜରିଆରେ ଚନ୍ଦ୍ରମାରୁ ମାଟି ଏବଂ ପଥର ପୃଥିବୀକୁ ଅଣାଯିବ । ତେ‌ବେ ଆଜି ଶୁକ୍ର ଗ୍ରହ ଅଭିଯାନ, ଗଗନଯାନ ଏବଂ ଚନ୍ଦ୍ରଯାନ-୪କୁ କେନ୍ଦ୍ର କ୍ୟାବିନେଟର ମଞ୍ଜୁରି ମିଳିଥିବା ନେଇ କେନ୍ଦ୍ରମନ୍ତ୍ରୀ ଅଶ୍ବିନୀ ବୈଷ୍ଣବ ସୂଚନା ଦେଇଛନ୍ତି । 

କେନ୍ଦ୍ର ସରକାର ଶୁକ୍ର ଅର୍ବିଟର ମିଶନ ଏବଂ ଭାରତୀୟ ମହାକାଶ ଷ୍ଟେସନ୍‌ ଯୋଜନାକୁ ମଧ୍ୟ ମଞ୍ଜୁରି ଦେଇଛନ୍ତି । ଏହି ସୁବ ଭବିଷ୍ୟତ ମିଶନକୁ ସଫଳ କରିବା ଲାଗି ଏକ ଅତ୍ୟାଧୁନିକ ନୂଆ ପୀଢ଼ିର ଲଞ୍ଚ ଭେଇକିଲ୍‌କୁ ମଧ୍ୟ ସବୁଜ ସଂକେତ ମିଳିଛି  । ପୃଥିବୀର ତଳ କକ୍ଷକୁ ଅତିକମରେ ୩୦ ଟନ ଓଜନର ପେଲୋଡ୍‌ ନେବା ଲାଗି ଏହି ଲଞ୍ଚ ଭେଇକିଲ୍‌ର କ୍ଷମତା ରହିବ । ଚନ୍ଦ୍ରଯାନ-୩ର ସଫଳତା ପରେ ମୋଦୀ ସରକାର ୩୬ ମାସର ସମୟସୀମା ସହ ଚନ୍ଦ୍ରଯାନ-୪ ଲାଗି ୨,୧୦୪ କୋଟି ଟଙ୍କା ଆବଣ୍ଟନ କରିଛନ୍ତି । 

ଏଲଭିଏମ-୩ ରକେଟ ସହିତ ଲଞ୍ଚ ହେବାକୁ ଥିବା ଏହି ମିଶନର ଲକ୍ଷ୍ୟ ହେଉଛି, ଚନ୍ଦ୍ରପୃଷ୍ଠରେ ଅବତରଣ କରି ନମୂନା ଏକତ୍ର କରିବ ଏବଂ ପୃଥିବୀକୁ ଫେରିଆସିବ । ଏହା ପୂର୍ବରୁ ଏପ୍ରିଲ ୨୦୨୪ରେ ଚନ୍ଦ୍ରଯାନ-୪ର ରୂପରେଖ ପ୍ରସ୍ତୁତ କରିସାରିଛି ଭାରତୀୟ ମହାକାଶ ଗବେଷଣା ସଂସ୍ଥା ଇସ୍ରୋ  । ଚନ୍ଦ୍ରପୃଷ୍ଠରୁ ମାଟି ଏବଂ ପଥର ସମେତ ଅନ୍ୟ ନମୂନା ସଂଗ୍ରହ କରି ପୃଥିବୀ ଆଣିବା ଲାଗି ଏହି ମିଶନ ଅତ୍ୟନ୍ତ ଗୁରୁତ୍ବପୂର୍ଣ୍ଣ । ଚନ୍ଦ୍ରଯାନ-୪କୁ ଦୁଇଟି ରକେଟ୍‌ ଏଲଭିଏମ-୩ ଏବଂ ପିଏସଏଲଭିରେ ଲଞ୍ଚ କରିବାକୁ ଯୋଜନା କରିଛି ଇସ୍ରୋ ।