କୋଲକାତା,୨୨।୫: କଲିକତା ହାଇକୋର୍ଟରୁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଝଟକା। ପଶ୍ଚିମବଙ୍ଗ ସରକାରଙ୍କ ପକ୍ଷରୁ ଜାରି ୫ ଲକ୍ଷ ଓବିସି ସାର୍ଟିଫିକେଟ୍କୁ ହାଇକୋର୍ଟ ରଦ୍ଦ କରିଛନ୍ତି। କୁହାଯାଉଛି ଯେ, ଏଥିରେ ବହୁ ସଂଖ୍ୟକ ମୁସଲମାନ ସମ୍ପ୍ରଦାୟର ଲୋକ ଥିଲେ। ବୁଧବାର ଜଷ୍ଟିସ୍ ତପୋବନ ଚକ୍ରବର୍ତ୍ତୀ ଓ ଜଷ୍ଟିସ୍ ରାଜଶେଖର ମନ୍ଥରଙ୍କ ଖଣ୍ଡପୀଠ କହିଛନ୍ତି, ୨୦୧୧ ରୁ କୌଣସି ମାନକ ନିୟମର ପାଳନ ନକରି ରାଜ୍ୟରେ ଓବିସି ସାର୍ଟିଫିକେଟଜ୍ ଜାରି କରାଯାଉଛି।

ଖଣ୍ଡପୀଠ ଟିପ୍ପଣୀ ଦେଇଛନ୍ତି , ଏଭଳି ଓବିସି ପ୍ରମାଣ ପତ୍ର ଜାରି କରିବା ଅଣସମ୍ବିଧାନିକ। ଏହି ପ୍ରମାଣ ପତ୍ର ପଛୁଆ ବର୍ଗର କମିଶନଙ୍କ ପରାମର୍ଶ ନମାନି ଜାରି କରାଯାଇଛି। ତେଣୁ ସବୁ ପ୍ରମାଣ ପତ୍ରକୁ ରଦ୍ଦ କରି ଦିଆଯାଉଛି। ତେବେ କୋର୍ଟ କହିଛନ୍ତି ଏହି ସମୟରେ ଜାରି ସାର୍ଟିଫିକେଟ୍ର ଆଧାରରେ ଚାକିରୀ ପାଇଥିବା ଲୋକଙ୍କ ଚାକିରୀ ରହିବ। 

ମଇ ୨୦୧୧ ର ପଶ୍ଚିମବଙ୍ଗର ଶାସନ ଭାର ସମ୍ଭାଳିବା ପରେ ମୁଖ୍ୟମନ୍ତ୍ରୀ ମମତା ବାନାର୍ଜୀ ଏହି ଦାବି କରୁଥିଲେ ଯେ ତାଙ୍କ ସରକାର ପ୍ରାୟ ସବୁ ମୁସଲମାନଙ୍କୁ ଓବିସି ଶ୍ରେଣୀରେ ଆଣିଛନ୍ତି। ସହମୁସଲମାନ ସମ୍ପ୍ରଦାୟର ବହୁ ଲୋକ ଏହି ସଂରକ୍ଷଣର ଲାଭ ଉଠାଉଛନ୍ତି। ଲୋକସଭା ନିର୍ବାଚନ ପ୍ରଚାର ବେଳେ ମଧ୍ୟ ସେ ବାରମ୍ବାର ଏହାକୁ ଦୋହରାଇଛନ୍ତି, କିନ୍ତୁ ଏବେ ହାଇକୋର୍ଟ କହିଛନ୍ତି, ମମତା ବାନାର୍ଜୀ ସରକାର ୨୦୧୧  ପରେ ଯେଉଁ ପକ୍ରିୟା ଅନୁସାରେ, ଓବିସି ସାର୍ଟିଫିକେଟ୍ ଜାରି କରିଛନ୍ତି, ତାହା ବେଆଇନ ଥିଲା। ହାଇକୋର୍ଟ କହିଛନ୍ତି, ଓବିସି ସୂଚୀରେ ପଛୁଆ ବର୍ଗ କମିଶନ୍ ଅଧିନିୟମ ୧୯୯୩ ଅନୁସାରେ ତିଆରି କରାଯିବା ଦରକାର। ସୁଚୀରେ କେବଳ ସେହି ଜନଜାତିଙ୍କୁ ସାମିଲ କରିହେବ, ଯେଉଁମାନେ ୨୦୧୦ ପର୍ଯ୍ୟନ୍ତ ଓବିସି ସମ୍ପ୍ରଦାୟ ସହିତ ଜଡିତ ଥିଲେ। କୋର୍ଟ କହିଛନ୍ତି, ଏହାପରେ ସୁଚୀରେ ଯୋଡା ଯାଇଥିବା ଜାତିଙ୍କୁ ପ୍ରଥମେ ବିଧାନସଭାରେ ପାସ୍ କରାଯିବା ଦରକାର।