ଦାରିଙ୍ଗବାଡି,୨୧/୪(ଆପ୍ର): ଦାରିଙ୍ଗବାଡି ତହସିଲ କାର୍ଯ୍ୟାଳୟରେ ଦଲାଲ ସକ୍ରିୟ । ଯେ କୌଣସି କାର୍ଯ୍ୟ ପାଇଁ ଖୋଜା ପଡନ୍ତି ଦଲାଲ । ଦଲାଲ ମାଧ୍ୟମରେ ଫାଇଲ ନଗଲେ ହୁଏ ନାହିଁ କୌଣସି କାମ । ଏପରିକି ଛାତ୍ରଛାତ୍ରୀଙ୍କ ଜାତିଗତ ପ୍ରମାଣପତ୍ର, ବାସିନ୍ଦା ପ୍ରମାଣ ପତ୍ର ଓ ଆୟ ପ୍ରମାଣ ପତ୍ର ଅନୁମୋଦନ ନିମନ୍ତେ ମଧ୍ୟ ଦଲାଲର ଆବଶ୍ୟକତା ପଡେ । ବିନା ଦଲାଲରେ କୌଣସି କାମ କରନ୍ତି ନାହିଁ ତହସିଲ କାର୍ଯ୍ୟାଳୟ କର୍ମଚାରୀ । ଆଉ ଯେଉଁଠି ଦଲାଲର ସଂପୃକ୍ତି ନଥାଏ ସେଠୀ ପ୍ରମାଣ ପତ୍ର ଦେବାର ସମୟ ସୀମା ଶେଷ ହୋଇ ଯିବା ପରେ ବି ପ୍ରମାଣ ପତ୍ର ମିଳେ ନାହିଁ । ସମସ୍ତ କାଗଜ ପତ୍ର ଠିକ୍ ରହିଥିଲେ ସୁଧା ଭୁଲ ଦର୍ଶାଇ ଆବେଦନ ପତ୍ର କୁ ପ୍ରତ୍ୟାଖାନ କରାଯାଉଛି । ଆଉ ଯେଉଁଠି ଦଲାଲଙ୍କ ସମ୍ପୂର୍କ୍ତି ଥାଏ ସେଠୀ କାମ କମ ସମୟ ମଧ୍ୟରେ ହେଉଥିବା ଅଭିଯୋଗ ହେଉଛି।ଏଭଳି ଅଭିଯୋଗ ଆଣିଛନ୍ତି ସିମନବାଡ଼ି ଗ୍ରାମର ଅମରନାଥ ନାୟକ ।
ଅମରନାଥ ନାୟକ ନିଜ ଚାକିରି ନିମନ୍ତେ ୪ ଥର ଜାତିଗତ ପ୍ରମାଣ ପତ୍ର ଆବେଦନ କରିଥିଲେ। ହେଲେ ବାରମ୍ବାର ତାଙ୍କର ଆବେଦନ କୁ ପ୍ରତ୍ୟାଖାନ କରାଯାଇଛି । ସବୁ କାଗଜପତ୍ର ଠିକ୍ ଥାଇ ମଧ୍ୟ ତାଙ୍କୁ ହାଇରାଣ କରାଯାଉଛି ବୋଲି ସେ ଅଭିଯୋଗ କରିଛନ୍ତି। ସେ ତହସିଲ ଓ ରାଜସ୍ବ କାର୍ଯ୍ୟାଳୟକୁ ଦୌଡ଼ି ଦୌଡ଼ି ନୟାନ୍ତ ହୋଇ ଗଲେଣି । ହେଲେ ଆଜି ପର୍ଯ୍ୟନ୍ତ ପ୍ରମାଣ ପତ୍ର ଅନୁମୋଦନ ହୋଇ ପାରିଲା ନାହିଁ । ଖାଲି ଯେ ଅମରନାଥ ହଇରାଣ ହେଉଛନ୍ତି ତାହା ନୁହଁ ବରଂ ଏକାଧିକ ଆବେଦନକାରୀ ଏଭଳି ସମସ୍ୟାର ସମ୍ମୁଖୀନ ହେଉଛନ୍ତି । ଏନେଇ ତହସିଲଦାର ଶରତ ଶବରଙ୍କୁ ଫୋନ ମାଧ୍ୟମରେ ଯୋଗାଯୋଗ କରିବାକୁ ଏକାଧିକ ଥର ଚେଷ୍ଟା କରାଯାଇଥିଲେ ସୁଧା ସେ ଫୋନ ନ ଉଠାଇ କାଟି ଦେଇଥିଲେ ।
