ଭୁବନେଶ୍ୱର,୨୯/୦୬: ଦୁଇ ତୃତୀୟାଂଶରୁ ଅଧିକ ବିଜେଡି କର୍ପୋରେଟର । ସାଙ୍ଗରେ ମେୟର ଓ ଡେପୁଟି ମେୟର । ଆଶା କରାଯାଉଥିଲା ରାଜ୍ୟରେ ବିଜେପି ସରକାର  ଥିଲେ ବି ବିଏମସିରେ ସଂଖ୍ୟା ଗରିଷ୍ଠତାର ଦବଦବା ଦେଖାଇବ । ମାତ୍ର ଶୁକ୍ରବାର ବିଏମସିର  କର୍ପୋରେସନ ବୈଠକରେ ସେମିତି କିଛି  ହେଲାନି । ବରଂ ସରକାର ବଦଳିବା ପରେ  ନିରୁତ୍ସାହିତ ବିଜେଡି କର୍ପୋରେଟର ବୈଠକରେ ଛତ୍ରଭଙ୍ଗ ଦେଲାଭଳି ଲାଗିଥିଲା । ଶୂନ୍ୟକାଳ ଆରମ୍ଭରୁ ପୂରା ବୈଠକୁ ମାଡ଼ି ବସିଲା ବିଜେପି । କାହା ପରେ କିଏ ପ୍ରଶ୍ନ ପଚାରି  ଆକ୍ରମଣ କରିବ ସବୁ ସ୍ଥିର ହୋଇଥିଲା । ସତେ ଯେମିତି ରିହର୍ସାଲ କରି ଆସିଥିଲେ । ଏପଟେ ବିଜେଡି କର୍ପୋରେଟରମାନଙ୍କ ଭିତରେ ଜମାରୁ ସମନ୍ୱୟ ନଥିଲା । ମନୋବଳ ଭାଙ୍ଗି ଯାଇଥିଲା । ବିରୋଧୀ ଦଳକୁ ମୁକାବିଲା କରିବା ତ ଦୂରର କଥା, ଅଧାରୁ ସଭା କକ୍ଷ ଛାଡ଼ି ପଳାଇଥିଲେ ।  

ନିର୍ବାଚନ ପାଇଁ ୩ ମାସ ବିଏମ୍‌ସି କର୍ପୋରେସନ ବୈଠକ ବନ୍ଦ ରହିଥିଲା । ଅନେକ ଗୁଡିଏ ଲୋକାଭିମୁଖୀ ପ୍ରସ୍ତାବ ଆଲୋଚନା  ହେବାର ଥିଲା । ହେଲେ ବୈଠକର ମାତ୍ର କିଛି ସମୟ ପରେ ବିଜେଡି-ବିଜେପି ତୁ ତୁ  ମେଁ ମେଁ ଆରମ୍ଭ ହେଲା । ବୈଠକ ଆରମ୍ଭରୁ  ସ୍ୱାଧୀନ ବିଧାୟକ ରଶ୍ମୀରଞ୍ଜନ ପାଟ୍ଟଶାଣୀ ପ୍ରଶ୍ନ  ପଚାରିଥିଲେ । ସେ କହିଥିଲେ ମୋ ଅଞ୍ଚଳ  ବିଧାୟକ ବିଭୂତି ବଳବନ୍ତ ରାୟ ଉପସ୍ଥିତରେ  ମୁଁ ସମସ୍ୟା ଉଠାଇବି । ତାଙ୍କ ପାଟିରୁ କଥା ନ  ସରୁଣୁ, ଜଣକ ପରେ ଜଣେ ବିଜେପି ବିଧାୟକ ସମସ୍ୟା ଉଠାଇଥିଲେ । ମେୟର ସୁଲୋଚନା ଦାସ  କହିଥିଲେ, ଦୀର୍ଘଦିନ ପରେ ବୈଠକ ବସିଛି,  ପ୍ରଥମେ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଆଲୋଚନା ହେବ ।  

ଶୂନ୍ୟକାଳରେ ପ୍ରଶ୍ନୋତ୍ତର କାର୍ଯ୍ୟକ୍ରମ ହେବ । ହେଲେ ବିଜେପି କର୍ପୋରେଟରମାନେ ଏହାକୁ ବିରୋଧ କରିଥିଲେ । ଏହାକୁ ନେଇ ବିଜେପି ଓ ବିଜେଡି କଥା କଟାକଟି ହୋଇଥିଲା । ପରେ  ପ୍ରାୟ ୪୦ରୁ ଅଧିକ ବିଜେଡି କର୍ପୋରେଟର  କକ୍ଷ ଛାଡ଼ି ପଳାଇଥିଲେ । ବିଜେପିର ଜଣେ ମହିଳା କର୍ପୋରେଟର ଓ ମେୟର ମୁହାଁମୁହିଁ  ହୋଇଥିଲେ । ତାଙ୍କ ୱାର୍ଡରେ କାମ ଧିମା ଚାଲିଛି ।  ହେଲେ ମେୟର ବୁଲିବା ବେଳେ ତାଙ୍କୁ ନ ଡାକି  ସ୍ଥାନୀୟ ବିଜେଡି ନେତାଙ୍କୁ ଧରି ବୁଲୁଛନ୍ତି ବୋଲି  ଅଭିଯୋଗ କରିଥିଲେ ।  

ଶୁକ୍ରବାର ବୈଠକରେ ଏକାମ୍ର ବିଜେପି  ବିଧାୟକ ବାବୁ ସିଂ, ଉତ୍ତର ବିଧାୟକ ସୁଶାନ୍ତ  ରାଉତ ଓ ଜଟଣୀ ବିଧାୟକ ବିଭୂତିବଳବନ୍ତ  ରାୟ ଯୋଗଦେଇଥିଲେ । ଏହି ଅବସରରେ ଶ୍ରୀ  ସିଂ କହିଥିଲେ, ଆମେ ସବୁ ଏକ । ସବୁ ୱାର୍ଡ  ସମସ୍ୟାର ସମାଧାନ ପାଇଁ ମୁଁ ମୁଖ୍ୟମନ୍ତ୍ରୀଙ୍କ ପାଖରେ ଦାବି ଉଠାଇବି । ଶୁକ୍ରବାର ବୈଠକରେ ବିଶେଷକରି ଅସଂପୂର୍ଣ୍ଣ ପ୍ରକଳ୍ପଗୁଡିକୁ ସଂପୂର୍ଣ୍ଣ ରୂପ  ଦେବା, ଭିତ୍ତିଭୂମିର ବିକାଶ, ବିଭାଗୀୟ ସମନ୍ୱୟ,  ଆଲୋକୀକରଣ, ବିବାଦୀୟ ସ୍ଥାନଗୁଡିକର  ଆଶୁ ସମାଧାନ ଆଦି ସଂପର୍କରେ ଆଲୋଚନା  କରାଯାଇଥିଲା । ଏହା ପରେ ବିଏମ୍‌ସିର ବିଭିନ୍ନ  ଉପବିଭାଗରୁ ଆସିଥିବା ପ୍ରସ୍ତାବଗୁଡିକ ବୈଠକରେ  ଆଲୋଚନା ହୋଇ ପ୍ରସ୍ତାବ ଗୃହୀତ ହୋଇଥିଲା ।  

ରାଜଧାନୀର ସବୁଜୀକରଣ ପାଇଁ ଚଳିତ ବର୍ଷ  ୧ ଲକ୍ଷ ଚାରା ରୋପଣ କରିବାକୁ ବିଏମ୍‌ସି ଲକ୍ଷ୍ୟ  ଧାର୍ଯ୍ୟ କରିଛି । ସେହିପରି ଘରୋଇ ବର୍ଜ୍ୟ ସଂଗ୍ରହ,  ବହୁଳ ବର୍ଜ୍ୟ ଉତ୍ପନ୍ନକାରୀ ଅନୁଷ୍ଠାନ, ବାଣିଜ୍ୟିକ  ପ୍ରତିଷ୍ଠାନ ଇତ୍ୟାଦିରୁ ନିୟମିତ ପୃଥକୀକୃତ  ବର୍ଜ୍ୟ ସଂଗ୍ରହକୁ ଅଧିକ ଗୁରୁତ୍ୱ ଦିଆଯିବ ବୋଲି  ବୈଠକରେ ନିଷ୍ପତ୍ତି ହୋଇଛି । ସୂଚନାଯୋଗ୍ୟ କି ୟୁଏନ୍‌ ହାବିଟାଟ୍‌ କେନ୍ଦ୍ରୀୟ ଏବଂ ଦକ୍ଷିଣ ଏସିଆର  ଏସ୍‌ଡିଜି କ୍ଷେତ୍ରରେ ଭୁବନେଶ୍ୱରକୁ ଏକ ପାଇଲଟ୍‌  ସହର ଭାବେ ଚୟନ କରିଛି।