ନୂଆଦିଲ୍ଲୀ: ଅଯୋଧ୍ୟା ରାମ ମନ୍ଦିରକୁ ନେଇ ମିଳିଲା ବୋମା ଧମକ। କେହି ଜଣେ ମନ୍ଦିର ଟ୍ରଷ୍ଟ ମେଲକୁ ମେଲ କରି ଏହି ବୋମା ଧମକ ଦେଇଥିବା ଜଣାପଡିଛି। ଗତବର୍ଷ ଜାନୁୟାରୀ ମାସରେ ଉଦ୍ଘାଟନ ହୋଇଥିବା ରାମ ମନ୍ଦିରକୁ ଏପରି ପ୍ରଥମ ଥର ପାଇଁ ଧମକ ମିଳିଥିବା ଜଣାପଡିଛି।
ଏହି ଧମକପୂର୍ଣ୍ଣ ମେଲଟି ଶ୍ରୀ ରାମ ଜନ୍ମଭୂମି ତିର୍ଥ କ୍ଷେତ୍ର ଟ୍ରଷ୍ଟ ଇ-ମେଲକୁ ଆସିଥିବା ଜଣାପଡିଛି। ରାମ ମନ୍ଦିରର ପରିଚାଳନା ଦାୟିତ୍ତ୍ୱ ଏହି ଟ୍ରଷ୍ଟ ବୋର୍ଡ ଉପରେ ରହିଛି। ସୋମବାର ମଧ୍ୟରାତ୍ରିରେ କେହି ଜଣେ ଅତାତାୟି ଏପରି ଧମକପୂର୍ଣ୍ଣ ମେଲ ପଠାଇଥିଲେ। ଏହି ମେଲ ମିଳିବା ପରେ ମନ୍ଦିର ପରିଚାଳନା କରୁଥିବା ସଦସ୍ୟ ମାନେ ମନ୍ଦିରର ସୁରକ୍ଷା ବ୍ୟବସ୍ଥା ବଢାଇ ଦେଇଛନ୍ତି। ତେବେ ଏହି ମେଲଟି ଇଂରାଜୀରେ ଲେଖାଯିବା ସହ ତାମିଲନାଡିରୁ କେହି ଜଣେ ବ୍ୟକ୍ତି ଏହାକୁ ପଠାଇଛନ୍ତି ବୋଲି ପୋଲିସ କହିଛି।
ଏହି ଧମକପୂର୍ଣ୍ଣ ମେଲଟି ରାମ ମନ୍ଦିର ବ୍ୟତିତ ବାରବାଙ୍କୀ ଓ ଚାନ୍ଦୌଲି ସମେତ ଅନ୍ୟ ଜିଲ୍ଲାମାନଙ୍କୁ ମଧ୍ୟ ମିଳିଛି ବୋଲି ସୂଚନା ରହିଛି। ତେବେ ଏନେଇ ରାମ ମନ୍ଦିର ଟ୍ରଷ୍ଟ ଥାନାରେ ଏକ ମାମଲା ରୁଜୁ କରିଛି। ଅଯୋଧ୍ୟା ସାଇବର ସେଲ ଏହି ମାମଲାର ତଦାରଖ ଜାରି ରଖିଛି।
ଆପଣଙ୍କୁ ଜଣାଇରଖୁ ଯେ ମନ୍ଦିର ଟ୍ରଷ୍ଟ ପକ୍ଷରୁ ପୂର୍ବରୁ ଏକ ଚାରି କିଲେମିଟର ଲମ୍ୱ ସୁରକ୍ଷା ପ୍ରାଚିରର ନିର୍ମାଣ କାମ ଚାଲୁ ରହିଛି। ଆସନ୍ତା ୧୮ ମାସ ଭିତରେ ଏହି କାମ ସଂପୂର୍ଣ୍ଣ ହେବ ବୋଲି ନିର୍ମାଣ କମିଟିର ଅଧ୍ୟକ୍ଷ ନ୍ରିପେନ୍ଦ୍ର ମିଶ୍ରା ସୂଚନା ଦେଇଛନ୍ତି। ଏହା ସହ ଆଉ ମାତ୍ର ୬ ମାସ ମଧ୍ୟରେ ରାମ ମନ୍ଦିରର କାର୍ଯ୍ୟ ମଧ୍ୟ ସଂପୂର୍ଣ୍ଣ ହୋଇଯିବ ବୋଲି ସେ ସୂଚନା ପ୍ରଦାନ କରିଛନ୍ତି।
