ନୂଆଦିଲ୍ଲୀ: ମାନହାନି ମାମଲାରେ ଦିଲ୍ଲୀର ରାଉଜ୍ ଆଭେନ୍ୟୁ କୋର୍ଟ ଆଜି (ଗୁରୁବାର) ବିଜେପି ସାଂସଦ ବାଂସୁରୀ ସ୍ୱରାଜଙ୍କୁ ଏକ ବଡ଼ ଆଶ୍ୱସ୍ତି ଦେଇଛନ୍ତି। କୋର୍ଟ ଆମ ଆଦମୀ ପାର୍ଟି ନେତା ସତ୍ୟେନ୍ଦ୍ର ଜୈନଙ୍କ ଦ୍ୱାରା ବିଜେପି ସାଂସଦଙ୍କ ବିରୋଧରେ ଦାଖଲ କରାଯାଇଥିବା ଅପରାଧିକ ମାନହାନି ମାମଲାର ବିଚାର କରିବାକୁ ମନା କରିଦେଇଛନ୍ତି। ସତ୍ୟେନ୍ଦ୍ର ଜୈନ ଅଭିଯୋଗ କରିଥିଲେ ଯେ, ବିଜେପି ସାଂସଦ ବଂଶୁରୀ ସ୍ୱରାଜ ଏକ ସାକ୍ଷାତକାର ସମୟରେ ତାଙ୍କ ବିରୁଦ୍ଧରେ ମାନହାନିକାରକ ବୟାନ ଦେଇଥିଲେ।
ଆମ ଆଦମୀ ପାର୍ଟି ନେତା ସତ୍ୟେନ୍ଦ୍ର ଜୈନ ଦାବି କରିଥିଲେ ଯେ, ବାଂସୁରୀ ସ୍ୱରାଜ କହିଥିଲେ ଯେ, ତାଙ୍କ ଘରେ ଇଡି ତଲାସୀ ସମୟରେ ନଗଦ ୩ କୋଟି ଟଙ୍କା ଏବଂ ୧.୮ କିଲୋଗ୍ରାମ ଓଜନର ୧୩୩ଟି ସ୍ୱର୍ଣ୍ଣ ମୁଦ୍ରା ଉଦ୍ଧାର କରାଯାଇଥିଲା। ସେ ଦାବି କରିଥିଲେ ଯେ ବିଜେପି ସାଂସଦ ତାଙ୍କୁ ଦୁର୍ନୀତିଗ୍ରସ୍ତ ଏବଂ ଠକ କହି ବଦନାମ କରିଛନ୍ତି। ତାଙ୍କୁ ବଦନାମ କରିବା ପାଇଁ ଏହି ମନ୍ତବ୍ୟ ଦେଇଛନ୍ତି।
ସତ୍ୟେନ୍ଦ୍ର ଜୈନ ଅଭିଯୋଗ କରିଛନ୍ତି ଯେ,୫ ଅକ୍ଟୋବର,୨୦୨୩ରେ ଏକ ଟିଭି ଚ୍ୟାନେଲରେ ଦିଆଯାଇଥିବା ସାକ୍ଷାତକାରରେ ବାଂସୁରୀ ସ୍ୱରାଜ ଅପମାନଜନକ ମନ୍ତବ୍ୟ ଦେଇଥିଲେ, ଯାହାକୁ ଲକ୍ଷ ଲକ୍ଷ ଲୋକ ଦେଖିଥିଲେ। ସେ ଦାବି କରିଥିଲେ ଯେ ବିଜେପି ସାଂସଦ ରାଜନୈତିକ ଲାଭ ପାଇଁ ଏହା କରିଛନ୍ତି। ପୂର୍ବରୁ, ଡିସେମ୍ବର ୧୬, ୨୦୨୪ରେ, କୋର୍ଟ ବିଜେପି ସାଂସଦ ବାଂସୁରୀ ସ୍ୱରାଜ ଏବଂ ନ୍ୟୁଜ୍ ଚ୍ୟାନେଲକୁ ସମନ୍ ପୂର୍ବରୁ ନୋଟିସ୍ ଜାରି କରିଥିଲେ ଏବଂ ସେମାନଙ୍କ ପ୍ରତିକ୍ରିୟା ମାଗିଥିଲେ।
ବିଜେପି ସାଂସଦ ବଂଶୁରୀ ସ୍ୱରାଜଙ୍କ ଓକିଲ ୧୩ ଜାନୁଆରୀ ୨୦୨୫ରେ କୋର୍ଟକୁ କହିଥିଲେ ଯେ ଏହି ଅଭିଯୋଗ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ଏବଂ ଅଭିଯୋଗକାରୀ (ସତ୍ୟେନ୍ଦ୍ର ଜୈନ) ଏହାକୁ ରାଜନୀତି ପାଇଁ ବ୍ୟବହାର କରୁଛନ୍ତି।
