କୋରାପୁଟ,୧୩/୦୭: କୋରାପୁଟ ଜିଲ୍ଲାର ବିକାଶରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ ଭାରତମାଳ ପ୍ରକଳ୍ପ । ଏହି ଜାତୀୟ ରାଜପଥ ସମ୍ପୂର୍ଣ୍ଣ ହେଲେ ଏକାଧିକ ଲଘୁ ଉଦ୍ୟୋଗ ଏଠାକୁ ଆସିବ । ଏଠି ବକ୍ସାଇଟ୍ ଓ ଚୁନପଥର ପର୍ଯ୍ୟାପ୍ତ ପରିମାଣରେ ରହିଛି । ତେଣୁ ଏହି ସମ୍ପର୍କିତ ବହୁ ଉଦ୍ୟୋଗୀ ଆସିବେ । ବହୁ ସିମେଣ୍ଟ୍ କମ୍ପାନି ଏଠାରେ ବ୍ୟବସାୟ ସ୍ଥାପନ କରିବାକୁ ଆଗ୍ରହ ପ୍ରକାଶ କରିଛନ୍ତି । ଏଭଳି ଉଦ୍ୟୋଗ ଆସିଲେ ଜିଲ୍ଲାର ନିଶ୍ଚିତ ବିକାଶ ହେବ । ଭାରତମାଳା ପ୍ରକଳ୍ପ କାର୍ଯ୍ୟ ସମୀକ୍ଷା କରିବା ପରେ ଏଭଳି କହିଛନ୍ତି ଜିଲ୍ଲାପାଳ ଭି.କୀର୍ତ୍ତି ଭାସନ । ଏହି ରାସ୍ତା ହେବ ଏକ ଅର୍ଥନୈତିକ କରିଡ଼ର । ପ୍ରକଳ୍ପ କାର୍ଯ୍ୟକାରୀ ହେଲେ ଜିଲ୍ଲାର ପର୍ଯ୍ୟଟନସ୍ଥଳୀ ଗୁଡ଼ିକର ବିକାଶ ହେବ । ଏହି ଆଦିବାସୀ ଅଧ୍ୟୁଷିତ ବଣପାହାଡ଼ ଘେରା କୋରାପୁଟ ଜିଲ୍ଲାକୁ ବିକାଶ ଛୁଇଁବ ବୋଲି ସେ କହିଛନ୍ତି ।
ସୂଚନା ଅନୁଯାୟୀ, ଛତିଶଗଡ଼ର ରାୟପୁରଠାରୁ ଆନ୍ଧ୍ରର ବିଶାଖାପାଟଣାକୁ ସିଧାସଳଖ ସଂଯୋଗ ପାଇଁ ଭାରତମାଲା ପ୍ରକଳ୍ପ କାର୍ଯ୍ୟକାରୀ ହେଉଛି । ୧୬ ହଜାର କୋଟି ଟଙ୍କା ବ୍ୟୟ ଅଟକଳରେ ଏନ୍ଏଚ୍ଏଆଇ ଦ୍ୱାରା ଏହାର ନିର୍ମାଣ କରାଯାଉଛି । ଏହି ପ୍ରକଳ୍ପ ଓଡ଼ିଶାର ନବରଙ୍ଗପୁର ଏବଂ କୋରାପୁଟ ଜିଲ୍ଲା ଦେଇ ଯାଉଛି । ରାୟପୁରରୁ ବିଶାଖାପାଟଣା ପର୍ଯ୍ୟନ୍ତ ୪୬୫କିମି ରାସ୍ତା ନିର୍ମାଣ ହେଉଛି । ଜଙ୍ଗଲ ରାସ୍ତାରେ ୩୫ମିଟର ଏବଂ ଅଣ ଜଙ୍ଗଲ ରାସ୍ତାରେ ୬୦ ମିଟର ଓସାରିଆ ରାସ୍ତା ନିର୍ମାଣ ହେଉଛି । କୋରାପୁଟରେ ୧୨୪କିମି, ନବରଙ୍ଗପୁରରେ ୧୧୬କିମି, ଛତିଶଗଡ଼ରେ ୧୨୫କିମି ଓ ଆନ୍ଧ୍ରରେ ଶହେ କିମି ରାସ୍ତା ନିର୍ମାଣ ହେଉଛି ।
କୋରାପୁଟରେ ୪୬ଶହ କୋଟି ଟଙ୍କା ଓ ନବରଙ୍ଗପୁର ପାଇଁ ୩୧୫୯ କୋଟି ଟଙ୍କା ବ୍ୟୟ ଅଟକଳ ରଖାଯାଇଛି । କୋରାପୁଟ ଓ ନବରଙ୍ଗପୁରର ୮୭୩ ହେକ୍ଟର୍ ବେସରକାରୀ ଜମି, ୩୦୭ ହେକ୍ଟର୍ ସରକାରୀ ଏବଂ ୩୬୩ ହେକ୍ଟର୍ ଜଙ୍ଗଳ ଜମି ଅଧିଗ୍ରହଣ କରାଯାଇଛି । ଓଡ଼ିଶା ପଟୁ ଆନ୍ଧ୍ରକୁ ଯିବା ବେଳେ ଟନେଲ୍ କୁନ୍ଦୁଳି ନିକଟ ବରଜଗାଁଠାରୁ ଆରମ୍ଭ ହୋଇ କାନ୍ଦିଲିଠାରେ ଶେଷ ହେବ । ସେହିପରି ଆନ୍ଧ୍ର ପଟୁ ଆସୁଥିବା ଟନେଲ୍ ରାସ୍ତା କୁରାଲିଠାରୁ ଆରମ୍ଭ ହୋଇ ସୁଙ୍କି ପଞ୍ଚାୟତ ଅମପାବାଲିରେ ଶେଷ ହେବ । କାମ ସରିଲେ କୋରାପୁଟରୁ ବିଶାଖାପାଟଣାକୁ ପ୍ରାୟ ଅଢ଼େଇ ଘଣ୍ଟାରେ ପହଞ୍ଚି ହେବ ।
ଇଂ.ସୁନୀଲ୍ ବିଶ୍ୱାଳ କହିଛନ୍ତି, ଏହି ରାସ୍ତା କୋରାପୁଟ ଜିଲ୍ଲା ପାଇଁ ଏକ ଅର୍ଥନୈତିକ କରିଡର କହିଲେ ଅତ୍ୟୁକ୍ତି ହେବ ନାହିଁ । ଏହାଦ୍ୱାରା ଛତିଶଗଡ଼ ଓ ଆନ୍ଧ୍ରକୁ ଦୂରତା କମିବ । ଗମନାଗମନ କ୍ଷେତ୍ରରେ ଲୋକେ ସମସ୍ତ ସୁବିଧା ପାଇବେ । ଖଣିଖାଦାନ ଭରା ଜିଲ୍ଲା ଏକ ପ୍ରକାର ବିକାଶ ଦିଗକୁ ଉନ୍ନୀତ ହେବ । ଡ.ପିସି ମହାପାତ୍ର କହିଛନ୍ତି, ଏହି ରାସ୍ତା ଯୋଗୁ ଓଡ଼ିଶା ସହ ଛତିଶଗଡ଼ ଓ ଆନ୍ଧ୍ର ସହ ବିଭିନ୍ନ କ୍ଷେତ୍ରରେ ସମ୍ପର୍କ ବଢ଼ିବ । ଅର୍ଥନୈତିକ ଅଭିବୃଦ୍ଧି ଘଟିବ । ଜିଲ୍ଲାରେ ବେକାର ଯୁବକଯୁବତୀ ନିଯୁକ୍ତି ପାଇବେ ।
