ଟିକାବାଲି,୨୦/୪ : ରବିବାର ଅପରାହ୍ନ ଟିକାବାଲି ଅଞ୍ଚଳରେ କାଳବୈଶାଖୀର ତାଣ୍ଡବ ଦେଖିବାକୁ ମିଳିଛି । ପ୍ରାୟ ଏକ ଘଣ୍ଟା ପର୍ଯ୍ୟନ୍ତ ପବନ ସହ ବର୍ଷା କୁଆ ପଥର ମାଡ଼ ଏବଂ ଘଡ଼ଘଡ଼ି ଲାଗି ରହିଥିଲା। ଏହି ସମୟରେ ବଜ୍ରପାତ ଯୋଗୁଁ ଗୋଟିଏ ଗାଈ ସହିତ ୪ବଳଦଙ୍କ ମୃତ୍ୟୁ ହୋଇଥିବା ଜଣାପଡ଼ିଛି । ପ୍ରବଳ ବେଗରେ ପବନ ବହିବାରୁ ଟିକାବାଲି, ତେଙ୍ଗେଡା ପଥର, ବ୍ରେକା ଭଳି ବିଭିନ୍ନ ସ୍ଥାନରେ ଘରର ଛପର ଉଡ଼ିବା ସହ ରାସ୍ତାରେ ବଡ଼ ବଡ଼ ଗଛ ପଡ଼ିଛି ।
କିଛି ସ୍ଥାନରେ ବିଦ୍ୟୁତ ଖୁଣ୍ଟ ଉପୁଡ଼ି ପଡ଼ି ରାସ୍ତା ମଝିରେ ପଡ଼ିଥିବାରୁ ଯାନ ବାହାନ ଯାତାୟତ ଏବଂ ବିଦ୍ୟୁତ ସରବରାହ ବ୍ୟାହତ ହୋଇଛି । ଘଟଣାସ୍ଥଳରେ ପୋଲିସ୍, ଅଗ୍ନିଶମ ଏବଂ ବିଦ୍ୟୁତ କର୍ମଚାରୀ ପହଞ୍ଚି ଗଛ କାଟି ସଫା କରିଛନ୍ତି। ସେହିଭଳି ଚକାପାଦ ବ୍ଲକ୍ ବପଲମେଣ୍ଡି(ବି) ପଞ୍ଚାୟତ ଅର୍ନ୍ତଗତ ଗୁମାଗଡ଼ ଗ୍ରାମରେ ଏକ ଆମ୍ବଗଛ ତଳେ ଠିଆ ହୋଇଥିବାବେଳେ ବଜ୍ରପାତ ହେବା ଯୋଗୁଁ ପ୍ରଶାନ୍ତ କହଁରଙ୍କ ଦୁଇଟି ବଳଦ, ରଙ୍ଗନାଥ କହଁରଙ୍କ ଗୋଟିଏ ଗାଈ ଓ ଗୋଟିଏ ବଳଦ, ଅଶ୍ବିନୀ କହଁରଙ୍କ ଗୋଟାଏ ବଳଦର ମୃତ୍ୟୁ ହୋଇଥିବା ଜଣାପଡ଼ିଛି । ସ୍ଥାନୀୟ ଆରଆଇ ଅନୀତା କୁମାରୀ ପ୍ରଧାନ ଏବଂ ଏଲଆଇ ଶୁଭଶ୍ରୀ ପ୍ରଧାନ ପହଞ୍ଚି ତଦନ୍ତ ଜାରୀ ରଖିଛନ୍ତି।
