ଗୋପାଳପୁର,୨୩/୦୮: ବ୍ରହ୍ମପୁର ବିଶ୍ୱବିଦ୍ୟାଳୟରେ ବୁଧବାର ସନ୍ଧ୍ୟାରେ ଛାତ୍ର ଓ ଅଣଛାତ୍ର ମୁହାଁମୁହିଁ ଘଟଣା ଏବଂ ପରବର୍ତ୍ତୀ ବିଶୃଙ୍ଖଳାକୁ ନଜରରେ ରଖି କର୍ତ୍ତୃପକ୍ଷ ଆକ୍ସନ୍ ମୋଡ୍କୁ ଓହ୍ଲାଇଛନ୍ତି । କ୍ୟାମ୍ପସ୍ରେ ବିଶୃଙ୍ଖଳା ନହେବା ଏବଂ ଶୈକ୍ଷିକ ବାତାବରଣ ବଜାୟ ରଖିବା ପାଇଁ କୁଳପତି ପ୍ରଫେସର ଗୀତାଞ୍ଜଳି ଦାଶ ଏକାଧିକ ପଦକ୍ଷେପ ଗ୍ରହଣ କରିଛନ୍ତି ।
କୁଳପତି ପ୍ରଫେସର୍ ଦାଶ ଶୁକ୍ରବାର ପ୍ରାୟ ୭ଟି ପିଜି (ସ୍ନାତକୋତ୍ତର) ବିଭାଗ ଅଚାନକ ପରିଦର୍ଶନ କରିଥିଲେ । ଶ୍ରେଣୀରେ ଅନୁପସ୍ଥିତ ଛାତ୍ରଛାତ୍ରୀ ଓ ଶିକ୍ଷକଙ୍କୁ କାରଣ ଦର୍ଶାଅ ନୋଟିସ୍ ଜାରି କରିଛନ୍ତି । ଛାତ୍ରଛାତ୍ରୀ ଜବାବ ଦେବା ପରେ ଆଲୋଚନା କରାଯିବ । ଆବଶ୍ୟକ ସ୍ଥଳେ ପରୀକ୍ଷାରୁ ବାଦ୍ ଦିଆଯିବ ବୋଲି ସୂଚନା ମିଳିଛି । ସେହିଭଳି କୁଳପତିଙ୍କ ନିର୍ଦ୍ଦେଶରେ ପିଜି କାଉନ୍ସିଲ୍ ଅଧ୍ୟକ୍ଷ ପ୍ରଫେସର ସୁକାନ୍ତ କୁମାର ତ୍ରିପାଠୀ ମଧ୍ୟ ୧୦ଟି ପିଜି ବିଭାଗ ପରିଦର୍ଶନ କରି ତଥ୍ୟ ପ୍ରଦାନ କରିଛନ୍ତି । ଅନୁପସ୍ଥିତ ଛାତ୍ରଛାତ୍ରୀ, ଶିକ୍ଷକଙ୍କୁ କାରଣ ଦର୍ଶାଅ ନୋଟିସ୍ ଜାରି କରିଛନ୍ତି ।
ଗୁରୁବାର କୁଳସଚିବଙ୍କ ବିଜ୍ଞପ୍ତି ଅନୁସାରେ, ଶୁକ୍ରବାର ସକାଳୁ ନାଲ୍କୋ ଗେଟ୍ରେ ପ୍ରବେଶ ପାଇଁ ଛାତ୍ରଛାତ୍ରୀଙ୍କ ପରିଚୟପତ୍ର ଯାଞ୍ଚ କରାଯାଇଥିଲା । ପରିଚୟପତ୍ର ସାଙ୍ଗରେ ଆଣିନଥିବା ଛାତ୍ରଛାତ୍ରୀଙ୍କୁ ପ୍ରବେଶ ସୁଯୋଗ ଦିଆଯାଇନଥିଲା । ସନ୍ଧ୍ୟା ୫ଟା ପର ଠାରୁ କ୍ୟାମ୍ପସ୍ରେ ରହୁଥିବା ଶିକ୍ଷକ, କର୍ମଚାରୀ ପରିଚୟପତ୍ର ଦେଖାଇ ଭିତରକୁ ପ୍ରବେଶ କରିଥିଲେ । ନଚେତ୍ ପ୍ରବେଶ ସୁଯୋଗ ମିଳି ନଥିଲା ।ଏଥିନିମନ୍ତେ ଗଠିତ ଦୁଇଟି କମିଟି ପ୍ରତିଦିନ ହଷ୍ଟେଲ୍ ତଦାରଖ କରି ତଥ୍ୟ ଦାଖଲ କରିବାକୁ କୁହାଯାଇଛି । ସାଂସ୍କୃତିକ କାର୍ଯ୍ୟକ୍ରମର ନେତୃତ୍ୱ ନେଇଥିବା ଏବଂ ବିକ୍ଷୋଭ ପାଇଁ ଗୋପାଳପୁର ଥାନାକୁ ଯାଇଥିବା ବିଦ୍ୟାର୍ଥୀମାନଙ୍କୁ ତଦନ୍ତ ପରେ କାରଣ ଦର୍ଶାଅ ନୋଟିସ୍ ଜାରି ହେବ । ଥାନା ଘେରାଉରେ ସାମିଲ ଥିବା ଛାତ୍ରଙ୍କୁ ତଦନ୍ତ ପରେ ହଷ୍ଟେଲ୍ରୁ ବାହାର କରି ଦିଆଯିବ । ସିସିଟିଭି ଫୁଟେଜ୍ ଯାଞ୍ଚ ପରେ ସୁରକ୍ଷାକର୍ମୀଙ୍କ ବିରୋଧରେ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ ହେବ ବୋଲି କହିଛନ୍ତି କୁଳପତି ପ୍ରଫେସର ଦାଶ ।
ସୂଚନାଯୋଗ୍ୟ ଯେ, ପୂର୍ବରୁ ଛାତ୍ର ଅଶାନ୍ତି ଯୋଗୁଁ ୧୪ ଜଣ ଛାତ୍ରଙ୍କୁ ହଷ୍ଟେଲ୍ରୁ ବହିଷ୍କାର କରାଯାଇଥିଲା ।
