ନୂଆଦିଲ୍ଲୀ, ୦୧/୦୨ : ସଂସଦରେ ବଜେଟ୍ ଉପସ୍ଥାପନ କଲେ ଅର୍ଥମନ୍ତ୍ରୀ ନିର୍ମଳା ସୀତାରମଣ। ପ୍ରଥମ ଏବଂ ଦ୍ଵିତୀୟ ପାଳି ସରକାରର ଅର୍ଥନୀତି ଅବତାରଣା କଲେ ଅର୍ଥମନ୍ତ୍ରୀ। ସେ କହିଛନ୍ତି ଯେ, ସମାଜର ସବୁ ବର୍ଗର ଲୋକଙ୍କ ବିକାଶ ପାଇଁ ବ୍ୟବସ୍ଥା ହୋଇଛି। ସବ୍କା ସାଥ୍ ମନ୍ତ୍ରରେ ଆଗେଇ ଚାଲିଛି ଦେଶ। ୨୦୪୭ ସୁଦ୍ଧା ବିକଶିତ ଭାରତ ଆମର ମୂଳ ଲକ୍ଷ୍ୟ। ସବୁ ବର୍ଗର ଯୋଗ୍ୟ ବ୍ୟକ୍ତିଙ୍କୁ ସୁବିଧା ଯୋଗାଉଛନ୍ତି ସରକାର। ଗରିବ, ମହିଳା, ଯୁବ ଏବଂ ଅନ୍ନଦାତାଙ୍କ ଉନ୍ନତିକୁ ସାର୍ବାଧିକ ଗୁରୁତ୍ଵ ଦିଆଯାଉଛି।
ଅର୍ଥମନ୍ତ୍ରୀ କହିଛନ୍ତି ଯେ, ଦେଶରେ ଅନେକ ନିଯୁକ୍ତି ସୁଯୋଗ ସୃଷ୍ଟି ହୋଇଛି। ଦେଶର ୮୦ କୋଟି ଲୋକଙ୍କ ପାଇଁ ମାଗଣା ରାସନ୍। ୫ ବର୍ଷରେ ଆଉ ୨ କୋଟି ଆବାସ ମିଳିବ। ଆୟୂଷ୍ମାନ ଭାରତରେ ସାମିଲ ହେବେ ସବୁ ଆଶା ଓ ଅଙ୍ଗନବାଡ଼ି। ୪ କୋଟି ଚାଷୀଙ୍କୁ ଫସଲ ବୀମା ଯୋଜନାର ଲାଭ ମିଳିଛି। ପ୍ରଧାନମନ୍ତ୍ରୀ ବିଶ୍ବକର୍ମା ଯୋଜନାରେ କାରିଗରଙ୍କୁ ସହାୟତା। ପ୍ରଧାନମନ୍ତ୍ରୀ ସ୍ବନିଧି ଯୋଜନାରେ ୭୮ ଲକ୍ଷ ଶ୍ରମିକଙ୍କୁ ସହାୟତା। ଚାଷୀଙ୍କ ପାଇଁ MSP ବୃଦ୍ଧି ପାଇଛି। ଅନ୍ନଦାତାଙ୍କ କଲ୍ୟାଣ ଯୋଜନାରେ ୧୧.୮ କୋଟି ଚାଷୀ ଉପକୃତ। ପିଏମ୍ ମୁଦ୍ରା ଯୋଜନାରେ ୨୨.୫ଲକ୍ଷ କୋଟି ଋଣ ଦିଆଯାଇଛି। ମହିଳା ଉଦ୍ୟୋଗୀଙ୍କୁ ୩୦ କୋଟି ମୁଦ୍ରା ଯୋଜନା ଋଣ ଦିଆଯାଇଛି। ୧୧.୮ କୋଟି କୃଷକଙ୍କୁ ଆର୍ଥିକ ସହାୟତା ମିଳିଛି।
ଜାନୁଆରୀରେ ୧.୭୨ ଲକ୍ଷ କୋଟିର ଜିଏସ୍ଟି ଆଦାୟ
ଏହା ପୂର୍ବରୁ କ୍ୟାବିନେଟ୍ ବୈଠକରେ ଅନ୍ତରୀଣ ବଜେଟ୍କୁ ମଞ୍ଜୁରୀ ମିଳିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ଅନୁଷ୍ଠିତ କ୍ୟାବିନେଟ୍ ବୈଠକରେ ମଞ୍ଜୁରୀ ଦିଆଯାଇଛି।ଆଗକୁ ଲୋକସଭା ନିର୍ବାଚନ ଆସୁଛି। ତେଣୁ ନୂଆ ସରକାର ଆସିବା ପରେ ପୂର୍ଣ୍ଣାଙ୍ଗ ବଜେଟ୍ ଆସିବ। ଏନେଇ ପ୍ରଧାନମନ୍ତ୍ରୀ ସ୍ପଷ୍ଟ କରିଛନ୍ତି।