ନୂଆଦିଲ୍ଲୀ: ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୋଇର ଆତଙ୍କ ବୃଦ୍ଧି ପାଇବାରେ ଲାଗିଛି । ଏନସିପି ନେତା ବାବା ସିଦ୍ଦିକିଙ୍କୁ ବିଷ୍ଣୋଇ ଗ୍ୟାଙ୍ଗର ସଦସ୍ୟ ହତ୍ୟା କରିବା ପରେ ସାରା ଭାରତରେ ଚିନ୍ତା ବଢ଼ିଛି । ଏହାରି ମଧ୍ୟରେ ଲରେନ୍ସ ବିଷ୍ଣୋଇ ଗ୍ୟାଙ୍ଗର ସଦସ୍ୟ ବିହାରର ସାଂସଦ ପପୁ ଯାଦବଙ୍କୁ ଜୀବନରୁ ମାରିଦେବାକୁ ଧମକ ଦେଇଥିବା କୁହାଯାଉଛି । ଫୋନ କରିଥିବା ବ୍ୟକ୍ତି ଦାବି କରିଛି ଯେ, ସାଂସଦଙ୍କ ପ୍ରତି ମୁହୂର୍ତ୍ତର ଖବର ରଖାଯାଉଛି । ଅଭିନେତା ସଲମାନ ଖାନଙ୍କ ପ୍ରସଙ୍ଗରୁ ଓହରି ଯିବାକୁ ମଧ୍ୟ ପପୁ ଯାଦବଙ୍କୁ ଧମକ ଦେଇଛି ଦୁର୍ବୃତ୍ତ । ତେବେ ନିକଟରେ ସଲମାନ ଖାନଙ୍କୁ ପ୍ରତି ପରିସ୍ଥିତିରେ ସହାୟତା କରିବେ ବୋଲି କହିଥିଲେ ପପୁ ଯାଦବ ।
ସେପଟେ ସିଗନାଲ୍ ଜାମରକୁ ଅକାମୀ କରିବା ଲାଗି ଲରେନ୍ସ ବିଷ୍ଣୋଇ ଘଣ୍ଟାକୁ ଏକ ଲକ୍ଷ ଟଙ୍କା ଦେଉଛି ବୋଲି କଲ କରିଥିବା ବ୍ୟକ୍ତି ଦାବି କରିଛି । ନିକଟରେ ଏନସିପି ନେତା ବାବା ସିଦ୍ଦିକିଙ୍କ ହତ୍ୟା କରିଥିବା ନେଇ ଲରେନ୍ସ ବିଷ୍ଣୋଇ ଗ୍ୟାଙ୍ଗ ଦାବି କରିଥିଲା । ନେତାଙ୍କ ହତ୍ୟା ପରେ ପୁର୍ନିଆର ସ୍ବାଧୀନ ସାଂସଦ ପପୁ ଯାଦବ ଖୋଲାଖୋଲି ଭାବେ ଚ୍ୟାଲେଞ୍ଜ କରିଥଲେ ଯେ, ‘ଯଦି ମୋତେ ଅନୁମତି ମିଳେ ତେବେ ୨୪ ଘଣ୍ଟା ମଧ୍ୟରେ ବିଷ୍ଣୋଇ ଗ୍ୟାଙ୍ଗକୁ ସଫା କରିଦେବି ।’
ସେପଟେ ପପୁ ଯାଦବ ବିହାରର ଡିଜିପିଙ୍କୁ ଦେଇଥିବା ଏକ ଅଡିଓ କ୍ଲିପ୍ରୁ ଶୁଣିବାକୁ ମିଳିଛି, ‘ ଆପଣ ‘ଭାଇ’ଙ୍କୁ କହିପାରିଥାନ୍ତେ ଏକଥା ଆପଣ କହିନାହାନ୍ତି ବରଂ ଗଣମାଧ୍ୟମ ଏଭଳି କରିଛି । ଯଥାଶୀଘ୍ର ମାମଲାକୁ ସୁଧାରି ନିଅନ୍ତୁ । ମୁଁ ଆପଣଙ୍କୁ ଜଣେ ବଡ଼ ଭାଇ ଭଳି ଭାବୁଛି । କିନ୍ତୁ ଆପଣ ମୋତେ ଦୁଃଖି କରିଛନ୍ତି । କଲ ବ୍ୟାକ୍ କଲେ ମୁଁ ‘ଭାଇ’ଙ୍କ ସହ କଥା କରାଇ ଦେବି । ’ ତେବେ ଏହି କଲ୍ ୟୁଏଇରୁ ଆସିଥିବା ଜଣାପଡ଼ିଛି ।
ବାବା ସିଦ୍ଦିକିଙ୍କ ହତ୍ୟାକାଣ୍ଡକୁ ନେଇ ପପୁ ଯାଦବ ଏକ୍ସରେ ଲେଖିଥିଲେ, ‘ଜଣେ ପୂର୍ବତନ ମନ୍ତ୍ରୀଙ୍କୁ ହତ୍ୟା କରାଯିବା ଘଟଣା ମହାରାଷ୍ଟ୍ରରେ ଅତି ଖରାପ ଆଇନ ଶୃଙ୍ଖଳା ସ୍ଥିତିକୁ ଦର୍ଶାଉଛି । ବିହାରର ପୁଅକୁ ହତ୍ୟା କରାଯିବା ଅତି ଦୁଃଖଦ ଘଟଣା । ଯଦି ବିଜେପି ନେତୃତ୍ବାଧୀନ ସରକାର ନିଜର ବରିଷ୍ଠ ନେତାଙ୍କୁ ସୁରକ୍ଷ ଦେଇପାରୁ ନାହିଁ ତେବେ ସାଧାରଣ ଲୋକଙ୍କ ଅବସ୍ଥା କଣ ହେବ ? ’ ସେପଟେ ବିହାର ଡିଜିପିଙ୍କୁ ଫୋନ୍ ରେକର୍ଡିଂ କ୍ଲିପ୍ ଦେବା ପରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କୁ ଚିଠି ଲେଖି ନିଜ ଲାଗି ସୁରକ୍ଷା ବ୍ୟବସ୍ଥା ବଢ଼ାଇବାକୁ ନିବେଦନ କରିଛନ୍ତି । ଓ୍ବାଇ ପରିବର୍ତ୍ତେ ତାଙ୍କୁ ଏବେ ଜେଡ୍ ସୁରକ୍ଷା ଦିଆଯାଉ ବୋଲି ଚିଠିରେ ଲେଖିଛନ୍ତି ପପୁ ଯାଦବ ।
