ଖଲ୍ଲିକୋଟ, ୧୯/୧୦ : ରାଜନୈତିକ ଶତ୍ରୁତାକୁ ନେଇ ବୋମା ମାଡ଼। ଶୁକ୍ରବାର ରାତିରେ ଖଲ୍ଲିକୋଟ ଥାନା ଅନ୍ତର୍ଗତ କେଶପୁର ବଜାରରେ ଥିବା ଏକ ମାର୍ବଲ ଦୋକାନ ଉପରେ ବୋମା ମାଡ଼ ହୋଇଛି। ଘଟଣା ସ୍ଥଳରେ ଖଲ୍ଲିକୋଟ ପୋଲିସ ସମେତ ଛତ୍ରପୁର ଏଡିପିଓ ପହଞ୍ଚି ତଦନ୍ତ ଆରମ୍ଭ କରିଛନ୍ତି।

ସୂଚନାନୁଯାୟୀ, ଗତ ସାଧାରଣ ନିର୍ବାଚନ ପୂର୍ବରୁ ରାଜନୈତିକ ହିଂସା କାରଣରୁ ଦିଲୀପ ପାହାନଙ୍କ ମୃତ୍ୟୁ ହୋଇଥିଲା। କେଶପୁର ବଜାରରେ ବୋମା ମାଡ଼ ହୋଇଥିବା ମାର୍ବଲ ଦୋକାନଟି ଦିଲୀପ ପାହାନଙ୍କର। ଦିଲୀପଙ୍କ ମୃତ୍ୟୁ ପରେ ତାଙ୍କ ସ୍ତ୍ରୀ ସାବିତ୍ରୀ ଦୋକାନ ଚଳାଇ ଆସୁଛନ୍ତି। ଶୁକ୍ରବାର ରାତି ସାଢେ ୮ଟାରେ ସାବିତ୍ରୀ ଦୋକାନ ବନ୍ଦ କରି ଗଲାପରେ କିଛି ଦୁର୍ବୃତ୍ତ ଦୋକାନ ଉପରକୁ ୩ଟି ବୋମା ଫିଙ୍ଗିଥିଲେ। ତେବେ ଏଥିରେ କିଛି କ୍ଷୟକ୍ଷତି ହୋଇନାହିଁ। ମୃତ ଦିଲ୍ଲୀପଙ୍କ ମକଦ୍ଦମାରେ ସମ୍ପୃକ୍ତ ଥିବା ସାକ୍ଷୀମାନଙ୍କୁ ଡରାଇବା ପାଇଁ ଏହି ବୋମା ମାଡ଼ ହୋଇଥିବା ପରିବାର ଲୋକ ଅଭିଯୋଗ କରିଛନ୍ତି । ଘଟଣା ସ୍ଥଳରେ ଖଲ୍ଲିକୋଟ ପୋଲିସ ସମେତ ଛତ୍ରପୁର ଏଡିପିଓ ଗୌରହରି ସାହୁ ପହଞ୍ଚି ତଦନ୍ତ ଆରମ୍ଭ କରିଛନ୍ତି।